Jeremia 23 - Uwumbɔr aagbaŋ

N‑yoonn mu choo na aamakl

¹ Uwumbɔr yaa nan jin biyidam bi bii ki yaa waanib na tibɔr kan, naan li ŋan bi pu.

² Uwumbɔr, u ye Israel yaab Aawumbɔr na aah len biyidam bi aatuln ba ye bi li joo waanib mbamɔm na aabɔr pu na sɔ: “Naa joo maanib; ni yaa bi, le ki jenn bi buen. Tɔ, m ga daa nitafal naah tun titunwanbir ti na pu.

³ M ga kuun ni maanib bi ŋmar na ki nya ni ntim mu m yaa bi aan bi bi mu ponn ni na, le ki giin ni bi bido aatiŋ pu. Bi ga li kpa mbim pam ki pɔr kpee.

⁴ M ga ban biyidam bi ga li joo bi na. Maanib aan ki li san ijawaan, le maan ki daa bitafal. Min Uwumbɔr le len kina.”

⁵ Uwumbɔr ki bui ke, “N‑yoonn choo le m ga nyan Ubɔr David aayaabitiib ponn ni ubɔr u aabimbin ŋan na. Ubɔr ngbaan ga di nlan le joo waanib ki li ŋani tiwan ni ŋan ki tok na kitiŋ ngbaan pu.

⁶ U yaa nan ŋa ubɔr kan, Juda aanib ga kan lifuur, le Israel aanib kan nsuudoon. Bi ga li yin u ke ‘Uwumbɔr u gaal timi lir na’ la.”

⁷ Uwumbɔr ki bui ke, “N‑yoonn choo le binib aan ki li puur tipuur maayimbil pu ke, ‘Uwumbɔr u bi ki nyan ni Israel aanib Ijipt aatiŋ ni na.’

⁸ Bi ga li gur puur maayimbil pu ke, ‘Uwumbɔr u bi ki nyan ni Israel aanib ŋŋangan wɔb aatiŋ ni, ni ntim mu ponn ni m cha bi yaa ki bi mu ponn ni na la.’ Le bi ga li koo bima bibaa aatiŋ pu.”

Jeremia aah nan di Uwumbɔr aabɔnabtiib aabɔr ti len na sɔ

⁹ Nsui mɔmɔk bii a, le m si jii. Uwumbɔr pu, ni waabɔnyaan pu, le m gur bi ke udagbiir, ki bi ke unii u nyun ndaan sakpen na.

¹⁰ Binib bi kaa kii Uwumbɔr aamɔb na le gbii kitiŋ kee pu; baabimbin aa ŋan, le bi joo baapɔɔn tun ŋitun ŋi kaa ŋan na. Uwumbɔr aah puun lii kitiŋ pu na, le ki wii ikpowiil, le tiwakor aamoŋmɔpaan kuur.

¹¹ Uwumbɔr bui ke, “Maabɔnabtiib ni bitotoorb aa dii min Uwumbɔr; m kan bi Maadichal ponn ni, bi bi tun titunwanbir.

¹² Baah dii isan i na ga li ŋar le ki bɔɔn; m ga cha bi gbeer ki lir. M ga cha tibɔbir dan bi pu. Baatafadaan aayoonn choo. Min Uwumbɔr le len kina.

¹³ M kan bibɔnabr bi bi Samaria aatiŋ ni na aatunwanbir; bi joo Baal aayimbil le nabr tibɔr, le ki di maanib yenn.

¹⁴ M ki kan maabɔnabr bi bi Jerusalem aatiŋ ni na aatunwanbir jer kina; bi gɔr kidagook le ki geei inyamɔn; bi ter binib le bi tun titunwanbir, le ubaa aa ŋmaa di cha titunwanbir aatuln. Mma chee kan, bi mɔmɔk bi ke Sodom ni Gomora aanib na la.

¹⁵ “Kina pu na, min Uwumbɔr Mpɔɔnsakpiindaan aah len bibɔnabr bi bi Jerusalem ni na aabɔr pu na sɔ: M ga di tisufar ti to na le tii bi, bi ji, ki tii bi njinn bi nyu, ba pu? bi cha titunwanbir gbiin kitiŋ kee mɔmɔk la.”

¹⁶ Uwumbɔr Mpɔɔnsakpiindaan bui Jerusalem aanib ke, “Taa pel man bibɔnabr ngbaan aah len pu na; bi joo inyamɔn aamakl le gbiini nimi. Bi tuk nimi bima bibaa aah kal ki dakl pu na la, naa ye min mbaa aah len pu na.

¹⁷ Bi tuk binib bi yii kaa pel maah len pu na ke nibaa aan ŋa bi, le ki tuk binib bimɔk kpa tafalaaŋun na ke tibɔbir aan dan bi pu.”

¹⁸ Le m bui ke, “Bibɔnabr ngbaan ubaa aa nyi Uwumbɔr aalandak i bɔr na. Bi ponn ni ubaa aa bee waabɔr aatataa, kaa pel, kaa ŋun tii waah len pu na daalbaadaal.

¹⁹ Waaŋuul ye kitaabuŋ la, li ye libupɔɔl li ga daa bibiindam aayil pu,

²⁰ kaan ŋmin see waah ban pu na mɔmɔk ti ŋa. N‑yoonn choo le waanib ga nan bee nimina mɔmɔk chain.”

²¹ Le Uwumbɔr bui ke, “Maa tun ni bibɔnabr ngbaan, le bi buen. Maa di maabɔr tibaa tuk bi, le bi len tibɔr maayimbil pu.

²² Bi yaa nan ba nyi maalandak i bɔr na kan, bi ba ga di maabɔr tuk maanib, le bi ba di cha titunwanbir, ni mbiin aabimbin mu ponn ni bi bi na.

²³ “M ye Uwumbɔr u bi ni kookoo, kaa bi libuul libaa ni na la.

²⁴ Ubaa aan ŋmaa bɔr mi m taa kan u. Naa nyi ke m bi paacham, ni kitiŋ ni, ni ni kookoo la aa?

²⁵ M nyi bibɔnabr ngbaan aah len pu ki mɔln inyamɔn maayimbil pu, ke min le di maabɔr tuk bi tidaŋ ponn ni pu na aatataa.

²⁶ Bibɔnabr ngbaan ga li joo baah naan inyamɔn i na ŋmanni maanib ki ti saa bayoonn?

²⁷ Bi dak ke tidaŋ ti bi joo tuk maanib na ga cha maanib suln mbɔr, ke bitetiib aah nan suln mbɔr ki fenn toŋ liwaal Baal wɔb pu na la.

²⁸ Ubɔnabr u daŋ tidaŋ na, u bui ke ni ye tidaŋ la, tɔ, ubɔnabr u m di maabɔr tuk u na, u moon ti mbamɔm. Imuul ni timoor aa kpaa.

²⁹ Maabɔr naan mmii la, ki bi ke ligagaar li wiil ŋitakpal yuk yuk na la.

³⁰ M ni bibɔnabr bi joo biŋeen aatɔtiib aabɔr mooni ke ti ye maabɔr na ga kan tɔb.

³¹ M ni bibɔnabr bi mu joo bibaa aabɔr mooni ke ti ye maabɔr na ga kan tɔb.”

³² Uwumbɔr bui ke, “Li pel man maah len pu na. M ni bibɔnabr bi joo baadaŋ ti gbii inyamɔn na mooni na ga kan tɔb. Bi joo tidaŋ ngbaan le len, ki joo baanyamɔn ni kipupuk ŋmanni maanib. Maa tun bi, kaa bui bi ke bi li cha, le baa kpa nterm mubaa ki tii binib ngbaan. Min Uwumbɔr le len kina.”

Uwumbɔr aabɔr

³³ Uwumbɔr nan bui mi ke, “Jeremia, maanib ponn ni ubaa, bee maabɔnabr ubaa, bee utotoor ubaa yaa baa si ke, ‘Uwumbɔr aabɔr ye kinye kan,’ aa bui u ke, ‘Aa ye tibɔr le ki tii Uwumbɔr, le u ban u nyan si u chee.’

³⁴ Maanii ubaa, bee ubɔnabr ubaa, bee utotoor le yaa bui ke ‘Uwumbɔr aabɔr’ kan, m ga daa u ni waadichal aatafal.

³⁵ Tɔ, bi mɔmɔk li baa bijɔtiib ni bido yaab ke, ‘Uwumbɔr gar kinye? Uwumbɔr len kinye?’

³⁶ Kina pu na, bi taa ki len ke, ‘Uwumbɔr aabɔr;’ naa ye kina kan, m ga cha maabɔr li ye tibɔr ti bir na le ki tii udaan. Binib ngbaan fenn fenn Baawumbɔr u bi, ki ye Uwumbɔr Mpɔɔnsakpiindaan na, aamɔboln la.

³⁷ Jeremia, baa bibɔnabr ngbaan ke, ‘Uwumbɔr gar nimi kinye? Uwumbɔr len kinye?’

³⁸ Le bi yaa yii maah len pu na aan ki bui ke ‘Uwumbɔr aabɔr’ kan, le aa bui bi ke,

³⁹ m ga sil yoor bima ni kitiŋ ki m nan di tii bi ni biyaajatiib na di mee dandar dandar.

⁴⁰ M ga cha inimɔɔn ni kiyimbiyook ki kaa kpa ndoon na dan bi pu.”