Jeremia 25 - Uwumbɔr aagbaŋ

Bidim bi nyan ni ŋŋangan wɔb na aabɔr

¹ Juda aabɔr Jehoyakim, u aate nan ye Josia na, aanaan aabinanar ni, le Uwumbɔr nan di Juda aanib mɔmɔk aabɔr tee tuk mi. Babiloŋ aabɔr Nebukadnesar aanaan ni aajan aabiln ni le na.

² M nan bui Juda ni Jerusalem aanib mɔmɔk ke,

³ “Ŋibin moninko ni ŋitaa ponn ni, ki nya Amonn aajapɔɔn Josia aah nan ye Juda aabɔr pu na aabin kipiik ni litatar ni ki nan saa din wee na, Uwumbɔr len m chee tibɔr, le m mu aa kee yii kaa di waah len pu na tuk nimi. Le ni yii, kaa pel waah len pu na.

⁴ Naa pel, kaa kpa ŋuntii, le Uwumbɔr ma beenin tun ni waabɔnabr bi ye waatutum na ni chee.

⁵ Bi nan bui nimi ke ni di cha nimi aabiin aabimbin mu ni bi na, ki di cha titunwanbir ti ni tun na, aan ki li beenin koo kitiŋ ki pu Uwumbɔr nan di tii nimi ni niyaajatiib, ke ki li ye nimi aawan n‑yoonn mɔmɔk na.

⁶ Bi nan bui nimi ke ni taa li dooni ŋiwaa ki taa li dii ŋi, ki taa cha Uwumbɔr aaŋuul fii naah dooni ŋiwaa ŋi ni naan nibaa na pu. Ni yaa ba nan kii Uwumbɔr aamɔb kan, waa ba ga nan daa nitafal.

⁷ Tɔ, Uwumbɔr ubaa len ke ni yii, kaa pel u chee. Ni tee cha waaŋuul fii nimi aawaa pu, le ki joo ni ntafadaan mue nibaa pu.

⁸ “Kina pu na, naah kaa ŋun tii u na, Uwumbɔr Mpɔɔnsakpiindaan bui ke,

⁹ ‘M ban m tun yin ni ŋŋangan wɔb aanib mɔmɔk, ni Babiloŋ Aabɔr Nebukadnesar, u ye maatutunn na la. M ga cha bi dan ki nan tak Juda ni kaanib, ni ŋitimbol ŋi mɔmɔk mu bi gbɔk ki na, ki cha mu li gur ye tilangbenn ti kpa ijawaan na, ki ti saa n‑yoonn mu kaa kpa ndoon na. Min Uwumbɔr le len kina.

¹⁰ M ga cha baamɔɔn, ni mpopiin aafuuk, ni tibɔndinn aajim aapopiin aafuuk na ŋmin chii. Baan ki kan nkpan ki ŋa baakaryaa mam ni, kaan ki kan tijikaar mu.

¹¹ Kitiŋ kee mɔmɔk ga kpaln tilangbenn le ki li kpa ijawaan, le kaanib ni ŋitimbol ŋi bi gbɔk na ga li tun tii Babiloŋ aabɔr ki ti saa ŋibin imonko itaa ni kipiik.

¹² Nee aapuwɔb le m ga daa Babiloŋ aatiŋ ni kaabɔr aatafal baatunwanbir pu. M ga kuln kitiŋ ngbaan ki cha ki kpaln tilangbenn ki ti saa n‑yoonn mu kaa kpa ndoon na.

¹³ M ga di tibɔbir ti m nan cha Jeremia di faan ŋitimbol na daa Babiloŋ aatiŋ aatafal, tibɔbir ti mɔmɔk bi kigbaŋ kee ni na.

¹⁴ Babiloŋ yaab aah tun pu na, kina le m ga di teen bi, le ŋitimbol pam ni bibɔrkpaam di bi ŋa baanaagbiib.’”

Uwumbɔr aah ga daa ŋitimbol aatafal pu na

¹⁵ Uwumbɔr, u ye Israel yaab Aawumbɔr na nan bui mi ke, “Ndaan aayikuuk ki gbii maaŋuul na sɔ. Di ki buen ŋitimbol ŋimɔk m tun si ŋi chee na, ki cha bi nyu ki ponn ni.

¹⁶ Bi yaa nyun ki ponn ni kan, bi ga li chuun gbeer, kaan ki li kpa nlan, butɔb bu m ban m cha bu dan bi pu na pu.”

¹⁷ Le m nan gaa kiyikuuk ngbaan Uwumbɔr aaŋaal ni, ki di tii ŋitimbol ŋimɔk Uwumbɔr tun mi ŋi chee na, ki cha ŋi nyun ki ponn ni.

¹⁸ Jerusalem aatiŋ, ni Juda aatim mɔmɔk, ki kpee kaabɔrb ni biyidam mɔmɔk, m nan cha bi nyun ki ponn ni, ki cha bi kpaln nteersakpiin, ki kpa ijawaan, ki cha binib joo baayimbil puuni lir biken pu, ke baah beenin ŋani pu na.

^19-26 Binib bi mu nan ki nyun ki ponn ni na sɔ: Ijipt aabɔr, ni waaninkpiib, ni biyidam, Ijipt aanib mɔmɔk, ni biwɔwɔm bi mɔmɔk bi Ijipt aatiŋ ni na, Us aatiŋ aabɔrb mɔmɔk, ni Filistia aatim mumina: Askelonn, ni Gasa, ni Ekronn, ni Asdod aatiŋ ki gur siib na aabɔrb mɔmɔk; ni Edom, ni Moab, ni Amonn aatim aanib mɔmɔk; ni Taya ni Saidonn aatim aabɔrb mɔmɔk; ni Kaasisik ni Aanyusakpem aatim aabɔrb mɔmɔk; ni Dedann, ni Tema, ni Bus aatim mɔmɔk; ni binib bi mɔmɔk chee biyigbeer pu aayikpir na, ni Arabia aabɔrb mɔmɔk; ni nteersakpiin ni aanibol aabɔrb mɔmɔk; ni Simri, ni Elam, ni Media aatim aabɔrb mɔmɔk; ni ŋŋangan wɔb, ni duun na, ni ni daa na, aabɔrb mɔmɔk ubaabaa. Kitiŋ kee pu aatimbol mɔmɔk ga nyu ki ponn ni. Gbelngbeln yoo le nan ye Babiloŋ aabɔr u ga nyu ki ponn ni na.

²⁷ Le Uwumbɔr ki bui mi ke, “Tuk binib ngbaan ke min, Uwumbɔr Mpɔɔnsakpiindaan, u ye Israel yaab Aawumbɔr na le bui bi ke bi nyu ki ti gbii ki li wulni, ki ti lir ki taa ki ŋmaa fii sil, butɔb bu m ga cha bu dan bi pu na pu.

²⁸ Bi yaa yii kaa gaa kiyikuuk ngbaan aaŋaal ni ki nyu ki ponn ni kan, aa bui bi ke Uwumbɔr Mpɔɔnsakpiindaan bui ke see bi nyu ki ponn ni.

²⁹ M ga piin maabiil aatuln ngbaan mbaa aatiŋ ponn ni la. Bi dak ke maan daa bitafal la aa? Aayii, bi ga kan ntafadaan, ba pu? m ga cha butɔb dan kitiŋ kee mɔmɔk aanib pu. Min Uwumbɔr Mpɔɔnsakpiindaan le len kina.

³⁰ “Sin Jeremia, di maah len pu na mɔmɔk moon. Aa bui binib bee ke, ‘Uwumbɔr ga ŋuun ni paacham, ki teen ke utaal na paachapaacham. U ga ŋuun waanib pu; u ga li tar ke uja u bi tai ŋisubil, aan nnyun nya pu na la. Unii umɔk bi kitiŋ do na ga ŋun u pu,

³¹ le kitiŋ aanaanmɔk mu ga ŋun. Uwumbɔr kpa ŋitimbol ngbaan pu tibɔr. U ga ji unii mɔmɔk tibɔr le ki ku bibiindam na. Uwumbɔr le len kina.’”

³² Uwumbɔr Mpɔɔnsakpiindaan bui ke tibɔbir ga dan litimbol libaa pu, le ki paan liken, kitaabuŋ ki pɔɔ sakpen na bi kitiŋ aanaanmɔk ki choo.

³³ Liyaadaal ngbaan kan, Uwumbɔr aah ku binib bi na aanikpol ga li dɔ kitiŋ kee pu, ni kookoo la. Ubaa aan wii baakpuul, le ubaa aan yoor ŋi di buen ti sub. Ŋi ga li dɔ ŋikpuk ŋikpuk ke tinaabin na la.

³⁴ Nimi biyidam, li wii man, nimi maanib aayidam, wii mpɔɔn pu man. Li wii ikpowiil ki bilni titan ni man. N‑yoonn mu bi ga ku nimi na fuu ni a, bi ga kɔr nimi ke ipihja na, le ŋinikpol ga yaa ni kookoo.

³⁵ Nibaa chee aa bi ni ga dii ki ŋmar.

^36-37 Uwumbɔr aaŋuul ponn ni le u kuln nimi aatimbol ki cha nimi aasuudoon aatiŋ nkuun, le ni wii ki ŋuuni ke inaa na.

³⁸ Uwumbɔr siir cha waanib ke uchinn aah siir cha waatakpaluŋ pu na la. Butɔb aajawaan, ni Uwumbɔr aaŋuusakpeln cha kitiŋ ngbaan kpaln nteersakpiin a.