Bibɔjirb 6 - Uwumbɔr aagbaŋ

Gideonn aabɔr

¹ Israel aanib nan ki gir tun Uwumbɔr titunwanbir, kina pu le u nan cha Midiann aanib joo bi, ki ti saa ŋibin ŋilole.

² Midiann aanib nan pɔɔ jer Israel aanib, le Israel yaab ngbaan nan bɔr titakpalunn ponn ni, ni ŋigongon ni, nin chee bi ga ŋmaa kan lifuur na.

³ Israel aanib yaa ti bun tijikaar na, le Midiann yaab, ni Amalek yaab, ni ŋinibol ŋi bi nteersakpiin ni na, ga dan ki nan tak bi.

⁴ Bi ga nan kal kitiŋ ngbaan pu, le ki bii baajikaar kina, ki ti saa ŋŋangii wɔb, lipepel li mann goln Gasa aatiŋ na. Bi ga nan chur ipiih, ni inaa, ni ibon mɔmɔk, kaan gur Israel aanib nibaa ke bi li joo kpiini bibaa.

⁵ Bi ni baawakor, ni baakeken aaboo nan bɔɔn chirm ke itoon na la. Ubaa aa nan ti ki nyi bi ni baalaakumii tiib aakahm.

⁶ Bi nan choo le ki nan bii kitiŋ, le Israel yaab aa kpa baapɔɔn.

⁷ Le Israel yaab nan wii yin Uwumbɔr, ki ban nterm Midiann yaab pu,

⁸ le u di waabɔnabr u nan joo ni inaŋ imina na tii ni bi. Inaŋ ngbaan sɔ: “Min u ye nimi Israel yaab Aadindaan Uwumbɔr na le nan nyan ni nimi tinaagbiir ni, Ijipt aatiŋ ni.

⁹ Min le nan gaa nimi Ijipt yaab, ni binib bi tak nimi kitiŋ kee pu na chee lii. Naah nan tur koo ni baatiŋ ni na, le m jenn nyan bi, le ki di baatiŋ tii nimi.

¹⁰ M nan bui nimi ke min le ye Nidindaan Uwumbɔr, kina pu na, naah koo Amor yaab aatiŋ ni pu na, ni taa dooni baawaa. Le ni yii, kaa ŋun tii mi.”

¹¹ Tɔ, Uwumbɔr aatuun dan Ofra aatiŋ ni, ki nan kal Abieser aataŋaal pu aaja Joas aakpaln aasub bubaa taab. Ujapɔɔn Gideonn nan loon ti bi poi njikaabim, kitakpaluŋ kibaa ni, ke Midiann yaab taa kan u.

¹² Uwumbɔr aatuun ngbaan nan di lil u pu nima ki bui u ke, “Ujakaandaan, mpɔɔndaan, Uwumbɔr bi aa chee.”

¹³ Le Gideonn bui u ke, “Uninkpel, m yaa ga ŋmaa baa si kan, Uwumbɔr bi ti chee le tiwan nimina mɔmɔk ŋa timi ii? Tiyaajatiib aah nan bui timi lijinjiir aabɔr ti ke Uwumbɔr ŋa, ki di bi nyan ni Ijipt aatiŋ ni na bi la? Uwumbɔr aa ki bi ti chee, le ki di timi tii Midiann yaab ke bi ŋa timi baah gee pu na.”

¹⁴ Le Uwumbɔr tuk u ke, “Li joo saapɔɔn sakpiin cha ki ti gaa Israel yaab Midiann yaab chee lii. Min mbaa le tun si.”

¹⁵ Le Gideonn gar ke, “Ndindaan, m ga ŋa kinye aan ki gaa Israel yaab lii? Maataŋaal le ye bigiim, Manase aanibol ni, le ubaa aa lik waa mi, maadichal ni.”

¹⁶ Uwumbɔr nan gar u ke, “Maah ga ter si pu na le ga cha aa ŋmaa ŋa kina. Aa ga kuln Midiann yaab ngbaan ke baah ye unibaan le na. Naan li pɔɔ kpala.”

¹⁷ Gideonn nan gar ke, “Aa yaa lik faar mi kan, mɔk mi limɔkl ke sin Uwumbɔr sil ye.

¹⁸ Ŋaanii, cha m joo ni si tijikaar waahr aan aa nin siir.” Le u bui ke, “M ga kiir si le aa gir ni waahr.”

¹⁹ Gideonn nan siir koo udo, le ki ti ku uŋoob u laa diin na ki ŋaa, le ki di n‑yon mu ga gbiin kuruwaa kipiik na ŋa boroboro u kaa kpa boroboro aanyɔk na. U nan baan tinann ngbaan ŋa kibɔɔkuuk ni, le ki di tikpin mu ŋa likumbuul ni, le ki joo ni ni mɔmɔk nan tii Uwumbɔr aatuun ngbaan, likpaln ngbaan taab.

²⁰ Ntuun ngbaan nan tuk u ke, “Di tinann ngbaan ni boroboro ngbaan paan litakpal lee pu, ki di tikpin ngbaan kpir pɔl ni pu.” Gideonn nan ŋa kina.

²¹ Le Uwumbɔr aatuun ngbaan di waah joo lidabil li na meeh tinann ngbaan, ni boroboro ngbaan. Mmii nan nyan ni litakpal ngbaan ni, le ki wun tinann ni boroboro ngbaan. Le ntuun ngbaan wɔŋ.

²² N‑yoonn ngbaan le Gideonn bee ke Uwumbɔr aatuun le u kan, le ki di ijawaan len ke, “Ndindaan Uwumbɔr, m kan saatuun linimbil.”

²³ Uwumbɔr nan tee bui u ke, “Taa san ijawaan. Nsuudoon bi. Saan kpo.”

²⁴ Gideonn nan maa kitork aabimbiln nima chee tii Uwumbɔr, ki yin li ke, “Uwumbɔr le ye Nsuudoon.” Li beenin si Ofra aatiŋ ki ye Abieser aataŋaal aatiŋ na ni.

²⁵ Kinyeek ngbaan le Uwumbɔr bui Gideonn ke, “Chuu aate aanaaja, ni unaaja uken u ye ŋibin ŋilole aanaaja na, ki ber aate aah maa kitork aabimbiln tii liwaal Baal na, ki gaa geei liwaapii Asera aanaŋ ki si gbɔk li na.

²⁶ Maa libimbiln li ŋan mbamɔm na tii Aadindaan Uwumbɔr kigongonbik kee pu. Aa di ŋibin ŋilole aanaaja na toor kitork ki di unaajamɔn ngbaan see mmii ni tii u. Aa di saah gaa geei Asera aanaŋ ki na aadɔ tuur mmii ngbaan.”

²⁷ Gideonn nan di waanaagbiib kipiik le buen ki ti ŋa Uwumbɔr aah bui u pu na. U nan san waadichal, ni kitiŋ ngbaan aanib ijawaan sakpen ke u ŋa kina nwiin pu, le ki ŋa ni kinyeek.

²⁸ Kitiŋ ngbaan aanib aah nyan kichakpinaanyeek ni na, le bi kan ke Baal aatork aabimbiln, ni Asera aanaŋ na ber a, ki kan ke ŋibin ŋilole aanaaja wun mmii libimbipɔln li maa ki si nima na pu.

²⁹ Bi nan baa tɔb ke, “Ŋma ŋa kina?” Bi nan baa baa le ki ti kan ke Joas aajapɔɔn Gideonn le ŋa kina.

³⁰ Le bi bui Joas ke, “Nyan ni aajapɔɔn do, aan ti nan ku u. U ber liwaal Baal aatork aabimbiln, ki gaar geei Asera aanaŋ ki si gbɔk li na.”

³¹ Joas nan bui binib bi mɔmɔk nan dan u chee na ke, “Nimi le ga len tii liwaal Baal aa? Nimi le si lichaŋ ni ii? Unii umɔk si lichaŋ ni na ga kpo waahr aan kitaak nin woln. Baal yaa ye liwaal kan, cha li len tii libaa. Laabimbiln le ber.”

³² Joas aah bui ke, “Cha Baal len tii libaa, ke lima aabimbiln le ber” na pu, ki nyan n‑yoonn ngbaan bi nan gur yin Gideonn ke Jerubaal la.

³³ Tɔ, Midiann yaab, ni Amalek yaab, ni ŋinibol ŋi bi nteersakpiin ni na nan kuun, ki puur Jɔɔdann Aamɔɔl, le ki ti kuun kal Jesreel Aafataŋ ni.

³⁴ Uwumbɔr Aafuur Nyaan nan gbiin Gideonn, le u pii ukpiin, ke Abieser aataŋaal pu aajab nyan dii u.

³⁵ U nan tun ituun Manase aanibol ŋilee aapepel mɔmɔk ni, ke bi dan nan dii u. U nan tun ituun Aser, ni Sebulunn, ni Naftali aanibol chee, le bi mu dan nan kpee u pu.

³⁶ Gideonn nan bui Uwumbɔr ke, “Sin le len ke aa ban aa di mi le gaa Israel aanib lii.

³⁷ Tɔ, m ban m di nkokoyon bil taah poi njikaabim nin chee na la. Kichakpiik ni, limaln yaa baa nkokoyon ngbaan baanja pu, kaa ki dɔ kitiŋ nibaa chee kan, m ga bee ke min le aa ga di gaa Israel yaab lii.”

³⁸ Kina le nan sil ŋa. Gideonn aah nan pue fii kichakpinaanyeek ni na, u nan ŋmaan nkokoyon ngbaan le ki nyan limaln ti gbiin lisambil.

³⁹ Le Gideonn bui Uwumbɔr ke, “Taa cha saaŋuul fii m pu, ki cha m ki len nfum mubaa. Ŋaanii ki cha m ki gir di nkokoyon ngbaan ŋa ntɔŋ muken. N‑yoonn mumina ma kan, cha nkokoyon ngbaan le kuun aan kitiŋ ma li soon.”

⁴⁰ Uwumbɔr nan ŋa kina le kinyeek ngbaan. Naah woln na, nkokoyon ngbaan nan kuun, le kitiŋ ma tee soon limaln.