Jeremia 19 - Uwumbɔr aagbaŋ

Libuul li wii na aabɔr

¹ Uwumbɔr nan bui mi ke m buen ti daa tiyakr aabuul. U nan ki bui mi ke m cha binib ngbaan aayidam bibaa, ni bitotoorb bi por na bibaa li dii mi,

² aan m di bi dii mbisamɔb mu bi yin mu ke Kisanjaŋ Aabisamɔb na, ki di buen Hinom Aafataŋ ni. Nima chee le m ga ti di waah ga di waabɔr ti tuk mi na nabr bi.

³ Uwumbɔr nan bui mi ke m len ke, “Juda aabɔrb, ni Jerusalem aanib, li pel man, min Uwumbɔr Mpɔɔnsakpiindaan, u ye Israel yaab Aawumbɔr na aah kpa pu m len na. M ban m joo ni tibɔbir nan lii libuul lee pu, le unii umɔk ŋun ti pu na aapobil ga yuk.

⁴ Binib ngbaan aah fenn bipuwɔb tii mi ki bii do, ki toor kitork tii ŋiwaa ŋi bima bibaa, ni biyaajatiib, ni Juda aabɔrb aa nan nyi ŋibɔr kpala na pu, le ga cha m ŋa kina. Binib bi kaa kpa taani ubaa na aasin le bi di bii do,

⁵ le ki maa liwaal Baal aabimbin ke bi li joo baabim toor kitork ki seer mmii ni ŋipaab tii li. Maa nan bui bi daalbaadaal ke bi ŋa kina; kina aa nan kpaan koo n‑yil ponn ni.

⁶ Kina pu na, n‑yoonn ga fuu ni le baan ki yin do ke Tofef, bee Hinom Aafataŋ. Bi ga li gur yin do ke Linikul Aafataŋ ni la.

⁷ Do le m ga bii Juda ni Jerusalem aanib aalandak mɔmɔk. M ga cha baadim nyaŋ bi, ki ku bi butɔb ni. Le m ga di ŋinikpol ngbaan tii inyoon, ni ipeel, i di ŋa tijikaar.

⁸ Maah ga joo ni tibɔbir ti nan lii do na ga ŋa unii umɔk jer do na lijinjiir ni iwaan.

⁹ Bidim ga gob kitiŋ ngbaan ki ban ke bi ku kaanib. Baah ga gob ki pu na ga li bir sakpen, le binib bi bi ki ponn ni na ga ŋmɔ tɔb ki kpaan ŋmɔ bibaa aabim.”

¹⁰ Uwumbɔr nan ki bui mi ke m di libuul na yu wii bijab bi dii mi buen na aanimbil ni,

¹¹ ki bui bi ke Uwumbɔr Mpɔɔnsakpiindaan len ke, “M ga wii kitiŋ kee, ni binib bee, aan ni li bi ke tiyakr aabuul lee aah wii pu kaan ki kpaan pu na. Binib aah kaan ki kan mpaan pu ki sub baanib na, bi ga sub binib Tofef Aafataŋ kee ni.

¹² M puu ke m ga ŋa kitiŋ kee, ni kaanib ke Tofef do na.

¹³ Jerusalem aadichal, ni Juda aabɔrb aadichal, ni ŋidichal ŋi mɔmɔk pu bi nan seer tulalee aayon tii iŋmabi, ni nin chee bi nan joo ndaan kpir tii ŋiwaa na mɔmɔk pu, ga li kpa tijɔŋ ke Tofef na la.”

¹⁴ Le m nan siir Tofef, nin chee Uwumbɔr nan tun mi ke m ti moon waabɔr na. M nan buen Uwumbɔr Aadichal aachiln ni le ki ti bui binib ngbaan ke

¹⁵ Uwumbɔr Mpɔɔnsakpiindaan, u ye Israel yaab Aawumbɔr na le len ke, “M ga cha ntafadaan dan kitiŋ kee, ni ntim mu bi gbɔk ki na pu, ke maah len ke m ga ŋa pu na, ba pu? bi kpa tafalaaŋun, kaa pel maah tuk bi pu na.”