Bibɔjirb 5 - Uwumbɔr aagbaŋ

Debora ni Barak aalahn

¹ Liyaadaal ngbaan le Debora ni Abinoam aajapɔɔn Barak gaa nlahn mumina.

² Pak Uwumbɔr man. Israel yaab nan ŋa lipobil ke bi jan kijaak; binib nan di mpopiin nyan sil bibaa pu la.

³ Nimi bibɔrb, li pel man. Nimi biyidam, lukr nitafal ki ŋun man. M ga gaa ilahn, m ga gbaa maawaal aawan ki tii Uwumbɔr u ye timi Israel yaab Aadindaan na.

⁴ Uwumbɔr, saah nan nyan ni Seir aajool pu na, saah nan nyan ni Edom aapepel ni na, kitiŋ nan dam, le utaal nyan kitaapaak ki lir ni. Mbamɔn, nnyun nan nyan ni ntaalangbam ponn ni.

⁵ Ŋijoo nan jii, Sainai Aajool Aawumbɔr aanimbiin ni, ŋi nan jii Israel yaab Aadindaan Uwumbɔr aanimbiin ni.

⁶ Anaf aajapɔɔn Samgar ni Jael aayoonn na, bisachum ni baalaakumii tiib aa nan ki jer nima, bisachum nan gur diir nsanbim la.

⁷ Debora, Israel aatim nan gur si nkuun la; mu nan gur si nkuun le aa ti fuu ni, aa nan fuu ni ke Israel aana na.

⁸ Israel yaab nan ban ŋiwaa la, nima pu le butɔb dan kitiŋ ngbaan pu. Israel aajab ŋichur imonko ilee ngbaan ni, ulau nan joo kijaak aapeln, bee kikpaatuŋ?

⁹ Nsui mɔmɔk bi Israel aajab aaninkpiib, ni bijab bi nan nyan sil bibaa ni mpopiin ŋmeen na chee. Pak Uwumbɔr man.

¹⁰ Nimi bi ka ibonpiin pu, ni ŋitanjal pu na, len ti man, ni nimi bi mu chuun ni kookoo na, ni mu len ti man.

¹¹ Li pel man, kinipaak aafuuk ki bi ŋibun chee na; bi len Uwumbɔr aanyaŋ aabɔr la, bi bi len Israel aanib aanyaŋ pu la. Le Uwumbɔr aanib chɔr nyan baatim ni.

¹² Loln bi pu nsan, Debora, loln bi pu nsan. Gaa nlahn, ki loln bi pu nsan. Abinoam aajapɔɔn Barak, li chuun, di saah chur binib bi tinaagbiir na buen.

¹³ Le mbamɔndam dan baasalolm chee; Uwumbɔr aanib nan dan u chee ke bi nan jan kijaak.

¹⁴ Bi nan nyan ni Efraim aatiŋ ni, ki sunn ni kifataŋ ni, ki paa Benjaminn aanibol, ni laanib pu. Bijab aaninkpiib ngbaan nan nyan ni Makir aataŋaal pu, le biyidam nyan Sebulunn aanibol ni.

¹⁵ Isakar aanibol ni aasalolm nan dii ni Debora; mbamɔn, Isakar aanibol nan dan, le Barak mu dan, le bi nan dii ki sunn kifataŋ ngbaan ni. Le Rubenn aanibol ma aa nan kpa kimɔbaan, le kaa nan dan.

¹⁶ Ba ŋa bima nan gaar ipiih chee? Bi nan ka pel bipihkpaab aah yin ipiih pu na la aa? Mbamɔn, Rubenn aanibol aa nan kpa kimɔbaan, le kaa nan dan.

¹⁷ Gad aanibol nan bee Jɔɔdann Aamɔɔl aawipuul wɔb, le Dann aanibol gaar iŋɔsakpiin chee. Aser aanibol nan bee nnyusakpem aagbaan; bi nan gaar nnyun aagbaan.

¹⁸ Le Sebulunn ni Naftali aanibol aanib ma di baamɔfal ŋa biŋaal ni, butɔb ni.

¹⁹ Taanak aatiŋ ki bi Megido aakpen chee na, le bibɔrb nan dan nan jan; Kanaann aabɔrb nan tun tijar, ki mu aa nan ŋmaa di tikunabr tibaa buen.

²⁰ Iŋmabi nan faa Sisera butɔb kitaapaak, yaah nan bɔ dii kitaapaak cha na, i ni Sisera nan faa tɔb butɔb.

²¹ Kisonn Aamɔɔl ni aawam le nan ŋar bi ŋŋaan buen, Kisonn Aamɔɔl aanyunja le nan di bi buen. M ga chuun buen, m ga di mpɔɔn chuun buen.

²² Le itaan di san fuu ni, ki joo itaabuseen tai kitiŋ.

²³ Uwumbɔr aatuun bui ke, “Puun lii Meros aatiŋ pu, mbamɔn, puun lii binib bi koo nima chee na pu; ba pu? baa dan nan ter Uwumbɔr, baa dan ke butɔb aajab na ki nan ter u.”

²⁴ Upiiyinyaan daan le ye Jael u aachal ye Kenn aanii Heber na, uma le ye upiiyinyaan daan u koo ŋikeken aaboo ni na.

²⁵ Sisera mee u nnyun la, le u tee tii u nnaabiin; u nan joo ni nnaabiinkpan lisambinyaan ponn ni nan tii u.

²⁶ U nan joo likpaal uŋaal mubaa ni, le ki joo ututunn aagagaar uŋaal muken ni, ki nan faa Sisera mpɔɔn pu le ki wii uyil; u nan kpaa chaar uyil,

²⁷ le Sisera tar gbaan utaŋaayil pu, le ki lir ki dɔ utaa chee. Utaa chee le Sisera nan tar ti gbaan utaŋaayil pu ki lir; u nan lir kitiŋ, le ki kpo.

²⁸ Sisera aana nan baan takolu ni, ki lik ni, u nan fiir takolu aakekeln ki lik ni, le ki baa ke, “Ba ŋa waataan aatɔroku taan sakpen kina? Ba ŋa waataan aa gir ni mala?”

²⁹ Le waapiib bilandam na gar u, le u mu bui usui ni, ki ki gir bui ke,

³⁰ “Bi ban tiwan le ke bi gaa aan ki yakr, ki ban usapɔɔn ubaa, bee bilee, bi tii butɔb aaja mɔmɔk, ki ban tiwanpeenkaan ni kpa kidaak na, bi tii Sisera, le ki ban nleen aanyɔla nyɔla, bi nan tii ubɔrpii.”

³¹ Uwumbɔr, cha saadim mɔmɔk kpoi kina, ki tee cha aajɔtiib li moor lak lak ke nwiin mu laa bi puur ni na. Tɔ, nsuudoon nan bi kitiŋ ngbaan pu ki ti saa ŋibin imonko ilee.