Bibɔjirb 4 - Uwumbɔr aagbaŋ

Debora ni Barak aabɔr

¹ Ehud aah nan kpo na, le Israel aanib ki tun Uwumbɔr titunwanbir.

² Kina pu le Uwumbɔr nan cha Kanaann Aabɔr Jabinn u nan bi Hasor aatiŋ ni na nyaŋ bi. Waajab aaninkpel le nan ye Sisera u nan koo Harosef Hagoyim aatiŋ ni na.

³ Jabinn nan kpa itaan aah dar tɔroku tiib bi na ikui iwae la, le ki nan joo mbiin muk Israel aanib, ki ti saa ŋibin moninko. Le Israel aanib wii yin Uwumbɔr, ki ban nterm.

⁴ Tɔ, Lapidof aapuu Debora nan ye Uwumbɔr aabɔnabpii la, le n‑yoonn mue na, uma le nan ye Israel yaab aabɔjil.

⁵ U nan ŋmaa kaa libɔkpal aasub bubaa taab la. Busub ngbaan nan bi Rama aatiŋ ni Betel ki bi ŋigongon aatiŋ ki ye Efraim aanibol aatiŋ na aakaasisik ni la, le Israel aanib chaa u chee nima, ki ti toor baabɔr.

⁶ Daalbaadaal le u tun ti yin ni Abinoam aajapɔɔn Barak u nan bi Kedes aatiŋ ki bi Naftali aanibol aatiŋ ni na, le ki nan bui u ke, “Uwumbɔr, u ye Israel yaab Aadindaan na, le di tibɔr tee tuk si ke: ‘Nyan butɔb aajab ŋichur kipiik, Naftali, ni Sebulunn aanibol ponn ni, ki di bi buen Tabor Aajool pu.

⁷ M ga cha Jabinn aajab aaninkpel Sisera dan nan tak si Kisonn Aamɔɔl chee. U ga li joo ni waataan aatɔroku tiib ni waajab, m mu tee ga cha aa nyaŋ u.’”

⁸ Le Barak gar u ke, “Aa yaa ga dii mi buen kan, m ga buen; aa yaa kaan buen kan, m mu aa cha.”

⁹ Le u gar ke, “Kina kan, ni ŋan, m ga dii si buen, aa mu aan tee kan kipak kibaa linyaŋ ngbaan pu, ba pu? Uwumbɔr ga di Sisera ŋa upii aaŋaal ni la.” Le Debora ni Barak di siir tɔŋ Kedes.

¹⁰ Barak nan yin Sebulunn, ni Naftali aanibol ni aanib di buen Kedes aatiŋ ni, le butɔb aajab ŋichur kipiik dii u. Debora mu nan dii u buen.

¹¹ N‑yoonn mue na, Kenn aanii Heber nan puen gaa waakeken aabool likpaln aasub bubaa taab, Sananim aatiŋ ki bi gbɔk Kedes aatiŋ na chee. U nan fii udo yaab biken, Hobab, u nan ye Moses aachiin na aayaabitiib chee.

¹² Sisera aah ŋun ke Barak bi Tabor Aajool pu na,

¹³ le u yin ni waatɔroku tiib ikui iwae, ni waajab mɔmɔk, bi nan bi Harosef Hagoyim aatiŋ ni na, ki cha bi buen Kisonn Aamɔɔl chee.

¹⁴ Le Debora bui Barak ke, “Li cha. Uwumbɔr le loln aa pu nsan. Din wee le u tii si linyaŋ Sisera pu.” Le Barak ni waajab ŋichur kipiik ngbaan sunn Tabor Aajool.

¹⁵ Barak ni waajab aah ti tak bi na, le Uwumbɔr ŋmal Sisera ni waajab bi mɔmɔk bi itaan aatɔroku tiib ni na, ni waajab biken mɔmɔk aalan. Sisera nan nyan waatɔroku ponn ni ke u di litaal san ŋmar.

¹⁶ Le Barak ni waajab nan ka bi pu ki ti saa Harosef Hagoyim aatiŋ ni, le ki ku Sisera aatɔb aajab mɔmɔk. Uja ubaa le aa nan gur.

¹⁷ Tɔ, Hasor Aabɔr Jabinn, ni Heber aadichal aasisik ni nan mɔ la, le Sisera nan san buen Kenn aanii Heber aapuu Jael chee.

¹⁸ Jael nan tooh Sisera nsan ni, le ki ti bui u ke, “Maaninkpel, koo ni; koo ni maakeken aabool ni. Taa san ijawaan.” Le u koo, le u di u bɔr ŋikeken ŋibaa ni.

¹⁹ Le Sisera bui u ke, “Tii mi nnyun aan m nyu; m gaŋ si la, nnyunyuu le joo mi.” Le u nan yoor igban aalook ki ponn ni kpa nnaabiin na, le ki bar tii u, ki ki giin u di bɔr.

²⁰ Le u bui upii ngbaan ke, “Li si libool ngbaan aabisamɔb, unii umɔk dan ki nan baa si ke unii bi li ponn ni aan waa bi kan, aa bui udaan ke ubaa aa bi.”

²¹ Sisera aah nan bak na, le u kpaan geen. Le Jael yoor ugagaar ni nkpaa, le ki loon buen u chee, le ki ti di nkpaa ngbaan kpaa chaar utapak ki ti chuu kitiŋ.

²² Barak aah bi ban Sisera ki nan fuu ni na, le Jael tooh u nsan ni ki ti bui u ke, “Dan do. M ga mɔk si saah bi ban uja u na.” Le u dii u koo, le ki ti kan Sisera kpo dɔ kitiŋ, le nkpaa kpaa uyil ki ti chuu kitiŋ.

²³ Liyaadaal ngbaan, Uwumbɔr nan cha Israel aanib nyaŋ Kanaann Aabɔr Jabinn.

²⁴ Bi nan moo tur u, le ki tur u ki ti kuln u kookoo.