Jeremia 11 - Uwumbɔr aagbaŋ

Uwumbɔr aah puu tipuur ti na

¹ Uwumbɔr nan bui mi ke,

² “Li pel tipuur ngbaan aabɔr aah ye pu na. Bui Juda ni Jerusalem aanib

³ ke min, Israel yaab Aadindaan Uwumbɔr le puun lii unii umɔk aa kii tipuur ngbaan aah len pu na pu.

⁴ Ti ye tipuur ti m nan puu tii biyaajatiib, buyoonn m nan nyan ni bi Ijipt aatiŋ ki nan bi ke mmii sakpiin ki tii bi na ni. M nan bui bi ke bi kii maamɔb ki li tun maah bui bi pu na mɔmɔk. M nan bui bi ke bi yaa keei maamɔb kan, bi ga li ye maanib, le m li ye Baawumbɔr.

⁵ Le m ga li joo tipuur ti m nan puu tii biyaajatiib, ke m ga tii bi kitiŋ ki kpa tiwakor aamoŋmɔpaan ni ŋisubil sakpen na, aan bi kpa ki dandana wee na.” Le m bui ke, “Een, Uwumbɔr.”

⁶ Uwumbɔr nan ki bui mi ke, “Buen Juda aatim, ni Jerusalem aatiŋ ponn ni. Moon maabɔr nima ki bui binib ngbaan ke bi pel maah puu tipuur ti na tii bi, ki kii maamɔb.

⁷ Maah nan nyan ni biyaajatiib Ijipt aatiŋ ni na, m nan sak bi mbamɔm ke bi kii maamɔb, le ki beenin sakr bi ki nan saa din wee.

⁸ Le bi nan yii, kaa pel, kaa ki kii maamɔb mu. Bi mɔmɔk nan yii, ki beenin kpa tafalaaŋun, ki tun titunwanbir cha. M nan bui bi ke bi li joo tipuur ti m puu tii bi na, le bi yii. Kina pu le m nan cha ntafadaan mu bi tipuur ngbaan ni na dan bi pu.”

⁹ Uwumbɔr nan ki bui mi ke, “Juda ni Jerusalem aanib bi kpokl m pu la.

¹⁰ Bi gir buen biyaajatiib bi nan yii maah bui bi ke bi tun pu na aatunwanbir ni la; bi nan dooni ŋiwaa la. Israel ni Juda yaab mɔmɔk bii tipuur ti m ni biyaajatiib nan puu tii tɔb na.

¹¹ Tɔ, le min Uwumbɔr sak bi ke m ga cha libiil dan bi pu, le baan ŋmar. Bi yaa wii yin mi ki ban nterm kan, maan pel bi chee.

¹² Le Juda ni Jerusalem aanib ga buen ŋiwaa ŋi bi toor kitork tii ŋi na chee, ki ti wii ban nterm. Tɔ, ŋiwaa ngbaan mu aan ŋmaa ter bi libiil ngbaan aayoonn.

¹³ Juda aanib aawaa wiir ke baatim aah wiir pu na la, le Jerusalem yaab maa ŋibimbin tii tijɔŋ aawaal Baal, baatiŋ ni aasanbim mɔmɔk ni.

¹⁴ Jeremia, taa mee limeel tii binib ngbaan, taa gaŋ mi bi pu. Bi yaa bi tibɔr ni ki yin mi ki ban nterm kan, maan gar bi.”

¹⁵ Uwumbɔr nan ki bui ke, “Binib bi m gee bi na le bi tun titunwanbir na. Baa kpa nsan ke bi li bi Maadichal ponn ni. Bi dak ke bi yaa puur tipuur ki joo tiwakor toor ipiin aatork kan, bi ga ŋmaa nya tibɔbir ni la aa? Nima ngbaan aan ŋmaa tii bi mpopiin.

¹⁶ N‑yoonn mubaa m nan yin bi ke olif aasub bu kpa tifar mbamɔm ki lu ŋisubil ŋi ŋan na la; tɔ, dandana ma kan, mmii ga dam ke utaal aah gbenni pu na, le mu wun tifar ngbaan, ki kool ibon lii kitiŋ.

¹⁷ “Min Uwumbɔr Mpɔɔnsakpiindaan le nan bun Israel ni Juda yaab; tɔ, n‑yoonn mue ma kan, m ban m joo ni tibɔbir le nan lii bi pu. Baah tun taani pu na le bi joo ni kina nan lii bibaa pu; bi toor kitork tii liwaal Baal, le ki cha maaŋuul fii bi pu.”

Baah kpokl ke bi ku Jeremia pu na

¹⁸ Uwumbɔr nan bui mi maadim aah nan bi kpokl m pu pu na.

¹⁹ M nan bi ke upihbo u kii udindaan aamɔb aan bi joo u cha bi ti ku u pu na la, le kaa nan nyi ke min pu le bi bi kpokl tibɔbir. Bi nan bi len le ke, “Cha ti gaa busub ngbaan lii, buyoonn bu laa soon na, cha ti ku u aan ubaa taa ki teer ubɔr.”

²⁰ Le m mee limeel ke, “Uwumbɔr Mpɔɔnsakpiindaan, aa ji binib tibɔr ibamɔn pu la; aa tɔŋni binib aalandak ni bisui. M di maabɔr ŋa aaŋaal ni, kina pu na, m ga li ka le ki lik saah ga teen binib ngbaan pu na.”

²¹ Maatiŋ Anatof aajab bibaa nan ban ke bi ku mi, le ki bui mi ke m yaa beenin mooni Uwumbɔr aabɔr kan, bi ga ku mi.

²² Le Uwumbɔr Mpɔɔnsakpiindaan bui ke, “M ga daa bitafal. Baanachipɔm ga kpoi butɔb ni, le nkon mu ku baabim.

²³ M siin n‑yoonn mu tibɔbir ga pii ni Anatof aanib na, le n‑yoonn ngbaan yaa nan fuu ni kan, bi ponn ni ubaa aan ŋmar.”