Jeremia 16 - Uwumbɔr aagbaŋ

Uwumbɔr aah ban ke Jeremia li bi pu na

¹ Uwumbɔr nan ki len m chee tibɔr le ki bui ke,

² “Taa yoor upii, ki taa li kpa mbim do chee na.

³ M ga bui si tiwan ni ga ŋa baah ma mbim mu do na, ni bitetiib ni binatiib na.

⁴ Iween i bir sakpen na le ga ku bi, le ubaa aan li bi ki wii baakpuul, ubaa mu aan ki li bi ki sub bi. Ŋinikpol ngbaan ga li dɔ kitiŋ ke tinaabin na la. Butɔb ni le bibaa ga kpoi, le nkon ku biken mu, le ŋinikpol ngbaan ga li ye inyoon ni ipeel aajikaar.

⁵ “Taa koo lidichal li ponn ni binib bi wii likpuul na. Taa cha aasui bii ubaa pu. Maan ki ŋa nsuudoon aanyoor ŋa maanib pu, kaan ki di ngeehm ni kinimbaak mɔk bi.

⁶ Biwankpadam ni bigiim mɔmɔk ga kpo kitiŋ kee pu, ubaa mu aan sub bi, kaan wii baakpuul. Ubaa aan daan ubaa, kaan kuu uyikpir ki mɔk ke usui aa piin.

⁷ Ubaa aan kal uken chee u ji ki nyu ndaan, ki sɔŋ usui, ke baah gee unii u na yaa kpo kan, bi ŋani pu na. Ubaa aan san uken kinimbaak, ni yaa ye udaan ngbaan aate, bee una le yaa kpo kan, ubaa aan gar u.

⁸ “Taa koo lidichal li ponn ni binib bi ji njim na. Taa kal bi chee ke aa ji ki nyu nibaa.

⁹ Li pel, min Uwumbɔr Mpɔɔnsakpiindaan, u ye Israel yaab Aawumbɔr na aah kpa pu m len na. M ga ŋmin mpopiin ni mmɔɔn aafuuk, ni tibɔndinn aajim aafuuk na. Binib bi bi do na ga li bi ki nan kan nimina aah ga ŋa pu na.

¹⁰ “Aa yaa tuk bi timina mɔmɔk kan, bi ga baa si ke ba ŋa m ŋa kina aalandak ke m daa bitafal sakpen kina. Bi ga baa ke ba aatimbiil aan bi bii, ki baa ke ba aatunwanbir aan bi tun Bidindaan Uwumbɔr.

¹¹ Le aa ga bui bi ke Uwumbɔr bui ke, ‘Niyaajatiib nan fenn bipuwɔb tii mi, le ki dooni ki tun tii ŋiwaa. Bi nan yii mi, kaa kii maamɔkm.

¹² Le nimi ŋa tiwan ni bir jer niyaajatiib yaan na. Ni mɔmɔk kpa tafalaaŋun le ki tun titunwanbir, kaa kii maamɔb.

¹³ Kina pu na, m ga mee nyan nimi kitiŋ kee pu ki ti lii kitiŋ ki nimi ni niyaajatiib aa kee ŋun ki pu na ni. Nima chee le ni ga ti li tun tii ŋiwaa, nwiin pu ni kinyeek, le maan ki san nimi kinimbaak.’”

Binib aah ga nya tinaagbiir aatiŋ ni ki gir ni pu na

¹⁴ Uwumbɔr nan ki bui ke, “N‑yoonn choo le binib aan nan ki puu tipuur m pu, ke Uwumbɔr u bi, ki nan nyan ni Israel yaab Ijipt aatiŋ ponn ni na.

¹⁵ Bi ga li gur puur m pu, ke Uwumbɔr u bi, ki nyan ni Israel aanib ŋŋangan wɔb aatiŋ ni, ni ntim mu mɔmɔk ni m nan cha bi yaa ki ti bi mu ni na la. M ga giin ni bi baatiŋ pu, kitiŋ ki m nan di tii biyaajatiib na pu. Min Uwumbɔr le len kina.”

Ntafadaan mu choo na aabɔr

¹⁶ Uwumbɔr nan ki bui ke, “M bi tun ban bijanbam pam ke bi nan chur binib bee la, le ki tun yin ni bikpam pam, ke bi nan tee mban ki taa taa nyan ni bi lijool, ni ligongoln mɔmɔk paab, ni titakpalunn ni.

¹⁷ M waa tiwan ni mɔmɔk bi ŋani na. Nibaa aa bɔ m chee; nnimbil kani baatunwanbir mɔmɔk.

¹⁸ M ga cha bi pa paan baatunwanbir ni baabiin pu nfum mulee, ba pu? bi di ŋiwaa ŋi kaa fu ke linikpol na bii maatiŋ, le ki di ŋiwaa ŋi ye tiwan ni maa gee ŋaabɔr na gbiin ki ponn ni.”

Jeremia aah kpa limakl Uwumbɔr pu pu na aameel

¹⁹ Uwumbɔr, sin le kii mi ki tii mi mpɔɔn; aa ter mi tibɔr aayoonn. Ŋitimbol ga nya kitiŋ aanaanmɔk ki nan bui ke, “Tiyaajatiib nan kpa ŋiwaa baanja la, bi nan kpa ŋiwaa ŋi bi fam na baanja la.

²⁰ Unii ga ŋmaa naan ubaa Aawumbɔr aa? Aayii, u yaa naan u kan, waan li ye Uwumbɔr bamɔnn.”

²¹ Le Uwumbɔr bui ke, “Kina pu na, m ga cha ŋitimbol bee maah kpa mpɔɔn ni liyimbikpaan pu na; bi ga bee ke min le ye Uwumbɔr.”