Jeremia 27 - Uwumbɔr aagbaŋ

Jeremia aah di inaaja i ko na aadɔ leen ubaa pu pu na

¹ Josia aajapɔɔn Sedekia aah nan jin Juda aanaan na, libuul ngbaan ni le Uwumbɔr bui mi

² ke m di ŋigbapapan ni idɔ, ki ŋa mbaa inaaja i ko na aadɔ i punn isil pu na ki di leen nsil.

³ Uwumbɔr nan ki bui mi ke m di inaŋ tii Edom, ni Moab, ni Amonn, ni Taya, ni Saidonn aaninkpiib bi dan Jerusalem ni ke bi nan kan Ubɔr Sedekia na, aan bi ti di i tii baabɔrb.

⁴ Uwumbɔr Mpɔɔnsakpiindaan, u ye Israel yaab Aawumbɔr na, nan tuk mi ke m tuk bi ke bi ti bui baabɔrb ke uma Uwumbɔr len ke,

⁵ “Maapɔɔnsakpiin pu le m naan dulnyaa wee, ni unibɔn, ni tiwakor ti mɔmɔk bi kitiŋ pu na; le ki joo ki tii unii umɔk m gee na.

⁶ Min le di ŋitimbol ŋee mɔmɔk ŋa maatutunn Babiloŋ Aabɔr Nebukadnesar aapɔɔn ni, le ki cha ipeel mu tun tii u.

⁷ Ŋitimbol mɔmɔk ga tun tii u, ki ga tun tii ujapɔɔn, ni uyaabil ki ti saa buyoonn waatimbol ga lir na. N‑yoonn ngbaan le waatimbol ga li tun tii ŋitimbol ni bibɔrkpaam bi kpa ipɔɔn na.

⁸ “Litimbol, bee nnaan mubaa yaa kaa kii tii u kan, m ga di butɔb, ni nkon, ni iween daa litafal ki ti saa buyoonn m ga cha Nebukadnesar kuln li pel pel na.

⁹ Taa ŋun tii bibɔnabr man, bee unii umɔk bui ke u ga ŋmaa len tiwan ni ga fe ŋa fen na tidaŋ ni, bee bitekpiib aawiin, bee binib bi joo inyɔk tun na. Bi mɔmɔk tuk nimi le ke ni taa kii tii Babiloŋ aabɔr.

¹⁰ Bi ŋmanni nimi la, le kina ngbaan ga cha bi chur nimi buen dandar ki cha nimi aatiŋ. M ga jenn nyan nimi, le bi ku doo nimi.

¹¹ Tɔ, litimbol li kii tii Babiloŋ aabɔr ki tun tii u na ma kan, m ga cha li li bi laatiŋ pu, ki li koo nima ki ko. Min Uwumbɔr le len kina.”

¹² M nan bui Juda Aabɔr Sedekia tibɔchachaan ngbaan la, “Kii tii Babiloŋ aabɔr. Li tun tii u ni waanib, ki li kpa limɔfal.

¹³ Ba ŋa aa ban aa ni saanib kpo butɔb, ni nkon, ni iween aakun? Kina le Uwumbɔr len ke litimbol li kaa kii tii Babiloŋ aabɔr na ga kan.

¹⁴ Taa ŋun bibɔnabr bi tuk nimi ke ni taa di nibaa tii u na aabɔr. Bi ŋmanni nimi la.

¹⁵ Uwumbɔr ubaa le len ke waa tun ni bi, ke bi joo inyamɔn le tuk nimi waayimbil pu. Kina pu na, u ga jenn nyan nimi, le bi ku nimi; nimi ni bibɔnabr bi joo inyamɔn yee tuk nimi na ga kpo.”

¹⁶ Le m tuk bitotoorb ngbaan ni binib ngbaan Uwumbɔr aah len pu na ke, “Taa ŋun bibɔnabr bi len ke Maadichal ni aawangol ga ki nyan Babiloŋ ni ki gir ni dandana na aabɔr. Bi geei nimi inyamɔn la.

¹⁷ Taa pel bi chee man. Kii tii Babiloŋ aabɔr ki li kpa limɔfal man. Ba ŋa ni ban ke kitiŋ kee kpaln tilangbenn.

¹⁸ Bi yaa sil ye maabɔnabr le ki kpa maabɔr kan, cha bi gaŋ min Uwumbɔr Mpɔɔnsakpiindaan ke m taa cha bi yoor liwangol li gur Maadichal ni, ni nnaan aadichal ni na buen Babiloŋ aatiŋ ni.”

^19-20 Tɔ, Ubɔr Nebukadnesar aah nan yoor Jehoyakim aajapɔɔn Jehoyachinn u nan ye Juda aabɔr na, ni Juda, ni Jerusalem aasalolm buen Babiloŋ aatiŋ ni na, waa nan yoor jaatɔlk mam, ni tikumann aakin, ni tɔroku mam, ni Uwumbɔr Aadichal ni aawangol ŋiken mu.

²¹ “Li pel man, min Uwumbɔr Mpɔɔnsakpiindaan, u ye Israel yaab Aawumbɔr na, aah kpa pu ki joo cha liwangol li gur ki bi Maadichal ni, ni nnaan aadichal ni, Jerusalem aatiŋ ni na:

²² Bi ga yoor li buen Babiloŋ aatiŋ ni ki ti saa n‑yoonn mu m ga fenn maalandak toŋ li wɔb na. Le m ga giin ni li ki nan di siin libuul lee ni. Min Uwumbɔr le len kina.”