Jeremia 22 - Uwumbɔr aagbaŋ

Jeremia aah nan di tibɔr ti tuk Juda aanaanjirb na

^1-2 Uwumbɔr nan bui mi ke m buen Juda aabɔr, u ye Ubɔr David aayaabil na aabɔrdichal ni, ki ti tuk ubɔr ngbaan, ni waaninkpiib, ni Jerusalem aanib ke bi li pel Uwumbɔr aah len pu na ke,

³ “Min Uwumbɔr bui ke ni li ŋani tiwan ni ŋan ki ye ibamɔn na. Ni sil unii u uken bi ji u na aapuwɔb. Taa ŋa biwɔwɔm, ni nkpobim, ni bikpopiib mbiin; ki taa ku binib bi kaa tun taani ubaa na do chee na.

⁴ Ni yaa sil ŋani maah tuk nimi pu na kan, Ubɔr David aayaabitiib ga li beenin ji nnaan. Le bima, ni baaninkpiib, ni baanib ga li diir ibisamɔi yee, ki bi itaan aatɔroku mam ni, ki dik itaan pu, ki nya libɔrdichal lee ni.

⁵ Tɔ, ni yaa kaa ŋani maah tuk nimi pu na kan, m puu tii nimi ke libɔrdichal limina ga ber doo ki kpaln lilangbeln. Min Uwumbɔr le len kina.

⁶ “M chee kan, Juda aanaan aadichal ŋan ke Gilead aatiŋ, ni Lebanonn aajoo na la; le m ga ŋa li nin chee ubaa aan ŋmaa koo na.

⁷ M ban m tun ni bijab aan bi nan kuln li. Bi mɔmɔk ga joo ni baachɔm, ki nan gaa geei laagonyaan ŋi bi di santina aadɔ ŋa ŋi na lii, ki di i mee ŋa mmii ni.

⁸ “Nee aapuwɔb le biwɔwɔm pam ga jer, le ki baa tɔb ke ba ŋa min Uwumbɔr ŋa kitisakpeŋ kee kina.

⁹ Le bi ga gar ke ni bii nimi ni nimi Aawumbɔr aamɔbaan, ki dooni ŋiwaa ki tun tii ŋi na le cha u ŋa kina.”

Jeremia aah nan di Joahas aabɔr ti len na aabɔr

¹⁰ Juda aanib, taa wii Ubɔr Josia pu man; taa wii waakpuul man. Li wii ujapɔɔn Joahas pu; bi ga nan chuu u di buen, le waan ki gir ni daalbaadaal, waan ki kan kitiŋ ki pu bi nan ma u na.

¹¹ Uwumbɔr aah len Josia aajapɔɔn Salum u nan ka ute aajal pu ki ye Juda aabɔr na aabɔr ti na sɔ, “U nyan do, kaan ki gir ni daalbaadaal.

¹² Baah di u buen kitiŋ ki ni na le u ga ti kpo nima, le kaan ki kan kitiŋ kimina daalbaadaal.”

Jeremia aah nan di Jehoyakim aabɔr ti len na sɔ

¹³ Uja u di beebee maa waadichal, ki moo maa kpae li pu inyamɔn pu aan waanib tun lituln fam, kaa gaal tipar na aamɔfal junn a.

¹⁴ Uja u len ke, “M ga maa lidichasakpeln ki cha paacham aadir li waa pam,” le ki ŋa takolu mam waadichal pu, ki di santina aakpan kpaa bi, le ki di tiwamann boon bi na aamɔfal junn a.

¹⁵ Aa yaa di santina maa saadichal ke li li ŋan jer biken yaan kan, kina ga ŋmaa ŋa si ubɔrnyaan ki jer biken aa? Aate nan jin waamɔɔn u nan bi chob ki kpa ibamɔn, le ki nan kan tinyoor waatuln mɔmɔk ni.

¹⁶ U nan jin bigiim aabɔr ibamɔn pu, le waawan mɔmɔk nan kpa nsan. Kina le mɔk ke unii sil nyi Uwumbɔr.

¹⁷ Le aa ma le ban saakumɔŋ aanyoor baanja; aa ku binib bi kaa kpa taani ubaa na, le ki joo mbimbinpɔɔl muk saanib. Uwumbɔr le len kina.

¹⁸ Le Uwumbɔr nan len Josia aajapɔɔn Jehoyakim, u nan ye Juda aabɔr na aabɔr ke, “Ubaa aan wii waakpuul, kaan len ke, ‘Ni kpa mpombiin sakpen, njɔ, ni kpa mpombiin sakpen a.’ Ubaa aan wii u pu, kaan moo u pu ke, ‘Maaninkpel, maabɔr.’

¹⁹ Bi ga di ubon aakpuul aanyuŋ le di fuul u di buen ki ti di u mee Jerusalem aabisamɔi aapuwɔb.”

Jeremia aah di Jerusalem aalirm aabɔr ti len na sɔ

²⁰ Jerusalem aanib, li cha Lebanonn aatiŋ pu, ki ti li tar man; li cha Basann aatiŋ pu ki li wii man; li bi Moab aajoo pu ki yin man, ba pu? bi nyaŋ nimaantɔtiib a.

²¹ Naah nan laa kpa liwangol buyoonn na, le Uwumbɔr nan len ni chee le ni yii kaa pel. Nimi aatuln le bi na, nimi aamɔfal aayoonn mɔmɔk ni; naa kee kii Uwumbɔr aamɔb.

²² Naah tun titunwanbir pu na, le libuln ga daa nimi aayidam buen, le bidim ga chur nimaantɔtiib butɔb ni tinaagbiir, le nimi aatiŋ jin inimɔɔn.

²³ Ni kaa santina bi bi joo ni bi nyan ni Lebanonn aatiŋ ni na ponn ni le ki fuur; tɔ, iween i wu ke upii aamalween na yaa nan pii nimi kan, le ni ga ŋa kinimbaak aanib.

Uwumbɔr aah ga daa Jehoyachinn aatafal pu na

²⁴ Uwumbɔr nan bui Juda Aabɔr Jehoyakim aajapɔɔn Jehoyachinn ke, “Maah ye Uwumbɔr u bi n‑yoonn mɔmɔk na pu na, hali aa yaa ba ye kibɔmbik ki ŋmaa ŋŋangii aaŋanbik pu na kan,

²⁵ m ba ga ŋmaar si tii binib bi ban bi ku si, aan aa san bi ijawaan na. M ga di si tii Ubɔr Nebukadnesar ni waajab la.

²⁶ M ga jenn aa ni aana buen tinaagbiir ni. Ni ga buen kitiŋ ki baa nan ma nimi ki ponn ni na la, le ni mɔmɔk ga ti kpo nima.

²⁷ Ni ga li neen ke ni ki kan kitiŋ kee, le ki mu aan ki gir ni ki pu.”

²⁸ Le m bui ke, “Ubɔr Jehoyachinn kpaln libuul li wii aan bi di li mee ubaa aa ki ban li na la aa? Kina pu le u ni waabim bi tinaagbiir ni, kitiŋ ki baa nyi kaabɔr na ni ii?

²⁹ Kitiŋ, kitiŋ, kitiŋ, li pel Uwumbɔr aah len pu na.

³⁰ M siin ke uja wee lann waabim ki li ye uja u kaan kan tinyoor na. Waan li kpa yaabitiib bi ga nan li joo Juda aatiŋ ke Ubɔr David aah nan ye pu na. Min Uwumbɔr le len kina.”