Jeremia 2 - Uwumbɔr aagbaŋ

Uwumbɔr aah neen Israel yaab pu na

¹ Uwumbɔr nan bui mi ke m di tibɔr tee

² moon tuk Jerusalem yaab mɔmɔk. “M teer saah nan laa par ki kpa gaakii pu na, ki teer saah nan laa mɔn tichar ki gee mi pu na; aa nan dii mi nteersakpiin ni, kitiŋ ki ponn ni ubaa aa kee bun tijikaar na.

³ Israel yaab, ni ye min baanja yaab la; ni nan ye maawangokpaan la. M nan cha unii umɔk tii nimi titotonn na kan falaa ni iween. Min Uwumbɔr le len kina.”

Israel yaab aayaajatiib aatunwanbir

⁴ Nimi Jakob aayaabitiib, Israel aanibol, pel Uwumbɔr aabɔr man.

⁵ Uwumbɔr bui ke: “Ngalm mulamu aan niyaajatiib nan di galn mi? Ba nan cha bi fenn bipuwɔb tii mi? Bi nan dooni ŋiwaa ŋi kaa bi tibaa ni na le ki mu kpaln maabitibaanidam bibaa.

⁶ Bitafal aa nan bi m ni, hali maah nan nyan ni bi Ijipt aatiŋ ni, ki di bi bɔ dii kipɔɔk ni, kitiŋ ki ye nteersakpiin, ni litambol, ki kuur ki kpa tiwanbir aan ubaa aa koo nima na; aan ubaa mu aa chuun nima chee na, bitafal aa nan bi m ni.

⁷ M nan joo ni bi kitiŋ ki nyuun na pu, ke bi nan ji kaajikaar ni kaawamɔɔn mɔmɔk. Le bi labr ki ŋa maatiŋ tijɔŋ; bi bii kitiŋ ki m nan di tii bi na.

⁸ Bitotoorb aa nan ŋmaa baa ke, ‘Uwumbɔr bi la chee?’ Min mbaa aatotoorb aa nan nyi mi. Bitinjoob nan yii mi ki nyan mpuwɔb; le maabɔnabtiib nan joo uwaaja Baal aayimbil le nabr tibɔr ki dooni ŋiwaa ŋi kaa bi tibaa ni na.

Uwumbɔr aah kpa tibɔr ti waanib pu na

⁹ “Le min Uwumbɔr ga ki len maanib aah ŋani pu na. M ga tii biyaabitiib ngalm.

¹⁰ Buen liwilir wɔb, Saiprus aadikl pu man, ki tun ubaa buen liwipuul wɔb, Kedar aatiŋ ni. Ni ga kan ke kina aawan aaboln aa kee ŋa.

¹¹ Litimbol libaa aa kee kpeln laawaa ŋi kaa ye nibaa na, le maanib ma di min Uwumbɔr u tii bi liyimbil na kpeln ŋiwaa ŋi kaan ŋmaa ŋa nibaa tii bi na.

¹² Kina pu le m bui kitaapaak ke ki dam aan ni li kpa ijawaan, ki li kpa iwaan ni lijinjiir,

¹³ maanib aah tun titunwanbir tilee ti na pu. Bi fenn bipuwɔb tii mi, ni bi ke bi yii uyayak aanyunbun mu aanyun ŋan na, le ki gbii bibaa aabun ŋi kpa iween, kaan ŋmaa joo nnyun na.

Israel yaab aah kaa kpa gaakii pu na

¹⁴ “Israel yaab aa ye binaagbiib; baa nan ma bi lii tinaagbiir ni. Tɔ, ni ŋa kinye aan baadim tee mban ki ban bi?

¹⁵ Bi ŋuuni bi pu ke ichinn na la; bi cha baatiŋ kpaln nteersakpiin, le baatim kpaln tilangbenn, ubaa aa ki bi mu ponn ni.

¹⁶ Mbamɔn, bijab bi nyan ni Ijipt aatim Memfis ni Tapanes na gbaa wiil biyil a.

¹⁷ Israel yaab, nimi le joo ni nimina niyil pu. Ni yii min, Nidindaan Uwumbɔr, buyoonn m nan cheeni nimi cha na.

¹⁸ Ni dak ke ni yaa gir buen Ijipt aatiŋ ni ki ti nyun Nail aamɔɔl ponn ni aanyun kan, ni ga kan ba aanyoor? Ni dak ke ni yaa buen Asiria ki ti nyun Yufrates aamɔɔl aanyun kan, ni ga kan ba aanyoor?

¹⁹ Nimi nibaa aatunwanbir le ga daa nitafal, le naah fenn nipuwɔb tii mi pu na ga bii nimi. Ni ga bee ke ni yaa yii min Nidindaan Uwumbɔr, kaa ki tii mi naadii kan, naa ŋan, ki mu ga li wu. Min, Nidindaan Uwumbɔr Mpɔɔnsakpiindaan le len kina.”

Israel yaab aah yii kaa dooni Uwumbɔr pu na

²⁰ Tidindaan Uwumbɔr le len ke, “Israel yaab, naah yii maamɔb na, ni yunn pam; ni yii, kaa kii maamɔb, kaa dooni mi. Ni dooni ŋiwaa ŋi ni bui ke ŋi kpa timar na ŋigongon ŋi paa na pu, ni bususoom mɔmɔk taab.

²¹ M nan bun nimi ke lisubinyaan li aasub ga li ŋan na la. Tɔ, lik naah tun pu na. Ni naahn ŋisubil aasub bu bur na la.

²² Hali ni yaa di bukiib bu ŋun njeen mbamɔm na fu nnyun kan, m ga li beenin waa nimi aajɔŋ aataani.

²³ Ni ga ŋa kinye ki bui ke naa bii nibaa, ki len ke naa kee doon liwaal Baal? Lik naah nan tun titunwanbir ti kifataŋ ni na; lik naah tun pu na. Ni naahn timoor ni aalaakumii u ban u jon ki san yɔl yɔl,

²⁴ ki san kpak nteersakpiin ni na la. U yaa ban u jon kan, ŋma ga ŋmaa chuu u? Laakumiija u ban u jon u na aan ŋa falaa ubaa; n‑yoonn mumɔk u ban u jon na kan, u kani u.

²⁵ Israel yaab, naah bi san ban ŋiwaa pu na le cha nitaa deer, le nineen ni mu kuur. Le ni bui ke, ‘Aayii. Taan ki fenn tipuwɔb. Ti gee ŋiwaa aabɔr pam, le ki ga li san dii ŋi.’”

Israel yaab ŋeer ntafadaan

²⁶ Uwumbɔr bui ke, “Nimi Israel aanib, ni nimi aabɔrb, ni bininkpiib, ni nimi aatotoorb, ni bibɔnabtiib mɔmɔk ga ji inimɔɔn ke baah chuu unaayuk kan, u ji inimɔɔn pu na la.

²⁷ Sin u bui ke aate ye busub, le litakpal mu ye aana na ga ji inimɔɔn. Naah fenn nipuwɔb tii mi, kaa fenn ki dii mi pu na, le ga cha kina ŋa. Le ni yaa tee bi tibɔr ni kan, ni bui ke m dan nan gaa nimi lii.

²⁸ “Naah naan ŋiwaa ŋi tii nibaa na bi la chee? Ŋi yaa ga ŋman kan, ni cha ŋi nyan nimi tibɔr ni buyoonn ni bi ti ni na. Juda aanib, naah kpa ntim sakpen pu na, kina le ni kpa ŋiwaa mu.

²⁹ Nimi aabɔr ti muk nimi na ye kinye? Ba ŋa ni nyan mpuwɔb?

³⁰ M daa nitafal, le naa ŋa nimi nibaa; naan kii ke m sur nimi. Ni ku maabɔnabtiib ke uchinn u aaŋuul fii na la.

³¹ Israel aanib, li pel maah len pu na man. M bi ke nteersakpiin mu bɔɔn ki kpa tiwanbir na le ni chee ee? Tɔ, ni ŋa kinye aan ni bui ke ni ga ŋa naah gee pu na, ke naan ki gir ni m chee kpala?

³² Upiisapɔɔn ga ŋmaa suln waaleenyaan pu uu? Ubɔndinn mu ga ŋmaa suln waakekenyaan pu uu? Le maanib ma aah suln m pu pu na, saan ŋmaa kahn iwiin ngbaan.

³³ Ni sil nyi naah ga ban bɔtiib pu na. Hali bipiib bi joo bibaa kooh na ga ŋmaa bae ni chee.

³⁴ Bigiim ni maa‑kpa‑taani‑dam aasin le bi nimi aawanpeenkaan pu, naa ye binaayukb aasin. “Le nimina mɔmɔk aapuwɔb na,

³⁵ ni bui ke, ‘Taa tun taani ubaa. Mbamɔn, Uwumbɔr aaŋuul aan ki fii ti pu.’ Le min Uwumbɔr ga daa nitafal, naah bui ke naa tun taani ubaa pu na.

³⁶ Ni di nibaa ŋa dafir aanib, naah chuun dii ŋitimbol ŋiken aawaa pu na pu. Ijipt yaab ga jinn nimi inimɔɔn ke Asiria yaab aah nan ŋa nimi pu na.

³⁷ Ni ga di inimɔɔn le fenn nipuwɔb tii Ijipt yaab. Min Uwumbɔr le yii naah tii binib bi naadii na; naan kan tinyoor tibaa bi chee.”