Bibɔjirb 8 - Uwumbɔr aagbaŋ

Baah nyaŋ Midiann yaab kookoo pu na

¹ Efraim aajab nan bui Gideonn ke, “Saah cha aa ti faa Midiann yaab butɔb na, ba ŋa saa yin timi? Ba ŋa aa ŋa timi kina?” Bi nan len sakpen a.

² U nan tee len ke, “Maah ŋman ki ŋa pu na aan ŋmaa sil naah ŋa pu na chee. Hali Efraim aajab aah ŋa siib u na jer maataŋaal mɔmɔk aah ŋa pu na.

³ Ni yaa lik kan, Uwumbɔr aapɔɔn pu, ni ŋman ki ku Midiann yaab aabɔrb bilee, Oreb ni Seeb. Maa tun nibaa aan ni ga ŋmaa sil nima ngbaan chee.” Waah len kina na, baaŋuul nan sɔŋ.

⁴ N‑yoonn mue na, Gideonn ni waajab ikui itaa na nan fuu ni Jɔɔdann Aamɔɔl chee, ki puur li. Bi nan bak sakpen, ki mu beenin paa baadim pu.

⁵ Baah ti fuu Sukof aatiŋ ni na, le Gideonn bui kitiŋ ngbaan ni aajab ke, “Ŋaanii ki tii maajab tijikaar man. Bi bak sakpen a, m bi san dii Midiann aabɔrkpaam Seba ni Salmuna la.”

⁶ Sukof aatiŋ aasalolm nan bui u ke, “Nsan mulamu pu aan ti ga tii saajab tijikaar? Saa kee chuu Seba ni Salmuna.”

⁷ Kina pu le Gideonn bui bi ke, “Tɔ, ni ŋan. Uwumbɔr yaa di Seba ni Salmuna ŋa ŋŋaal ni kan, m ga di ikokon ni kokongɔr tiib bi bi nteersakpiin ni na lue nimi.”

⁸ Gideonn nan di jer ti fuu Penuel aatiŋ ni, ki ki mee nima chee aanib mu mmeen baan ngbaan, le Penuel aajab mu ki gar u ngarm baan mu Sukof aajab tii u na.

⁹ Le u bui bi ke, “M ga gir ni ni laafee, m mu yaa sil gir ni kan, m ga nan ber nimi aadifɔfɔŋ lii.”

¹⁰ Seba, ni Salmuna, ni baajab nan bi Karkor aatiŋ ni la. Ŋinibol ŋi bi nteersakpiin ni aajab mɔmɔk ni, bijab ŋichur kipiik ni ŋiŋmu le nan gur; bijab ŋichur nkub ni moninko nan bee butɔb ni.

¹¹ Gideonn nan di dii nsan mu bi Noba ni Jogbeha aatim aawipuul wɔb ki kpak nteersakpiin na, le ki tak bijab ngbaan, le baa nyi u bɔr.

¹² Midiann aabɔrkpaam Seba ni Salmuna nan san, le u beenin dii bi ki ti chuu bi, le baatɔb aajab aapobil yuk.

¹³ Gideonn aah nan nyan butɔb ni ki dii Heres Aasan chaa kun na,

¹⁴ u nan chuu unachipɔɔn ubaa, u nyan Sukof aatiŋ ni la, le ki baa u tibɔr. Unachipɔɔn ngbaan nan ŋmee Sukof aatiŋ aasalolm imonko itaa ni kipiik ni bilole aayimbil tii Gideonn.

¹⁵ Gideonn nan di buen Sukof aatiŋ ni le ki ti bui ke, “Teer man naah nan yii ke naan ter mi pu na. Ni nan bui ke maa kee chuu Seba ni Salmuna, kina pu na, naan tii maajab bi bak na tijikaar tibaa. Tɔ, bima sɔ.”

¹⁶ U nan di nteersakpiin ni aakokon ni kokongɔr tiib lue Sukof aatiŋ aasalolm ngbaan.

¹⁷ U nan tur Penuel aatiŋ aadifɔfɔŋ na mu lii, ki ku kaajab.

¹⁸ Gideonn nan baa Seba ni Salmuna ke, “Naah nan ku bijab bi Tabor aatiŋ ni na nan bi kinye?” Bi nan gar u ke, “Bi nan naahn sin la, bi mɔmɔk nan bi ke ubɔr aajapɔtiib na la.”

¹⁹ Gideonn nan bui bi ke, “Bi nan ye nte aabim la, min mbaa aana aajapɔtiib. M di nsui mɔmɔk puu ke ni yaa kaa ba ku bi kan, maa ba ga ku nimi.”

²⁰ Waah len kina doo na, le u bui ujapɔpol Jeter ke, “Ti ku bi.” Tɔ, ujapɔɔn aa nan fuur waajaak aajuk. Waah laa ye ubo na, u nan laa si ŋmin la.

²¹ Seba ni Salmuna nan bui Gideonn ke, “Dan aabaa ki nan ku timi. Uja le tun uja aatuln.” Kina pu na, Gideonn nan ku bi, le ki gbiln nleenyaan mu gbin baalaakumii tiib aasil na.

²² Nee aapuwɔb, le Israel yaab nan bui Gideonn ke, “Li ye timi aajojoor, sin ni aayaabitiib bi ga paan ni aa pu na li ye timi aajojoob. Aa gaa timi Midiann yaab chee lii.”

²³ Gideonn nan gar bi ke, “Maan li ye nimi aajojoor, le njapɔɔn mu aan li ye. Uwumbɔr le ga li ye nimi aajojoor.”

²⁴ Tɔ, u nan tee ki len ke, “Cha m mee nimi tiwan nibaa. Ni mɔmɔk di tafajɔnjɔn tiib bi ni gaa na tii mi.” Midiann aanib mu nan jɔn salmaa aatafajɔnjɔn tiib ke nteersakpiin ni aanib biken na la.

²⁵ Binib ngbaan nan kii ke, “Ti ga di bi tii si ni mpopiin la.” Bi nan di likekeln yar bil kitiŋ, le bi mɔmɔk di baah gaa tafajɔnjɔn tiib bi na paan li pu.

²⁶ Gideonn aah nan gaa salmaa aatafajɔnjɔn bi na aanyunyuun ga nan li pii njikaabim kuruwaa moninko aanyunyuun. Midiann aabɔrkpaam ngbaan aah nan pee nleenyaan, ni ŋitakpanyaan, ni ntanyaan aawanpeenkaan ni na, ni baah nan ŋa tiwanyaan ni gbin baalaakumii tiib aasil na aa nan kpee tafajɔnjɔn tiib ngbaan pu.

²⁷ Gideonn nan di salmaa ngbaan naan liwaal, le ki di li siin udo aatiŋ Ofra ni. Israel yaab mɔmɔk nan yii Uwumbɔr, le ki chaa ti dooni liwaal ngbaan. Nimina nan ye gaawɔb le ki tii Gideonn aadichal.

²⁸ Tɔ, Israel yaab aah nan nyaŋ Midiann yaab pu na, le tifaan aa nan ki bi. Nsuudoon nan dan kitiŋ ngbaan pu ki ti saa ŋibin imonko ilee, le Gideonn ti nin kpo.

Gideonn aakun aabɔr

²⁹ Gideonn nan gir kun udo aatiŋ ni, le ki ti koo nima.

³⁰ Waah nan kpa bipiib sakpen pu na, u nan kpa japɔtiib imonko itaa ni kipiik la.

³¹ U nan ki kpa unaagbiipiibo ubaa Sekem aatiŋ ni; le u ni u mu nan ma ubijabo, le u yin u ke Abimelek.

³² Joas aajapɔɔn Gideonn nan por pam le ki nin kpo, le bi di u sub ute Joas aakaakul ni, Ofra aatiŋ ki ye Abieser aataŋaal pu aatiŋ na ni.

³³ Gideonn aah kpo na, Israel aanib nan ki piin ki nya Uwumbɔr aapuwɔb ki dooni Baal aawaa. Bi nan di Baal Berif le ŋa baawaal,

³⁴ kaa ki dooni Bidindaan Uwumbɔr u gaa bi baadim bi mann goln bi na chee lii na.

³⁵ Israel aanib aa nan lik faar Gideonn aadichal yaab, waah nan tun litunyaan li tii bi na pu.