Bibɔjirb 3 - Uwumbɔr aagbaŋ

Ŋitimbol ŋi aanib nan gaar kitiŋ ngbaan pu na aabɔr

¹ Kina pu na, Uwumbɔr nan cha ŋitimbol ŋibaa aanib gaar kitiŋ ngbaan pu, ke u di tɔŋ Israel yaab bi kaa nan kan bi ni Kanaann yaab aatɔb na, ki lik.

² U nan ŋani kina ke u mɔk Israel aaniker mɔk butɔb aabɔr la. U nan ban binib bi aanimbil aa kee kan butɔb na le bee bu.

³ Filistia aatim muŋmu, ni Kanaann yaab mɔmɔk, ni Saidonn yaab, ni Hif yaab bi nan koo Lebanonn Aajoo ni, ki nyan Baal Hemonn Aajool chee ki ti saa Hamaf aasan chee na, gaar kitiŋ ngbaan pu.

⁴ Bi nan ye ntɔŋ le ki tii Israel yaab, ke u lik ke bi ga kii uma Uwumbɔr aah nan di ikaal i tii Moses ke u di tii biyaajatiib na, aan baan kii i.

⁵ Kina pu le Israel yaab, ni Kanaann yaab, ni Hef yaab, ni Amor yaab, ni Peres yaab, ni Hif yaab, ni Jebus yaab nan kpaan koo.

⁶ Bi nan joo tɔb aabim, le Israel yaab dooni baawaa.

Usaloln Otniel aabɔr

⁷ Israel aanib suln Bidindaan Uwumbɔr bɔr; bi nan tun u titunwanbir le ki dooni liwaal Baal, ni liwaal Asera.

⁸ Uwumbɔr aaŋuul nan fii Israel yaab pu, le u cha Mesopotamia aabɔr, u bi nan yin u ke Kusann Risatayim na, nyaŋ bi, le ki joo bi, ki ti saa ŋibin ŋiniin.

⁹ Le Israel yaab nan wii yin Uwumbɔr, le u tun ni uja ubaa u nan gaa bi lii. Uja ngbaan le nan ye Kaleb aanaal Kenas aajapɔɔn Otniel.

¹⁰ Uwumbɔr Aafuur nan koo u, le u ŋa Israel yaab aasaloln. Otniel nan faa Mesopotamia aabɔr butɔb, le Uwumbɔr cha u nyaŋ u.

¹¹ Nsuudoon nan dan kitiŋ ngbaan pu kina, ki ti saa ŋibin imonko ilee, le Otniel nin kpo.

Usaloln Ehud aabɔr

¹² Israel aanib nan ki tun Uwumbɔr titunwanbir. Kina pu le Uwumbɔr nan cha Moab aatiŋ aabɔr Eglonn pɔɔk jer Israel aanib.

¹³ Eglonn nan ti kpee Amonn yaab, ni Amalek yaab pu, le bi ti faa Israel yaab butɔb ki nyaŋ bi, le ki gaa ŋibɔkpal aasui aatiŋ Jeriko.

¹⁴ Israel yaab nan gur bi ubɔr Eglonn taab ki ti saa ŋibin kipiik ni ŋiniin.

¹⁵ Le Israel yaab nan wii yin Uwumbɔr, le u tun ni uja ubaa ke u nan gaa bi lii. Bi nan yin uja ngbaan ke Ehud, le u ye ugandaan. Ute le nan ye Gera, u ye Benjaminn aanibol ni aanii na. Israel aanib nan ban ipiin, le ki di tun Ehud, ke u di ti tii Moab Aabɔr Eglonn.

¹⁶ Ehud nan mɔɔ kijaak aajuk ki aafɔfɔk nan fɔk jer litaa libaa ni ligeln na. U nan di ki peen uŋangii wɔb aasikakl, waawanpeenkaan aataab la,

¹⁷ le ki di ipiin ngbaan buen Eglonn, u nan ye ujasakpiin na chee.

¹⁸ Ehud aah nan ti di ipiin ngbaan tii u na, le u bui bijab bi nan tun ipiin ngbaan buen na, ke bi gir li chaa kun.

¹⁹ Le Ehud ma nan ti sil ŋitakpakpiikee ŋi bi duun Gilgal aatiŋ chee na, ki fenn gir buen Eglonn chee, ki ti bui u ke, “Mpɔɔndaan, m kpa inaŋ m tii si.” Le ubɔr ngbaan bui waanaagbiib ke, “Nya man.” Le bi mɔmɔk siir nyan.

²⁰ Le ubɔr aah nan gur ka waadisɔsoon ki bi paacham na ni ubaa na, le Ehud buen u chee ki ti bui u ke, “Uwumbɔr le di inaŋ tii ni mi ke m nan di tuk si.” Le ubɔr nan fii sil.

²¹ Le Ehud di uŋangan daa nyan waajaak aajuk na, uŋangii aasikakl wɔb, ki di saa gbir ubɔr aapuul.

²² Njubim ni lijukpaal mɔmɔk nan koo, le nkpan pɔl ki pu gbab. Ehud aa nan daa ŋɔb ki ubɔr aapuul ni, le ki nan ti chaar upuwɔb, utaa aasisik ni.

²³ Le Ehud siir nyan, le ki di jaaleŋ tiib piin, le ki laŋ,

²⁴ le ki siir. Ubɔr aanaagbiib nan gir ni, le ki nan muin jaaleŋ tiib lak, le bi nan dak ke ubɔr bi ni ponn ni, ki bi sɔnni la.

²⁵ Bi nan si kii ki ti saa n‑yoonn mu bi dak ke ni ŋeer na, le waa nan piir jaaleŋ tiib ngbaan, nima pu le bi yoor mpiin ki piir, le ki kan ke baaninkpel le kpo ki dɔ kitiŋ na.

²⁶ Buyoonn bi nan si kii ke u ti piir na, le Ehud nan san. U nan ti ki jer ŋitakpakpiikee na chee, le ki san ŋmar buen Seira aatiŋ ni.

²⁷ Waah nan ti fuu ŋigongon aatiŋ ki ye Efraim aanibol aatiŋ ni na, le u pii ukpiin ke Israel aajab nya buen butɔb, le ki di bi sunn ŋigongon ngbaan.

²⁸ U nan bui bi ke, “Li dii mi man. Uwumbɔr tii nimi linyaŋ nimi aadim Moab yaab pu a.” Le bi nan dii Ehud ki sunn, le ki ti gaa Moab yaab aah ba ga dii nin chee ki puur Jɔɔdann Aamɔɔl na; baa nan cha uja ubaa kina puur.

²⁹ Liyaadaal ngbaan bi nan ku Moab aatɔb aajab bi ga nan li pii ŋichur kipiik na; bi ponn ni ubaa aa nan ŋmar.

³⁰ Israel yaab nan nyaŋ Moab yaab liyaadaal ngbaan, le nsuudoon nan ŋa kitiŋ ngbaan pu, ki ti saa ŋibin imonko inaa.

Usaloln Samgar aabɔr

³¹ Usaloln u nan nab Ehud aatuln pu na le nan ye Anaf aajapɔɔn Samgar. U mu nan gaa Israel yaab lii. U nan di lidabil li aamɔb chɔɔ na, le ki ku Filistia aajab ikui iloob.