Jeremia 24 - Uwumbɔr aagbaŋ

Tibɔɔkur tilee ti gbii ŋikakan na aabɔr

¹ Uwumbɔr nan di tibɔɔkur tilee ti gbii ŋikakan na mɔk mi, Waadichal aabisamɔb chee. Ni nan ye n‑yoonn mu Babiloŋ Aabɔr Nebukadnesar nan chuu Juda Aabɔr Jehoyachinn, u aate nan ye Jehoyakim na, ni Juda aayidam, ni baawanŋab, ni binib bi nyi tiwan sakpen na tinaagbiir nyan Jerusalem aatiŋ ni, ki di buen Babiloŋ aatiŋ ni na aapuwɔb la.

² Njan aabɔɔkuuk na nan gbii ŋikakan ŋi puir mala ki ŋan na la; le kiken na gbii ŋikakan ŋi kaa ŋan, ki bur, baan ŋmaa ŋmɔ ŋi na.

³ Le Uwumbɔr baa mi ke, “Jeremia, aa waa ba?” Le m gar ke, “Ŋikakan. Ŋinyaan na nan ŋan sakpen, le ŋi kaa nan ŋan na, aa nan ŋan kpala unii ga ŋmaa ŋmɔ ŋi.”

⁴ Le Uwumbɔr bui mi ke,

⁵ “Min, Uwumbɔr, u ye Israel yaab Aawumbɔr na, di baah nan chur binib bi buen Babiloŋ na ŋaŋ ŋikakan ŋi ŋan na la, m ga ŋa bi tiŋann.

⁶ M ga li bi bi chee ki ki giin ni bi kitiŋ kee pu. M ga maa bi kaan, kaan ber bi; m ga di bi ŋum, kaan ki daa ŋɔb bi.

⁷ M ga tii bi lineen li ga cha bi bee ke min le ye Uwumbɔr na. Baah ga gir ni m chee ni bisui mɔmɔk pu na, le ga cha bi li ye maanib, le m mu ga li ye Baawumbɔr.

⁸ “Juda Aabɔr Sedekia ma, ni bininkpiib bi ka gob u na, ni Jerusalem aanib bi gur ki ka kitiŋ kee pu, ni binib bi fii buen Ijipt aatiŋ ni na ma kan, min Uwumbɔr ga ŋa bi mɔmɔk ke ŋikakan ŋi si, kaa ŋan ke bi ŋmɔ ŋi na la.

⁹ Maah ga cha tibɔbir ti aaboln dan bi pu na ga chuu dulnyaa aatimbol mɔmɔk ijawaan. Binib ga ŋa bi yaansara, ki ŋa bi mbɔnyun, ki li laa bi, ki li joo baayimbil puuni lir biken pu baah yaa ki bi ni kookoo na.

¹⁰ M ga cha butɔb, ni nkon, ni iween dan bi pu ki ti saa n‑yoonn mu bi ponn ni ubaa aan gur kitiŋ ki m di tii bi ni biyaajatiib na pu na.”