Jeremia 21 - Uwumbɔr aagbaŋ

Jeremia aah len Jerusalem aalirm aabɔr pu na

¹ Juda aabɔr Sedekia nan tun ni Malkia aajapɔɔn Pasur, ni Maaseya aajapɔɔn Sefania, u ye utotoor na m chee ke,

² “Ti gaŋ si ke aa len Uwumbɔr chee tibɔr tii timi, Babiloŋ Aabɔr Nebukadnesar ni waajab aah bi gob timi aatiŋ pu na pu. Nibaakan, Uwumbɔr ga tun waajinjiir aatuln libaa tii timi, ki cha Nebukadnesar gir upuwɔb.”

³ Le Uwumbɔr len m chee tibɔr, le m tuk baah tun ni bijab bi m chee na

⁴ ke bi ti bui Sedekia ke Israel yaab Aadindaan Uwumbɔr bui ke, “Sedekia, m ban m nyaŋ saajab bi bi jaa Babiloŋ aabɔr ni waajab kijaak na la. M ga kuun saajab aajawan bil kitiŋ aakaasisik ni.

⁵ M ga di maapɔɔn mɔmɔk, ni maaŋuusakpeln na mɔmɔk jan si kijaak.

⁶ M ga ku unii umɔk bi kitiŋ kee ponn ni na; m ga di iween i bir na le ku binib ni tiwakor mɔmɔk.

⁷ Sin ma kan, aa ni saaninkpiib, ni binib bi ŋmar butɔb, ni nkon, ni iween ngbaan ni na, m ga cha Ubɔr Nebukadnesar, ni nimi aadim bi ban bi ku nimi na chur nimi. Nebukadnesar ga ti ku nimi. Waan di cha ni ponn ni ubaa, kaan san ubaa kinimbaak. Min Uwumbɔr le len kina.”

⁸ Le Uwumbɔr ki bui mi ke m tuk binib ngbaan ke, “Li pel man, min Uwumbɔr ban ke ni lee isan ilee yee ponn ni mubaa la; nsan mu cha limɔfal ni na, ni nsan mu cha nkun ni na.

⁹ Unii umɔk gaar kitiŋ ngbaan ni na ga kpo butɔb, ni nkon, ni iween ni. Le uma nyan ki ti di ubaa tii Babiloŋ aanib bi bi tak kitiŋ ngbaan na kan, waan kpo, u ga ŋmar.

¹⁰ M siin ke maan cha kitiŋ kee ŋmar, m siin ke m kuln ki la. M ga di ki tii Babiloŋ yaab aabɔr le u see ki mmii. Min Uwumbɔr le len kina.”

Juda aanaanjirb aah ga kan ntafadaan mu na

^11-12 Uwumbɔr nan ki bui mi ke m di tibɔr timina tuk Juda aanaanjirb, bi ye Ubɔr David aayaabitiib na ke: “Li pel man, min Uwumbɔr aah kpa pu m len na. Cha ni li ye nimi aatuln ke ibamɔn li bi idaa mɔmɔk. Sil man unii u uken bi ji u na aapuwɔb. Ni yaa kaa ŋa kina kan, titunwanbir ti ni tun na ga cha maaŋuul fii ki wu ke mmii mu baan ŋmaa junn mu na.

¹³ Nimi Jerusalem yaab ka ŋibɔrjal paab, le tifatann bi ni taab, le ni bi ke litakpal li ŋub kitiŋ ki dɔ taar na aah bi pu na. Le m ga jan nimi kijaak. Ni bui ke ubaa aan ŋmaa tak nimi, kaan ŋmaa bɔ nimi aajab ni ki jer.

¹⁴ M ga daa nitafal naah tun pu na pu. M ga see nimi aabɔrchiln mmii, le mmii ngbaan ga wu tiwan ni mɔmɔk duun li na. Min Uwumbɔr le len kina.”