Jeremia 20 - Uwumbɔr aagbaŋ

Jeremia ni utotoor Pasur aajaak

¹ Imer aajapɔɔn Pasur, u nan ye bitotoorb bi bi Uwumbɔr Aadichal ni aayidaan na aah ŋun maah bi mooni tibɔr ngbaan na,

² le u bui ke bi gbaa mi, ki di tikululn baa mi kaan mbisamɔb mu bi Uwumbɔr Aadichal chee, aan bi yin mu ke Benjaminn Aabisamɔb na.

³ Kitaak aah woln aan Pasur cha bi chuu baar mi lii na, le m bui u ke, “Uwumbɔr le aa nan yin si ke Pasur. Waah nan tii si liyimbil li na le ye ke ‘Ijawaan bi ni kookoo.’

⁴ Uwumbɔr ubaa le len ke, ‘M ban m cha aa li ye ijawaan aawan ki tii sin aabaa ni aajɔtiib la, le baadim ga di kijaak aajum ku bi aanimbil ni. M ga di Juda aanib mɔmɔk di ŋa Babiloŋ aabɔr aapɔɔn ni; u ga chur bibaa tinaagbiir buen waatiŋ pu, le ki ku biken mu.

⁵ M ga ki cha baadim nan gaa kitiŋ kee aawangol mɔmɔk mpɔɔn, ki gaa kaawan mɔmɔk, ni ikpaakon, hali ki gaa Juda aabɔrb aawangol, ki di ni mɔmɔk buen Babiloŋ aatiŋ ni.

⁶ Sin Pasur ma, ni saadichal kan, bi ga chur ni mu tinaagbiir buen Babiloŋ aatiŋ ni. Nima chee le aa ga ti kpo le bi sub sin ni aajɔtiib bi mɔmɔk aa nan geei inyamɔn pam tuk bi na.’”

Jeremia aah di waabɔr tuk Uwumbɔr pu na

⁷ Uwumbɔr, aa ŋmann mi la, ki nan sil ŋmann mi. Aa pɔɔ ki jer mi, le ki nyaŋ mi. Unii mɔmɔk laa mi la, bi ŋani mi yaansara le nwiin ti lir.

⁸ M yaa ban m len tibɔr n‑yoonn mɔmɔk kan, m tar ke, “Kijaak, libiil.” Uwumbɔr, maah joo saabɔr mooni na pu, le bi lik mi fam, ki ŋani mi mbɔnyun.

⁹ Le m yaa tee bui ke, “M ga suln Uwumbɔr bɔr, kaan ki len tibɔr waayimbil pu” kan, le saabɔr bi ke mmii na ki wu nsui ni. M pɔɔni mbaa ke m taa len ti, le kaa ti ki ŋmaa joo ti.

¹⁰ M ŋun binib mɔmɔk looni len ke, “Ijawaan aabɔr bi ni mɔmɔk la. Cha ti di waabɔr buen bininkpiib chee man.” Hali njɔtiibamɔm ka kiir maalirm la. Bi len le ke, “Nibaakan ti ga ŋmaa ŋmann u, le ki chuu u ki teen u.”

¹¹ Uwumbɔr, le si ma si mpuwɔb, ki kpa mpɔɔn ni linyaŋ, le binib bi muk mi na ga lir. Baah kaan kan baah ban pu na, le ga cha bi kpaln binimɔɔnib ki ti saa n‑yoonn mu kaa kpa ndoon na.

¹² Uwumbɔr Mpɔɔnsakpiindaan, le aa ma joo ibamɔn tɔŋni binib, aa nyi tiwan ni bi bisui, ni baalandak ni na. Kina pu na, cha m kan saah ga teen maadim pu na, ba pu? m di maabɔr ŋa sin le aaŋaal ni.

¹³ Gaa ilahn tii Uwumbɔr man. Pak Uwumbɔr man. U gaal bigiim titunwanbirdam chee lir.

¹⁴ Puun lii nwiin mundaal bi nan ma mi na pu. Suln nwiin mundaal nna nan ma mi na bɔr.

¹⁵ Puun lii uja u nan ti bui nte ke, “Ni ye ubijabo la, aa kan ubijabo,” ki cha usui piir na pu.

¹⁶ Cha u li bi ke ntim mu Uwumbɔr kuln mu, kaa san mu kinimbaak na. Cha u li ŋun iween aawiil pu kichakpiik ni ki ŋun butɔb aakuun pu nwiin aakaasisik ni,

¹⁷ waah kaa nan ku mi nna aaponn ni pu na pu. Tɔ, nna aaponn ni le ba ga li ye maakaakul.

¹⁸ Bi nan ma mi ke m nan ŋa ba? Bi nan ma mi ke m nan li bi tibɔr, ni kinimbaak ŋmeen ni, le ki ti kpo nnimɔɔnkun aa?