Bibɔjirb 7 - Uwumbɔr aagbaŋ

Gideonn aah nan nyaŋ Midiann yaab pu na

¹ Gideonn ni waajab nan fii kichakpiik ni, ki ti kuun kal Harod Aayayak aanyunbun chee. Midiann aajab mu nan kuun ka More Aagongoln chee aafataŋ ki bi ŋŋangan wɔb na ni.

² Uwumbɔr nan bui Gideonn ke, “Saah joo bijab bi na wiir sakpen ke m cha bi nyaŋ Midiann yaab. Nibaakan bi ga dakl ke bibaa aapɔɔn pu le bi nyaŋ bi, kaan tii mi kipak.

³ Moon ki tuk binib ngbaan ke, ‘Unii umɔk san ijawaan na gir kun, ki cha timi gaar Gilead Aajool pu do.’” Kina pu na, bijab ŋichur moninko ni ŋilee le nan gir kun, le ŋichur kipiik ma gaar.

⁴ Uwumbɔr nan ki tuk Gideonn ke, “Saajab ngbaan beenin wiir sakpen. Di bi buen nnyun chee, aan m ti gann bi nima chee tii si. M yaa bui si ke uja u dii si na, u ga dii si. M yaa bui si ke uja u taa dii si na, waan dii si.”

⁵ Gideonn nan di bijab ngbaan buen nnyun chee, le Uwumbɔr bui u ke, “Nyan uja umɔk joo ulambil lakr nnyun ke ubɔ na, umɔk gbaan utaŋaayil pu ki nyu nnyun na chee.”

⁶ Bijab ikui itaa le nan joo biŋaal kae nnyun ki lakr; bi gur na mɔmɔk nan gbaan bitaŋaayil pu le ki nyun.

⁷ Uwumbɔr nan bui Gideonn ke, “M ga di bijab ikui itaa bi lakr nnyun na le gaa nimi Midiann yaab chee lii, ki tii nimi linyaŋ. Cha bi gur na mɔmɔk li chaa kun.”

⁸ Nima pu na, Gideonn nan cha Israel yaab bi gur na mɔmɔk kun, ki ti cha bijab ikui itaa bi nan joo tiwanbankaan mɔmɔk ni ikpiin na baanja la. Midiann yaab nan kuun ka kifataŋ ni taab.

⁹ Kinyeek ngbaan le Uwumbɔr nan tuk Gideonn ke, “Fii ki ti tak bi; m ga tii si linyaŋ bi pu.

¹⁰ Tɔ, aa yaa san ijawaan ke aa ti tak bi kan, di saatutunn Pura buen baakakaa chee.

¹¹ Aa ga ti ŋun baah bi len pu na, le aa ga kan lipobil ki tak bi.” Kina pu na, Gideonn ni waatutunn Pura nan buen baadim ngbaan aakakaa aagbaan.

¹² Midiann yaab, ni Amalek yaab, ni ŋinibol ŋi bi nteersakpiin ni na aajab nan yaa gaa kifataŋ ngbaan ni ke itoon na, le baalaakumii tiib nan wiir ke limɔɔtambol li dɔ nnyusakpem aagbaan na.

¹³ Gideonn aah nan ti fuu na, u ŋun uja ubaa bi tuk ujɔ waah daŋ tidaŋ pu na. U nan bi len le ke, “M daŋ tidaŋ ke maab ubaa biln koo ni timi aakakaa ni, ki ti yun ŋikeken aabool libaa. Libool ngbaan wur lir kitiŋ tal tal.”

¹⁴ Ujɔ ngbaan nan gar u ke, “Ni ye Israel yaab aanii Joas aajapɔɔn Gideonn aajaak aajuk la. Taatataa le na. Uwumbɔr tii u linyaŋ, Midiann yaab, ni timi aatɔb aajab mɔmɔk pu la.”

¹⁵ Gideonn aah nan ŋun uja ngbaan aadaŋ, ni taatataa aah ye pu na, le u gbaan utaŋaayil pu ki doon Uwumbɔr. U nan gir buen Israel yaab chee le ki ti bui ke, “Fii man. Uwumbɔr tii nimi linyaŋ Midiann aajab pu a.”

¹⁶ U nan yakr waajab ikui itaa ngbaan nfum mutaa pu la, le ki tii uja mɔmɔk ukpiin, ni kibubik ki kpa mmii ki ponn ni na.

¹⁷ U nan tuk bi ke, “M yaa ti fuu nkakaa ngbaan aagbaan kan, ni li lik mi, ki ŋa maah ga ŋa pu na.

¹⁸ M ni maajab yaa ti pii timi aakpiin kan, ni mu pii nimi yee, nkakaa ngbaan aapepel mɔmɔk, ki teen ke, ‘Uwumbɔr ni Gideonn pu.’”

¹⁹ Joo cha ni kinyetaasiik, le Gideonn ni waajab nkub na nan fuu baadim ngbaan aakakaa aagbaan, n‑yoonn ngbaan le bikikiib nan gaa tɔb lituln. Gideonn ni waajab nan pii baakpiin, le ki gbaa wii mbubim mu bi nan joo joo na,

²⁰ le ŋigetek ŋilee na mu ŋa kina. Bi mɔmɔk nan joo imii biŋangan ni, le ki joo ikpiin biŋangii ni, le ki teen mpɔɔn pu ke, “Uwumbɔr ni Gideonn aajaak aajuk pu.”

²¹ Uja mɔmɔk nan nyal sil ki mann goln baadim aakakaa ngbaan, le baadim aajab mɔmɔk san ki gbaa ikuun cha.

²² Gideonn ni waajab aah pii baakpiin na, le Uwumbɔr cha baadim ngbaan aajab di baajaak aajuk fenn lir tɔb pu. Bi nan di san toŋ Saretann aatiŋ wɔb, ki ti nyan Bef Sita aatiŋ ni, ki yoor kina ti nyan Abel Mehola aatiŋ ki bi duun Tabaf aatiŋ na ni.

²³ Bi nan yin Naftali, ni Aser, ni Manase aanibol ŋilee na aajab, le bi san dii Midiann yaab ngbaan.

²⁴ Gideonn nan tun ituun Efraim aagongon aatiŋ mɔmɔk pu ke, “Dan nan jan Midiann yaab man. Li kii man Jɔɔdann Aamɔɔl, ni ikpen i di kina ki ti nyan Bef Bara aatiŋ pu na, aan ki taa cha Midiann yaab puur.” Efraim aajab nan kuun, le ki kiir Jɔɔdann Aamɔɔl, ni ikpen i di kina ki ti nyan Bef Bara aatiŋ pu na.

²⁵ Bi nan chuu Midiann yaab aabɔrb bilee, Oreb ni Seeb; bi nan ku Oreb, litakpal li bi yin li ke Oreb aatakpal na chee la, le ki ku Seeb mu, kitakpaluŋ ki bi yin ki ke Seeb aatakpaluŋ na chee. Bi nan beenin san paa Midiann yaab ngbaan pu, le ki joo Oreb, ni Seeb aayil nan tii Gideonn. N‑yoonn ngbaan Gideonn nan bi Jɔɔdann aawipuul wɔb la.