Jeremia 18 - Uwumbɔr aagbaŋ

Jeremia aah bi uyakmaal do pu na

¹ Uwumbɔr nan bui mi ke,

² “Li cha uyakmaal na do, nima chee le m ga ti di maabɔr tuk si.”

³ Le m nan buen ki ti muin u ka maa waayakr.

⁴ U yaa bi maa aan tiyakr tibaa aa ti ŋan kan, u di tiyakr ngbaan ŋa waah gee pu na la.

⁵ Le Uwumbɔr ki bui mi ke,

⁶ “Maa kpa nsan ke m ŋa nimi Israel aanib ke uyakmaal ngbaan aah ŋani waayakr pu na aa? Ni bi ŋŋaal ni ke tiyakr aah bi uyakmaal aaŋaal ponn ni pu na la.

⁷ N‑yoonn mumɔk m bui ke m ban m ŋɔb, ki gbaa wiil, bee m bii litimbol, bee nnaan,

⁸ aan litimbol ngbaan yaa yii laatunwanbir kan, maan ki kuln li ke maah bui ke m ga ŋa li pu na.

⁹ Tɔ, m yaa ti ki bui ke m ŋum, bee m siin litimbol, bee nnaan,

¹⁰ aan litimbol ngbaan yaa ki tun titunwanbir kaa kii maamɔb kan, m ga yii, kaan ki ŋa maah bui ke m ga ŋa li tiŋann pu na.

¹¹ Tɔ, bui Juda ni Jerusalem aanib ke m bi kpokl bi pu la, le ki gor ke m daa bitafal. Bui bi ke bi di cha titunwanbir aabimbin, ki kpeln baabimbin, ni tiwan ni bi ŋani na.

¹² Bi ga gar ke, ‘Aayii, taan ŋa kina. Ti ga li beenin kpa tafalaaŋun, ki tun titunwanbir taah gee pu na la.’”

Binib ngbaan aah yii Uwumbɔr pu na

¹³ Uwumbɔr len ke, “Baa ŋitimbol mɔmɔk ke kina aawan kee ŋa aa? Israel aanib tun tibɔbir ti kaa ŋan na.

¹⁴ Lebanonn aajootakpal paab aa kee kɔŋ ŋitaanal. Lebanonn aajoo aakpen i soon na aa kee kuur daalbaadaal.

¹⁵ Le maanib ma suln mbɔr; bi seer tulalee aayon mmii ni tii ŋiwaa la. Bi gbeer nsan mu ponn ni bi ba ga dii mu na la, baa ki dii n‑yaajayoonn aasan na; bi chuun nsanbim mu baa daan mu na pu la.

¹⁶ Bi cha kitiŋ kee kpaln ijawaan aawan la, le binib mɔmɔk ga li lik bi fam n‑yoonn mɔmɔk. Unii umɔk jer nima na aasui ga yuk, waah ga kan tiwan ni na pu; bi ga li gbakr biyil iwaan pu.

¹⁷ M ga cha maanib yaa baadim chee, ke liwipuul wɔb aabuln aah daar titan pu pu na. M ga fenn mpuwɔb tii bi; maan ter bi buyoonn bi bi tibɔbir ni na.”

Baah kpokl Jeremia pu pu na

¹⁸ Le binib ngbaan bui ke, “Cha ti lik taah ga ŋa Jeremia pu na. Bitotoorb ga li bi n‑yoonn mɔmɔk ki mɔk timi, bilankpalb mu ga ŋmaa sur timi, bibɔnabr mu ga nabr Uwumbɔr aabɔr tii timi. Cha ti ban ngalm tii u man, ki taa ki pel waah len pu na.”

¹⁹ Le m mee limeel ke, “Uwumbɔr, pel maah len pu na ki ŋun maadim aah len maabɔr pu na.

²⁰ Tibir le bi joo pa tiŋann aa? Bi gbii libuul bil mi ke m nan lir li ponn ni. Teer maah nan dan aa chee ki nan gaŋ si bi pu ke aa taa daa bitafal saaŋuul ponn ni pu na.

²¹ Tɔ, Uwumbɔr, cha nkon ku baabim; cha bi kpoi butɔb ni. Cha baapiib lann bichatiib ni baabim; cha iween ku bijab, aan baanachipɔm mu kpoi butɔb ni.

²² Cha kinipaak nan loon bi ki gaa baawangol; cha ijawaan chuu bi aan bi wii mpɔɔn pu. Bi gbii libuul bil mi ke m nan lir li ponn ni, ki pen mi gaawɔb mam.

²³ Tɔ, Uwumbɔr, aa nyi baah kpokl pu ke bi ku mi na. Taa di baatunwanbir cha pinn bi, ki taa di cha baataani. Buyoonn saaŋuul fii na kan, mee bi lii ki nyaŋ bi.”