Jeremia 13 - Uwumbɔr aagbaŋ

Ŋitanyaan aachutageln na aabɔr

¹ Uwumbɔr nan bui mi ke m buen ti daa ŋitanyaan aachutageln ki di yiin; ki ki bui mi ke m taa di u bɔ nnyun ni.

² Le m nan ti daa li ki di yiin.

³ Le Uwumbɔr ki len m chee ki bui ke,

⁴ “Li cha Peraf Aamɔɔl ni, ki ti di li bɔr kitakpaluŋ kibaa ni, nima chee.”

⁵ Le m buen ti di li bɔr Peraf aamɔɔl chee.

⁶ Naah joo cha na, le Uwumbɔr nan bui mi ke m gir buen Peraf Aamɔɔl chee, ki ti nyan ni lichutageln ngbaan.

⁷ M nan gir buen ki bee nin chee m nan di li bɔr na, le m kan ke li bii, kaa ki ŋan.

⁸ Le Uwumbɔr ki len m chee lelee. U nan bui ke,

⁹ “Kina le m ga bii Juda ni Jerusalem yaab aagaak sakpeŋ ngbaan.

¹⁰ Titunwanbirdam ngbaan yii kaa kii maamɔb. Bi beenin kpa mbiin ni tafalaaŋun ke baah nan bi pu na la, le ki dooni ŋiwaa, ki tun tii ŋi. Kina pu na, bi ga ŋa ke lichutageln lee aah kaa ki li bi tibaa ni pu na.

¹¹ M ba ban ke Israel ni Juda aanib mɔmɔk li bub joo mi kin kin ke lichutageln aah ŋeer kichaŋ sab pu na la. M nan ŋa kina ke bi li ye maanib ki joo ni kipak ni inyuŋ nan tii mi la; le bi yii kaa kii maamɔb.”

Lidabuul aabɔr

¹² Tidindaan Uwumbɔr nan ki bui mi ke, “Jeremia, bui Israel aanib ke ni ŋan ke lidabuul mɔk li gbii ndaan la. Bi ga bui ke bi nyi ke ni ŋan ke lidabuul mɔk li gbii ndaan.

¹³ Le aa ga bui ke min Uwumbɔr ga cha kitiŋ kee aanib mɔmɔk nyu ndaan ki ti gbii; bibɔrb bi ye David aayaabitiib na, ni bitotoorb, ni maabɔnabtiib, ni Jerusalem aanib mɔmɔk ga nyu gbii.

¹⁴ Le m ga di binib bi por na, ni bi kaa por na yur tɔb aan bi wiil ke ŋidabuu na. Kinimbaak, ni mpombiin, ni nsuugar mbaa aan kiir mi ke m taa ku bi.”

Jeremia aah sak binib bi kpa kigaak na pu na

¹⁵ Israel aanib, Uwumbɔr len a. Sunn nibaa taab man ki pel u chee man.

¹⁶ Nyuŋ Nidindaan Uwumbɔr man waahr aan u nin joo ni mbɔmbɔɔn, mu ga cha ni li gbeer ŋijoo paab ki cha nwiihn mu ni mak mu pu na kpaln mbɔmbɔɔn na.

¹⁷ Ni yaa kaan pel kan, m ga wii libɔɔl ni, nimi aagaak pu. Baah ga di Uwumbɔr aanib buen tinaagbiir ni pu na, m ga wii, le maanyunyunn ti li puu.

¹⁸ Le Uwumbɔr bui mi ke, “Bui ubɔr ni una ke bi fii baabɔrjal pu, ba pu? baabɔryikpupur ti ŋan sakpen na chikr lir kitiŋ a.

¹⁹ Bidim gob Juda aatim mu bi ŋŋangii wɔb na; ubaa aan ŋmaa bɔ bijab ni ki ti fuu bi chee. Bi di Juda aanib mɔmɔk buen tinaagbiir ni a.”

²⁰ Jerusalem aatiŋ, lik, saadim le nyan ni ŋŋangan wɔb ki choo na. Binib bi bi di ŋa aaŋaal ni na bi la chee, saanib bi aa nan mak bi pu sakpen na bi la?

²¹ Binib bi aa nan dak ke bi ye aajɔtiib na yaa nan nyaŋ si ki joo si kan, aa ga len kinye? Aa ga nan li bi iween ni, ke upii u ban u maa na la.

²² Aa yaa nan baa ke ba ŋa nimina ŋa si, le saakeken kar kar aan bi chuu si mpɔɔn ki doon aa chee kan, aa li nyi ke saatunwanbir nyaŋ sakpen a.

²³ Unii u aawon bɔn na ga ŋmaa kpeln ti ŋa ti man na aa? bee upeenaamuun ga ŋmaa nyan uwon aah tuur tuur pu na aa? Bi yaa ga ŋmaa ŋa kina kan, nimi bi tun titunwanbir ŋmeen na mu ga ŋmaa kpeln ki ŋa ni ŋan na.

²⁴ Uwumbɔr ga yaa nimi ke nteersakpiin ni aabuln aah daar timoor yaani pu na la.

²⁵ U bui ke nimi aadoon le ga li bi na. Waah siin ke u ga ŋa nimi pu na le na, ba pu? ni suln ubɔr le ki di naadii tii ŋiwaa.

²⁶ Uwumbɔr ubaa le ga gbabr nimi ki cha nimi niŋmeen.

²⁷ U kan nimi, ni tun tijɔŋ aatuln. U kan naah chuun ban ŋiwaa ŋigongon paab, ni ikpaakon ni, ke uja aah neen uŋeen aatɔ aapuu pu, bee utanja aah neen utaninkpel pu na. Jerusalem aanib, nimi aamɔfal junn a. Bayoonn aan ni mu ga ŋaŋ?