Jeremia 26 - Uwumbɔr aagbaŋ

Baah jin Jeremia tibɔr pu na

¹ Josia aajapɔɔn Jehoyakim aah jin Juda aanaan n‑yoonn mu na aapuwɔb,

² le Uwumbɔr bui mi ke, “Sil Maadichal aachiln ni ki di maah bui si pu na moon tuk binib bi nyani Juda aatim ni ki nan dooni mi nima chee na. Taa nyan ti ponn ni tibaa lii.

³ Nibaakan, binib ngbaan ga ŋun ki di cha baatunwanbir aabimbin. Bi yaa ŋun kan, m ga kpeln maalandak ki taa ki cha libiil li m ba ga joo ni bi pu, baabiin aatuln pu na, dan bi pu.”

⁴ Uwumbɔr nan ki bui mi ke m tuk binib ngbaan ke, “Min Uwumbɔr le len ke ni kii maamɔb ki li dii mmɔkm mu m di tii nimi na,

⁵ ki li ŋun ŋimɔbon ŋi maatutum, bi ye bibɔnabr aan m tuni bi ni chee n‑yoonn mɔmɔk na. Naa kee kii tii baah len pu na daalbaadaal.

⁶ Ni yaa beenin yiil kan, m ga bii Maadichal lee ke maah nan bii Silo aatiŋ pu na, le dulnyaa wee aatimbol mɔmɔk ga li joo Jerusalem aayimbil puuni lir biken pu.”

⁷ Bitotoorb, ni bibɔnabr, ni binib ngbaan mɔmɔk ŋun m bi len nimina mɔmɔk Uwumbɔr Aadichal ni,

⁸ le maah len uma Uwumbɔr aah bui mi ke m len pu na doo na, le bi ber nan chuu mi ki teen ke, “Nimina ŋeer ke ti ku si.

⁹ Ba ŋa aa di Uwumbɔr aayimbil len ke Waadichal lee ga bii ke Silo na, aan kitiŋ kimina mu ga kuln, ubaa taa ki li koo nima?” Binib ngbaan nan mann goln mi.

¹⁰ Juda aatiŋ aayidam aah ŋun tiwan ni ŋa na pu, le bi san nyan ni nnaan aadichal ni, ki dan Uwumbɔr Aadichal chee, le ki ti kal baakakaa chee, mbisamɔb mu bi yin mu ke Mbisamɔpɔɔn na chee.

¹¹ Le bitotoorb ni bibɔnabr nan bui biyidam ni binib ngbaan ke, “Uja wee ŋeer ke ti ku u, waah len tibɔr ti kitiŋ kee pu na pu. Nimi nibaa aatafal ŋun waah len pu na.”

¹² Le m bui ke, “Uwumbɔr le tun ni mi ke m nan di tibɔr ti mɔmɔk ni ŋun m joo mooni len Waadichal ni kitiŋ pu na len.

¹³ Ni kpeln mbimbin mu ni bi mu ni na, ni tiwan ni ni ŋani na, ki kii Nidindaan Uwumbɔr aamɔb. Ni yaa ŋa kina kan, u ga kpeln waalandak ki taa ki cha libiil li u bui ke u ga joo ni ni pu na dan.

¹⁴ M ma kan, m bi nimi aapɔɔn ni la. Naah gee pu na kan, ni ŋa mi.

¹⁵ Tɔ, li nyi man kina: ni yaa ku mi kan, nimi ni kitiŋ kee aanib aabɔr ga bii ke ni ku unii u kaa tun taani ubaa na, ba pu? Uwumbɔr le tun ni mi ke m nan sak nimi.”

¹⁶ Le biyidam ni binib ngbaan bui bitotoorb ni bibɔnabr ngbaan ke, “Uja wee len ti chee tibɔr Tidindaan Uwumbɔr aayimbil pu la; naa ŋan ke ni ku u.”

¹⁷ Nee aapuwɔb, biyidam ngbaan bibaa nan fii sil le ki bui binib bi kuun ni na ke,

¹⁸ “Hesekia aah nan ye Juda aabɔr na, Uwumbɔr aabɔnabr Maika u nan bi Moresef aatiŋ ni na nan tuk binib mɔmɔk ke Uwumbɔr Mpɔɔnsakpiindaan len ke, ‘Bi ga kpar Sionn ke lisikpel na, le Jerusalem kpaln tilangbenn aakpuk, le Uwumbɔr Aadichal aagongoln ga kpaln kichook.’

¹⁹ Ubɔr Hesekia ni Juda aanib aa nan ku Maika. Hesekia nan labr san Uwumbɔr le ki pɔɔn ubaa ke u kan lineen u chee. Le Uwumbɔr nan kpeln waalandak, kaa ki cha tibɔbir ti u nan bui ke ti ga dan bi pu na dan. Ti bi ban tibɔbir sakpenn le tii tibaa.”

²⁰ Tɔ, uja ubaa mu ki bi, ki len Uwumbɔr aayimbil pu tibɔbir kitiŋ kee, ni litimbol lee pu, ke Jeremiah aah len pu na. U nan ye Semaya u nyan ni Kiriaf Jearim na aajapɔɔn Uria.

²¹ Ubɔr Jehoyakim ni waajab, ni waaninkpiib aah ŋun Uria aah len pu na, le ubɔr ngbaan nan pɔɔn ubaa ke bi ku u. Uria nan ŋun ti pu, le ki di ijawaan san buen Ijipt aatiŋ ni.

²² Le ubɔr Jehoyakim nan tun Akbor aajapɔɔn Elnatann ni bijab bibaa Ijipt ni, ke bi ti li joo ni Uria.

²³ Bi nan ti joo ni u Ubɔr Jehoyakim chee, le u ku u ki di u mee kicheek ni.

²⁴ Tɔ, Safann aajapɔɔn Ahikam aah nan si nchaŋ ni na, le baa nan di mi tii binib ngbaan ke bi ku mi.