Jeremia 10 - Uwumbɔr aagbaŋ

Ŋiwaa aadoon, ni Uwumbɔr aadoon aabɔr

¹ Israel yaab, li pel man Uwumbɔr aah kpa tibɔr ti u tuk nimi na.

² U bui ke, “Taa dii ŋitimbol ŋiken aasan man, taa cha wayɔlyɔl ni ŋani kitaapaak na li muk nimi, ke naah cha ijawaan chuu ŋitimbol ŋiken pu na.

³ Binib bimina aah dii isan i na ye fam la. Busub le bi ga gaa kichook ni, le ukpikpiir aachɔkm kpir bu,

⁴ le bi di tikunabr ni salmaa ŋaŋ bu, le ki di ikupiin kpaa chuu bu aan bu taa ŋmaa lir kitiŋ.

⁵ Kina aawaa bi ke baah naan tiwan siin kisaak ni ke tiwakorkaan taa dan nan bii tijikaar pu na la. Ŋaa ŋmaa len tibɔr, kaa ŋmaa chuun, see unii le ga yoor ŋi buen waah gee nin chee na. Taa san ŋi ijawaan man, ŋaan ŋmaa ŋa nimi nibaa, kaan ŋmaa tii nimi tinyoor tibaa.”

⁶ Uwumbɔr, ubaa aa bi ke sin na; saapɔɔn nyaŋ sakpen a, le saayimbil nyuun ki kpa mpɔɔn.

⁷ Ŋma aan nyuŋ si u ye ŋitimbol mɔmɔk aabɔr na? Aa ŋeer bunyuŋ la. Bilandam ni bibɔrb bi mɔmɔk bi ŋitimbol ni na ubaa aa bi ke sin na.

⁸ Bi mɔmɔk jɔr le ki ye bilatiirb. Baan ŋmaa bae nibaa ŋiwaa chee, ŋi ye ŋisugen la.

⁹ Bi di Speenn aatiŋ aakunabr le ki boon baawaa ngbaan le ki di Ufas aatiŋ aasalmaa mu boon ŋi, nimina mɔmɔk ye uwanŋar aatuln la; bi joo nsiin ni ŋitan ŋi man chauŋ aan ukpaluul u nyi sakpen na luu ŋi na le peeni ŋi.

¹⁰ Tɔ, sin Uwumbɔr le ye Uwumbɔr bamɔnn, sin le ye Uwumbɔr u bi na, le ki ye ubɔr u bi n‑yoonn mɔmɔk na. Saaŋuul yaa fii kan, dulnyaa deŋni la; ŋitimbol aan ŋmaa sil saaŋuul chee.

¹¹ Tɔ, nimi le ga bui bi ke ŋiwaa le aa nan naan taab ni paacham; ŋi ga nan kuln. Ŋaan nan ki li bi dulnyaa wee ni nibaa chee.

Nlahn mu pak Uwumbɔr na

¹² Uwumbɔr di waapɔɔn le naan kitiŋ; waalan le u di naan dulnyaa wee, le ki taln paacham.

¹³ U yaa len kan, le nnyun mu bi kitaapaak na ŋuuni ke uchinn na; u nyani ntaalangbam kitiŋ aanaanmɔk. Utaal yaa nu kan, u cha u moor ki cha libuln nyani waah siin li nin chee na.

¹⁴ Binib yaa kan kina kan, le bilan ŋmal, le bi kpaln bilatiirb; binib bi naani ŋiwaa na jin inimɔɔn a; ba pu? ŋi ye fam, le kaa kpa limɔfal.

¹⁵ Ŋaa kpa tinyoor le ki ŋeer ke bi lik seen ŋi. Uwumbɔr yaa nan dan ke u nan ji ŋi tibɔr kan, ŋi ga kuln.

¹⁶ Uma Uwumbɔr u tiyaaja Jakob mu dii u na aa bi ke ŋima na; uma Uwumbɔr le naan tiwan mɔmɔk, le ki lee Israel yaab ke bi li ye uma ubaa aanib. Waayimbil le ye ke Uwumbɔr Mpɔɔnsakpiindaan.

Falaa u choo na

¹⁷ Jerusalem aanib, bijab gob nimi a; kuun nimi aawan man.

¹⁸ Uwumbɔr ban u jenn nyan nimi kitiŋ kee pu la; u ga gbaa ni mɔmɔk le ubaa aan gur. Uwumbɔr le len kina.

¹⁹ Jerusalem aanib le wii ke, “Ti kan titotonn sakpen a, timi aabuun aan yann. Le ti nan dak ke tiwan ngbaan ye tiwan ni ti ga ŋman na la.

²⁰ Timi aagban aaboo ber a; iŋmin i nan joo ŋi na kii a. Timi aabim mɔmɔk buen a; ubaa aa ki bi ki ga ki fiin timi aaboo; ubaa aa ki bi ki ga di ŋaabisamɔi aakeken leen.”

²¹ Le m gar ke, “Timi aayidam ye bilatiirb la; baa baa Uwumbɔr ke u mɔk bi. Nima le cha bi lir, le timi aanib yaa tɔb chee.

²² Li pel man. Tibɔchann fuu ni a. Kinikpakpak sakpeŋ fii ŋŋangan wɔb aatimbol ni; laajab ga cha Juda aatim mɔmɔk kpaln nteersakpiin nin chee ikakal koo na.”

²³ Uwumbɔr, m nyi ke unii ubaa aa ye ubaa aabimbin aaninkpel; ubaa aa kpa waamɔfal aapɔɔn;

²⁴ Uwumbɔr, chiin saanib; taa li lik timi aatunwanbir mɔmɔk, ki taa daa titafal saaŋuul ni; naa ye kina kan, ti kuln le na.

²⁵ Di saaŋuul toŋ ŋitimbol ŋi kaa dooni si na, ni binib bi yii si na wɔb. Bi ku saanib, bi kuln timi pel pel, le ki cha timi aatiŋ kpaln ŋilangben.