Jeremia 17 - Uwumbɔr aagbaŋ

Juda yaab aatunwanbir ni baatafadaan

¹ Uwumbɔr len ke, “Juda aanib, m di tikur aagbaŋmeemoon le ŋmee nimi aatunwanbir, m di litakpanyaan le lol ti nisui ni, le ki kɔr ti nimi aatork aabimbin aamɔgben.

² Nimi aanib dooni ŋiwaa kitork aabimbin chee, naah naan liwaapii Asera u na aanaŋ bususoom mɔmɔk taab, ni ŋigongon paab,

³ ni ŋijoo paab, ikpaakon ni. M ga cha nimi aadim nan yoor nimi aawangol ni nimi aawankpal buen, naah tun titunwanbir ti kitiŋ kee mɔmɔk pu na pu.

⁴ M ga di kitiŋ ki m nan di tii nimi na tii binib. M ga cha ni kpaln nimi aadim aatutum kitiŋ ki ponn ni naa nyi kaabɔr kpala na, ba pu? maaŋuul bi ke mmii na la, mu ga li wu kaan junn.”

Ŋimɔbon aabɔŋ

⁵ Uwumbɔr len ke, “M ga bii unii u fenn upuwɔb tii mi ki tee kpa unibɔn u ga kpo na aapɔɔn pu limakl na.

⁶ U naahn busub bu bi nteersakpiin ni, ki muuni kipɔɔk ki kuun na ni na la, ki bi kitiŋ ki pu nibaa aan ŋmaa li bi na. Tiwanyaan nibaa aa choo u chee.

⁷ Tɔ, m ga ŋa maanyoor ŋa unii u kpa m pu limakl na.

⁸ U naahn busub bu si gbɔk nkpen aan bu aanyaan cha nnyun chee na la. Nweel yaa choo kan, bu aa san ijawaan, ba pu? bu aafar aa kuur; utaal yaa kaa nun kan, butafal aa bi nibaa ni, le ki beenin lu ŋisubil.

⁹ Ŋma ga ŋmaa bee unibɔn aasui? Tiwan nibaa aa bi ki ŋmaa ŋmanni ke unibɔn aasui na; ubaa aan ŋmaa bee mu aah bii sakpen pu na.

¹⁰ Min Uwumbɔr le lik unii aalandak ni le ki tɔŋni binib aasui lik. M ŋani unii mɔmɔk, waabimbin aah bi pu na la, ni udaan aah tun pu na.”

¹¹ Unii u joo beebee kani ŋimombil na bi ke unyoon u kaal ŋijen ŋi waa too ŋi na la. U ga laa li ye unachipɔɔn le ki lann waawangol, le waadoon na, u ga kpaln ujɔr.

¹² Timi Aawumbɔr Aadichal naahn libɔrjal li kpa kipak ki si lijool li paa sakpen na pu ki nyan ni mpiin na la.

¹³ Uwumbɔr, sin le ye Israel yaab aamakl; binib bi mɔmɔk yii si na ga nan ji inimɔɔn. Bi ga wɔŋ ke ŋiyimbil ŋi bi ŋmee ŋi titan ni na la, ba pu? bi yii si Uwumbɔr u bi ke nnyunbun mu tii limɔfal na.

Jeremia aah mee Uwumbɔr ke u ter u pu na

¹⁴ Uwumbɔr, tii mi laafee aan m pɔɔk kookoo; gaa mi lii aan m kan limɔfal. Sin le m pak.

¹⁵ Le binib ngbaan bui mi ke, “Uwumbɔr aah faani timi pu na bi la chee? Cha u ŋa waah faani timi pu na.”

¹⁶ Tɔ, Uwumbɔr, maa kee muk si ke aa joo ni tibɔbir nan lii bi pu; maa ban ke tibɔr kan bi. Uwumbɔr, aa nyi kina; aa nyi maah len pu na.

¹⁷ Taa cha m li san si ijawaan; tibɔr yaa fuu ni kan, aa chee le m bɔrni.

¹⁸ Uwumbɔr, cha binib bi muk mi aa pu na ji inimɔɔn, ki tee cha m ŋmar. Cha ijawaan chuu bi, ki taa tee faan m ma. Cha tibɔbir dan bi pu ki kool bi yuk yuk.

Likpaakool daal aajoom aabɔr

¹⁹ Uwumbɔr nan bui mi ke, “Jeremia, li cha ki di maabɔr moon Binib Aabisamɔb, mu Juda aabɔrb diir koo ki diir nya kitiŋ ni na chee; ki nin buen ibisamɔi imɔk bi Jerusalem aatiŋ ni na chee.

²⁰ Tuk bibɔrb, ni Juda aanib, ni binib bi mɔmɔk koo Jerusalem ni ki diir ibisamɔi yee na, ke bi li pel maah len pu na.

²¹ Bui bi ke bi yaa gee baamɔfal kan, bi taa tun lituln libaa Likpaakool daal; bi taa dii Jerusalem aabisamɔb mubaa ki tu lituln,

²² ki taa li tu tiwan nibaa ki nya baadichal ni Likpaakool daal; bi taa tun lituln Likpaakool daal, bi li joo mu ke mu ye nwinyaan la, ke maah nan bui biyaajatiib pu na.

²³ Biyaajatiib aa nan ŋun tii mi, kaa pel kpala. Bi nan labr ye tafalaaŋundam, kaa kii maamɔb, ki mu aa bae m chee mbaem.

²⁴ “Bui binib ngbaan ke ni ye baatuln le ke bi kii maabɔr mɔmɔk. Likpaakool daal kan, bi taa tu lituln libaa ki dii kitiŋ kee aabisamɔi koo ki ponn ni. Bi li joo Likpaakool daal ke mu ye nwinyaan daal, ki taa tun lituln libaa.

²⁵ Baabɔrb ni mbɔrbim ga ŋmaa dii Jerusalem aabisamɔi ki li kpa nnaan aapɔɔn ke David aah nan kpa pu na. Juda ni Jerusalem aanib mɔmɔk ga koo itaan aatɔroku mam ni, ki diŋ itaan pu, le Jerusalem aatiŋ ga li gbii binib.

²⁶ Binib ga nya ni Juda aatim ni, ni Jerusalem aatingbaan ni ki dan; bi ga nya ni Benjaminn aapepel ni, ni taab aagongon ni, ki nya ni ŋijoo paab, ni Juda aaŋangii wɔb ki dan. Bi ga joo ni Maadichal ni ipiin i bi ga di see mmii ni na, ni kitork aapiin, ni njikaabim ni tulalee aayon aapiin, ki kpee idoon aapiin pu.

²⁷ See bi kii maamɔb, ki joo Likpaakool daal ke mu ye nwinyaan daal. Bi taa tu lituln libaa ki di dii Jerusalem aabisamɔi nwiin ngbaan daal; bi yaa ŋa kina kan, m ga see Jerusalem aabisamɔi mmii. Le mmii wu Jerusalem aabɔrchiln, le ubaa aan ŋmaa junn mu.”