Jeremia 14 - Uwumbɔr aagbaŋ

Nweel sakpiin aabɔr

¹ Uwumbɔr bui mi nweel aabɔr ke,

² “Juda aatiŋ bi wii ikpowiil la; kaatim bi kpo la, kaanib dɔ kitiŋ mpombiin pu la, le Jerusalem wii ki ban nterm.

³ Biwankpadam na tun baanaagbiib ke bi ti lu ni nnyun; le bi buen ŋibun ni, kaa ti kan nnyun; le ki tu ŋibukuun gir ni. Bilan ŋmal, le bitaakpab yɔl, le bi bɔrni.

⁴ Utaal aah kaa nun aan kitiŋ kuur na, bikpaab aasui bii, le bi bɔrni.

⁵ Timoor aah kaa bi pu na le upeemaninkpel siir cha waabipɔm timoor ni.

⁶ Le timoor ni aabon si ŋigongon paab ki fuur pɔkaa pɔkaa ke iŋɔk na, yaah kaa kan tijikaar pu na le yaa ki waa mbamɔm.

⁷ Le maanib wii yin mi ke, ‘Timi aatunwanbir galni timi la, Uwumbɔr, ter timi ke saah nan puu ke aa ga ŋa pu na. N‑yoonn n‑yoonn pam le ti fenn tipuwɔb tii si; ti tun si titunwanbir.

⁸ Sin baanja pu le Israel yaab mak; sin le nan nyan timi tibɔbir ni. Ba ŋa aa gur bi timi aatiŋ pu ke uchaan na, ki bi ke usachuln u ban u doon timi aatiŋ ni kinyeek kibaa baanja na?

⁹ Ba ŋa aa bi ke uja u tibɔr nan lir u na; ba ŋa aa bi ke uja u kaa ki kpa mpɔɔn ke u ter timi na? Uwumbɔr, ni sil ye mbamɔn ke aa bi ti chee. Ti ye saanib la, taa di timi lii.’”

¹⁰ Uwumbɔr len binib bee aabɔr ke, “Bi gee ke bi fenn bipuwɔb tii mi, le kaan chuu bibaa. Kina pu le nsui aa piin bi pu. M ga teer taani u bi tun na, ki daa bitafal baatunwanbir pu.”

¹¹ Uwumbɔr nan bui mi ke, “Taa bui mi ke m ter binib bee.

¹² Hali bi yaa lul bumɔb kan, maan pel baaterm aawiil; le bi yaa toor kitork ki see ki mmii ni tii mi, ki tii mi njikaabim aapiin kan, nsui aan piir bi pu. Maah ga ŋa pu na le ye ke m ku bi butɔb, ni nkon, ni iween ni.”

¹³ Le m bui ke, “Ndindaan Uwumbɔr, aa nyi ke saabɔnabtiib tuk binib ngbaan ke butɔb, bee nkon aan li bi, bi bui bi ke aa nan puu ke nsuudoon baanja le ga li bi timi aatiŋ pu.”

¹⁴ Le Uwumbɔr gar mi ke, “Bibɔnabr ngbaan joo maayimbil le geei inyamɔn; maa nan tun bi, kaa tii bi maamɔboln, kaa tii bi nsan mubaa. Tibɔkpiirkaan ti bi joo len na aa nyan ni m chee; baah len ke tiwan ni ga ŋa na aa kpa tinyoor, bima bibaa le dakl ti.

¹⁵ Min Uwumbɔr bui si tiwan ni m ga ŋa bibɔnabr bi maa nan tun bi aan bi di maayimbil len ke butɔb ni nkon aan dan kitiŋ kee pu na, m ga di butɔb ni nkon le ku bi.

¹⁶ Baah di tibɔr tee tuk binib bi na mu ga kpo nkun baan ngbaan la. Bi ga di baanikpol mae Jerusalem aatiŋ ponn ni, le ubaa aan li bi ki sub bi. Nimina ga ŋa bi mɔmɔk, bi ni bipuutiib, ni bijapɔtiib, ni bibisatiib. M ga cha bi pa baatunwanbir pu.”

¹⁷ Uwumbɔr nan bui mi ke m tuk binib ngbaan maapombiin aah bi pu na ki bui bi ke, “M wii nwiin pu ni kinyeek la, taa cha m di cha iwiil, maanib aah kan titotonn sakpen, ni iween i na pu.

¹⁸ M yaa nyan buen timoor ni kan, m kani binib bi bi ku bi butɔb ni na la; m yaa buen ntim ni kan, m kani nkon aah ku binib bi na la. Uwumbɔr aabɔnabtiib ni bitotoorb chuun tun baatun, le kaa tee nyi baah bi ŋani pu na.”

Binib ngbaan aah gaŋ Uwumbɔr pu na

¹⁹ Uwumbɔr, aa yii Juda aanib kookoo la aa? Aa nan Sionn aatiŋ aanib la aa? Ba ŋa aa tii timi titotonn ti kaan sɔŋ na? Ti nan lik ban nsuudoon, le kinyaan kibaa aa choo; ti nan ka ban laafee, le tibɔbir tee dan.

²⁰ Uwumbɔr, ti tun si titunwanbir; ti kpiir timi tibaa aatunwanbir pu le ki kpiir tiyaajatiib aatunwanbir mu pu.

²¹ Teer saah nan puu pu na ki taa lik seen timi; taa cha inimɔɔn dan Jerusalem pu, nin chee saapak aabɔrjal bi na. Taa bii tipuur ti timi ni sin nan puu tii tɔb na.

²² Ŋitimbol aawaal libaa aan ŋmaa cha utaal nu; kitaapaak kibaa aan ŋmaa cha titaapupur dan. Tidindaan Uwumbɔr, ti di timi aamakl ŋa sin ni la, ba pu? sin baanja le ŋani tiwan mɔmɔk.