Bibɔjirb 9 - Uwumbɔr aagbaŋ

Abimelek aabɔr

¹ Gideonn aajapɔɔn Abimelek nan buen Sekem aatiŋ ni, una aado yaab mɔmɔk aah bi nin chee na, le ki ti tuk bi

² ke bi baa Sekem aajab ke, “Ni ga li gee nilaba? Ni ban Gideonn aajapɔtiib imonko itaa ni kipiik mɔmɔk le li joo nimi, bee unibaan la? Teer man ke Abimelek ye nimi aanaakook ponn ni aanaa la.”

³ Una aado yaab le nan len Sekem aajab chee tibɔr timina u pu, le Abimelek aah ye bido yoo na, Sekem aajab kpokl ke bi ga dii uma la.

⁴ Bi nan nyan tikunabr aakur aamombil imonko itaa ni kipiik, Baal Berif aawaadiik ni tii u, le u di ŋimombil ngbaan ban maabitibaanidam bi kaa kpa lituln libaa na kpee ubaa pu.

⁵ U nan buen ute do, Ofra aatiŋ ni, le ki ti ku ute Gideonn aajapɔtiib imonko itaa ni kipiik ngbaan paan litakpabaal pu nima chee. Tɔ, Gideonn aajapɔɔn uwaatiir Jotam nan bɔr, le baa kan uma ki ku u.

⁶ Nee aapuwɔb le Sekem ni Bef Milo aajab kuun tɔb ki buen likpaln aasusakpem bubaa taab, Sekem aatiŋ ni, ki ti kaan Abimelek nnaan.

⁷ Jotam aah ŋun kina na, le u buen ti tɔŋ Gerisim Aajool pu ki teen bui bi ke, “Nimi Sekem aatiŋ aajab, li pel man, aan Uwumbɔr mu pel ni chee.

⁸ N‑yoonn mubaa le isui nan kuun tɔb ke i nyan ibaa aabɔr. I nan bui olif aasub ke, ‘Li ye timi aabɔr.’

⁹ Le olif aasub bui iken na ke, ‘Waahr aan m ŋmaa joo nimi na, see m di cha maakpan mu bi joo nyuŋni ŋiwaa ni binib na aaŋam?’

¹⁰ Le isui iken na bui likakaln aasub ke, ‘Aa dan ki nan li ye timi aabɔr.’

¹¹ Tɔ, likakaln aasub nan gar ke, ‘Waahr aan m ŋmaa joo nimi na, see m di cha maasubimɔmɔɔn na aalum.’

¹² Kina pu le isui iken na nin bui ŋisubil aadaan aasub ke, ‘Aa dan ki nan li ye timi aabɔr.’

¹³ Tɔ, ŋisubil aadaan aasub ngbaan nan gar ke, ‘Waahr aan m ŋmaa joo nimi na, see m di cha maadaan mu tii ŋiwaa ni binib mpopiin na aaŋam.’

¹⁴ Kina pu le isui i mɔmɔk gur na bui bukokom ke, ‘Aa dan ki nan li ye timi aabɔr.’

¹⁵ Bukokom nan gar ke, ‘Ni yaa sil ban ke ni di mi ŋa nimi aabɔr kan, dan ki nan kal maaboon ni man. Ni yaa kaa ŋa kina kan, mmii ga poo nya ni maakokon aapan ŋee ni, ki nan wu Lebanonn aasantina tiib.’”

¹⁶ Jotam nan ki nab ke, “Tɔ, ni sil di ibamɔn ni mbimbinyaan le kaan Abimelek nnaan aa? Ni teer Gideonn bɔr ki nyuŋ u ki ŋa waadichal mbamɔm ke waabimbin aah nan ban pu na aa?

¹⁷ Teer man ke nte nan jan kijaak nimi pu. U nan di waamɔfal ŋa uŋaal ni le ki gaa nimi Midiann yaab chee lii.

¹⁸ Le ni tee fenn lir nte Gideonn aadichal pu din wee. Ni ku ujapɔtiib imonko itaa ni kipiik litakpabaal pu, le waanaagbiipiibo aajapɔɔn Abimelek aah ye nido yoo na, ni di u ŋa Sekem aatiŋ aabɔr.

¹⁹ Tɔ, naah ŋa Gideonn ni waadichal din wee pu na yaa ye ibamɔn, ni mbimbinyaan aatuln kan, ni li kpa mpopiin Abimelek pu, aan u mu li kpa ni pu mpopiin.

²⁰ Ni mu yaa kaa ye kina kan, mmii nyan ni Abimelek ni, ki wu Sekem aatiŋ aajab, ni Bef Milo aatiŋ aajab. Mmii mu nyan ni Sekem aatiŋ aajab ni, ni Bef Milo aatiŋ aajab ni, ki wu Abimelek.”

²¹ Tɔ, waah nan san ukpel Abimelek ijawaan na, Jotam nan san buen Beer aatiŋ ni, le ki ti koo nima chee.

²² Abimelek nan joo Israel aanib ki ti saa ŋibin ŋitaa la.

²³ Le Uwumbɔr nan cha Abimelek ni Sekem aatiŋ aanib gur nan tɔb, le bi nyan sil u pu.

²⁴ Nimina nan ŋa kina ke Abimelek ni Sekem aatiŋ aajab bi nan pai u aan u ku Gideonn aajapɔtiib imonko itaa ni kipiik na kan baatunwanbir aatafadaan la.

²⁵ Sekem aanib nan ban bijab le bi ti dɔ pek ŋijoo paab ki kii Abimelek, le unii umɔk jer nima chee na kan, bi su udaan nnaayupɔɔn. Binib nan tuk Abimelek tibɔr ngbaan.

²⁶ Ebed aajapɔɔn Gaal ni ute aabim nan dan Sekem aatiŋ ni, le Sekem aanib nan lik faar u.

²⁷ Bi mɔmɔk nan nyan buen baasubil aasui aasar ni ki ti ker ŋisubil, le ki di ŋa ndaan, le ki ŋa njim. Bi nan koo baawaal aadiik ni, le ki ti jin ki nyun ndaan nima ki seei Abimelek.

²⁸ Gaal nan bui ke, “Ti ye ba aajab Sekem aatiŋ ni do? Ni ŋa kinye aan ti di Abimelek ŋa timi aabɔr? U mu ye ŋma? Gideonn aajapɔɔn mu. Uma le len, le Sebul keei, waan ŋmaa li ye timi aabɔr. Li dii man niyaaja Hamor u naan nimi aataŋaal na aasan.

²⁹ Min le yaa ba ye binib bee aasaloln kan, m ba nyi. M ba ga nyan Abimelek. M ba ga bui u ke, ‘Moo ban bijab ki nya ni aan ti nan pii tɔb.’”

³⁰ Sebul u nan ye kitiŋ ngbaan aajojoor na aah ŋun Gaal aah len pu na, le waaŋuul fii.

³¹ U nan tun ituun Aruma aatiŋ ni, Abimelek chee ke, “Ebed aajapɔɔn Gaal ni unaatiib dan Sekem aatiŋ ni, kaa kii ke aa ki koo ni kitiŋ ngbaan ni.

³² Kina pu na, aa ni saajab nya kinyeek ki nan bɔr bukpaab ni.

³³ Ni fe fii fen, nwiin aah laa bi puur pu na, ki nan gob kitiŋ ngbaan. Gaal ni waajab yaa nyan ni ke bi nan tak nimi kan, ni cha ni nyan bi mbamɔm.”

³⁴ Kina pu le Abimelek ni waajab nan fii kinyeek ki nan yakr ŋiker ŋinaa pu ki bɔr Sekem aakpaan ngbaan ni.

³⁵ Abimelek ni waajab aah nan kan ke Gaal nyan nan sil kitiŋ ngbaan aabisamɔb chee na, le bi fii nyan ni baah bɔr bɔr nin chee na.

³⁶ Gaal nan kan bi, le ki bui Sebul ke, “Lik, bijab bibaa le nyan ni ŋijoo paab ki choo na.” Le Sebul gar u ke, “Nima ngbaan aa ye bijab. Ni ye tijunjunn le bi ŋijoo ngbaan pu.”

³⁷ Gaal nan ki gir len ke, “Lik, bijab le nyan ni lijooyil pu ki sunni choo na, le liker liken mu takni bibɔɔb aakpaln aasub aasan choo na.”

³⁸ N‑yoonn ngbaan le Sebul bui u ke, “Saapupuk na bi la chee? Naa ye sin le nan baa ke ba ŋa ti di Abimelek ngbaan ŋa timi aabɔr na aa? Bijab bi aa nan bi joo bi seei na le na. Nya li cha aan aa ni bima ti pii tɔb.”

³⁹ Gaal nan di Sekem aajab nyan, le bi ni Abimelek ti pii tɔb.

⁴⁰ Gaal nan san, le Abimelek di kal u pu. Binib pam le nan kan titotonn, hali bibaa nan kan titotonn kitiŋ ngbaan aabisamɔb chee.

⁴¹ Abimelek nan koo Aruma aatiŋ ni la, le Sebul jenn nyan Gaal ni unaabitiib Sekem aatiŋ ni, le baa ki ŋmaa koo nima chee.

⁴² Kitaak aah woln na, le Abimelek ŋun ke Sekem aanib nan bi kpokl ke bi nya buen ŋikpaan ni,

⁴³ le u yin waajab le ki yakr bi ŋiker ŋitaa pu, le bi ti bɔr ŋikpaan ngbaan ni ki kii. Waah nan kan binib ngbaan bi nyani kitiŋ ngbaan ni na, le u nyan ni waabɔbɔryaan ni ke u ti ku bi.

⁴⁴ Abimelek ni waagetekr aah nan naa ke bi ti kiir kitiŋ ngbaan aabisamɔb na, le ŋigetek ŋilee na ti di pii binib ngbaan ŋikpaan ngbaan ni, ki ku bi mɔmɔk.

⁴⁵ Bi nan jaa kina le nwiin ti lir. Abimelek nan nyaŋ kitiŋ ngbaan, le ki ku kaanib, le ki ber ki, ki di n‑yaan kpiln biin ki pu.

⁴⁶ Sekem aasalolm bi mɔmɔk nan bi tijawan aadir ni na aah ŋun kina na, le bi san ti koo Baal Berif aawaadifɔfɔŋ ni ke bi ŋmar.

⁴⁷ Binib nan tuk Abimelek ke bi bi nima chee,

⁴⁸ le u di waajab buen Salmonn Aajool paab. Nima chee le u nan ti di kichɔk gaa gii busub aapaln, ki di buŋ ubɔgbiln pu. U nan bui waajab ke bi mɔmɔk ŋa mala ki ŋa kina.

⁴⁹ Kina pu na, waajab ngbaan mɔmɔk nan gaa gii lisupaln, le ki dii Abimelek, le ki ti di idɔ ngbaan baŋ kiwaadiik ngbaan. Bi nan see ki mmii lii, le binib ngbaan bi ki ponn ni. Binib bi mɔmɔk nan nyan ni tijawan aadir ni ki nan koo nima na nan kpoi. Bi nan ye bijab ni bipiib la, ki ga li pii binib lichur.

⁵⁰ Nee aapuwɔb le Abimelek di buen Tebes aatiŋ ni, ki ti gob ki, ki nyaŋ ki.

⁵¹ Kidifɔfɔŋ kibaa nan bi nima ki pɔɔ, le uja ni upii umɔk nan bi kitiŋ ngbaan ni na, ni kaasalolm mɔmɔk san ti koo ki ponn ni. Bi laŋ bibaa pu ki ponn ni, le ki jon ti kal paacham.

⁵² Abimelek aah nan fuu ni ki buen u ti tak kidifɔfɔŋ ngbaan na, u nan buen jaaleŋ chee ke u ti see ki mmii lii.

⁵³ Tɔ, upii ubaa nan di nnaanbiln lii ni uyil pu, le mu wii uyil.

⁵⁴ Le u ŋa mala ki yin unachipɔɔn u joo waajawan na ki nan bui u ke, “Fuur saajaak aajuk ki di ku mi. Maa ban ke bi nan len ke upii le ku mi.” Kina pu le unachipɔɔn ngbaan nan saa chaar u, le u kpo.

⁵⁵ Israel aajab aah kan ke Abimelek kpo na, le bi gir kun bido bido.

⁵⁶ Kina le Uwumbɔr nan teen Abimelek waah nan ku ute aabijabim imonko itaa ni kipiik ki tun taani u na pu.

⁵⁷ Gideonn aajapɔɔn Jotam aah nan puun lii Sekem aatiŋ aajab pu ki len ke bi ga ji falaa pu na, Uwumbɔr nan cha bi mu jin kina aafalaa.