Jeremia 1 - Uwumbɔr aagbaŋ

Jeremia aah nan ŋmee pu na sɔ:

¹ Kigbaŋ kimina ponn ni aabɔr ye Jeremia aabɔr la. U nan ye Hilkia aajapɔɔn, ki mu nan ye bitotoorb bi nan bi Anatof aatiŋ ki bi Benjaminn aapepel ni na ponn ni ubaa la.

² Uwumbɔr nan len Jeremia chee tibɔr, buyoonn Amonn aajapɔɔn Josia nan ye Juda aabɔr na aabin kipiik ni litatar ponn ni na la,

³ le ki ki gir len u chee buyoonn Josia aajapɔɔn Jehoyakim mu nan ye ubɔr na. Nee aapuwɔb na, Uwumbɔr nan ki len u chee n‑yoonn n‑yoonn pam, ki ti saa Josia aajapɔɔn Sedekia aanaan ni aabin kipiik ni libaa ni. Libiln ngbaan aaŋmaŋmu ni, le bidim nan nyaŋ Jerusalem yaab ki chur bi buen tinaagbiir ni.

Uwumbɔr aah yin Jeremia pu na

⁴ Uwumbɔr nan bui mi Jeremia ke,

⁵ “M nan nyan si waahr le ki nin tii si limɔfal, le waahr aan bi nin ma si na, m nan lee si ke aa li ye maabɔnabr tii ŋitimbol.”

⁶ Le m gar u ke, “Ndindaan Uwumbɔr, maa ŋmaa len; m laa par sakpen.”

⁷ Le Uwumbɔr bui mi ke, “Taa bui ke aa par sakpen. Li cha maah tun si binib bi chee na, ki ti bui bi maah bui si ke aa len pu na mɔmɔk.

⁸ M ga li bi aa chee ki kii si. Taa san bi ijawaan. Min Uwumbɔr le len kina.”

⁹ Nee aapuwɔb le Uwumbɔr taln uŋaal ki di meeh mmɔgban, le ki bui mi ke, “Li pel, m bi tii si tibɔr ti aa ga len na la.

¹⁰ Din wee, m tii si mpɔɔn ŋitimbol ni nnaan pu ke aa ber, ki tur ŋi lii, ki nyaŋ ki kuln ŋi, ki ki maa ki siin ŋi.”

Tibɔkpiirkaan tilee

¹¹ Uwumbɔr nan baa mi ke, “Jeremia, aa waa ba?” Le m gar u ke, “M waa busub bu bi yin bu ke ‘Ka kii’ na aasubon la.”

¹² Le Uwumbɔr bui mi ke, “Ni ye mbamɔn, le m ka kii ke m ŋa maah len ke m ga ŋa pu na.”

¹³ Uwumbɔr nan ki len m chee. U nan baa mi ke, “Aa ki waa ba ki kpee?” Le m gar u ke, “M waa likumbuul aah tok ŋŋangan wɔb ki kpinni ki ban li lir ni lipepel lee wɔb pu na.”

¹⁴ Le u nan bui mi ke, “Libiil le bi ŋŋangan wɔb ki kpinni kina choo binib bi mɔmɔk bi kitiŋ kee pu na,

¹⁵ ba pu? m bi yin ŋitimbol ŋi bi ŋŋangan wɔb na ke ŋi dan la. Ŋaabɔrb ga di baabɔrjal siin Jerusalem aabisamɔi chee, ki siin mann goln kaagon, ki siin mann goln Juda aatim muken na mu.

¹⁶ M ga daa maanib aatafal, baatunwanbir pu; bi yii mi, ki toor kitork tii ŋiwaa, ki naan ŋiwaa ki dooni ŋi.

¹⁷ Jeremia, gor ki buen ti bui bi maah bui si ke aa len pu na mɔmɔk. Taa san bi ijawaan dandana wee, naa ye kina kan, buyoonn aa bi bi chee na, le m ga cha ijawaan chuu si.

^18-19 Jeremia, li pel. Kitiŋ kee pu aanib mɔmɔk—Juda aabɔrb, ni bininkpiib, ni bitotoorb, ga li kpak si. Tɔ, din wee le m bi tii si mpɔɔn mu aa ga di sil kiir bi na; aa ga li bi ke kitiŋ ki bi maa ŋigon kiir ki na la, ki naahn tikur aagoln, ki bi ke tikumann aagoln na. Baan ŋmaa nyaŋ si, ba pu? m ga li bi aa chee ki kiir si. Min Uwumbɔr le len kina.”