Bibɔjirb 21 - Uwumbɔr aagbaŋ

Baah nan ban bipiib tii Benjaminn aajab pu na

¹ Israel yaab aah nan kuun Mispa aatiŋ ni na, bi nan puu tipuukpaan tii Uwumbɔr ke: “Ti ponn ni ubaa aan cha Benjaminn aanibol ni aanii joo ubisal.”

² Tɔ, Israel yaab nan buen Betel aatiŋ ni ki ti ka Uwumbɔr aanimbiin ni nima le nwiin ti lir. Bi nan wii mpɔɔn pu, mpombiin pu ke:

³ “Timi Israel yaab Aadindaan Uwumbɔr, ba ŋa tiwan nimina ŋa? Ba ŋa Benjaminn aanibol ban li kuln Israel aanibol ni?”

⁴ Kitaak aah woln na, kichakpinaanyeek ni, le binib ngbaan maa kitork aabimbiln nima chee, le ki toor kimɔbaan aapiin aatork, le ki di tiwakor ngbaan tibaa timɔnn see mmii ni tii Uwumbɔr.

⁵ Bi nan baa ke, “Israel aanibol mɔmɔk ponn ni aanib bibaa bi, kaa buen Mispa aatiŋ ni, Uwumbɔr aanimbiin ni ii?” Bi nan puu tipuukpaan ke bi ku unii umɔk kaa buen na.

⁶ Israel aanib ngbaan aasui nan bii binaabitiib Benjaminn aanibol pu, le bi bui ke, “Israel aanibol libaa wɔŋ din wee.

⁷ Ti ga ŋa kinye ki kan bipiib tii Benjaminn aanibol ni aanib bi gur na? Ti puu tipuukpaan tii Uwumbɔr ke taan cha bi yoor tibisatiib.”

⁸ Baah baa ke Israel aanibol ponn ni aanib bilabi aa buen Mispa aatiŋ ni aakuun ngbaan ni na,

⁹ bi nan kan ke Jabes aatiŋ ki bi Gilead ni na aanii ubaa aa nan dii buen.

¹⁰ Kina pu na, bi nan kuun butɔb aajab bi kaar sakpen na bijab ŋichur kipiik ni ŋilee, ki bui bi ke, “Li cha man ki ti ku Jabes aatiŋ ni aanib mɔmɔk. Ni ku bipiib ni mbim mu.

¹¹ Ni ku bijab mɔmɔk, ni upii umɔk nyi uja na.”

¹² Bi nan kan bisapɔm bi kaa nyi uja na ikui inaa le Jabes aatiŋ aanib ngbaan ni, le ki joo ni bi baakakaa chee Silo aatiŋ ni. Kitiŋ ngbaan nan bi Kanaann aatiŋ ni la.

¹³ Le binib bi mɔmɔk nan kuun nima chee na tun Benjaminn aanib bi bi Rimonn Aatakpal chee na ke bi kuln butɔb ngbaan.

¹⁴ Benjaminn aanibol ni yaab ngbaan nan gir ni, le Israel yaab biken na di Jabes aatiŋ ni aasapɔm bi baa nan ku bi na tii bi. Tɔ, baa nan ŋeer bi mɔmɔk.

¹⁵ Uwumbɔr aah nan bii kimɔbaan ki nan bi Israel aanibol ngbaan aakaasisik ni na, le binib ngbaan aasui nan bii Benjaminn yaab ngbaan pu.

¹⁶ Kina pu le nkuun ngbaan aasalolm nan bui ke, “Bipiib aa ki bi Benjaminn aanibol ni. Ti ga ŋa kinye ki kan bipiib tii bijab bi gur na?

¹⁷ Naa ŋan ke Israel yaab lann laanibol libaa. Ni ŋan ke ti ban isan aan Benjaminn aanibol taa kuln.

¹⁸ Ti mu aan ŋmaa cha tibisatiib mɔn bi, ba pu? ti puun lii ti ponn ni u cha Benjaminn aanibol ni aanii yoor ubisal na pu.”

¹⁹ N‑yoonn ngbaan le bi nan teer ke, “Uwumbɔr aajim mu ti ji Silo aatiŋ ni na peen ni a.” Silo bi Betel aatiŋ aaŋangan wɔb, le ki bi Lebona aatiŋ aaŋangii wɔb, le ki bi nsan mu bi Betel aatiŋ ni Sekem aatiŋ aakaasisik ni na aawipuul wɔb.

²⁰ Bi nan bui Benjaminn aanibol yaab ngbaan ke, “Li cha ti bɔr man ŋisubil aasar ni,

²¹ ki li kii. Silo aatiŋ aasapɔm yaa nan nyan ni ke bi nan waa liwaal njim ngbaan ni kan, ni nyan ni ŋisubil aasar ngbaan ni. Ni mɔmɔk chur nimi aapiib bi ponn ni ki di gir buen Benjaminn aapepel ni.

²² Bitetiib, bee bininjatiib yaa dan ni chee ke bi nan gaa bi kan, ni ga ŋmaa bui bi ke, ‘Ŋaanii ki cha ti li joo bi man, ba pu? taa chur bi ni chee butɔb ni le ke ti di bi ŋa tipuutiib. Ni mu aah kaa di bi tii timi nibaa na, naa bii naah puu tipuur ti na.’”

²³ Benjaminn yaab ngbaan nan ŋa kina la; bi mɔmɔk ubaabaa nan lee upuu Silo aasapɔm bi nan bi waa liwaal na ponn ni, le ki di u buen. Bi nan gir buen baapepel ni, le ki ti gir maa baatim ki koo nima.

²⁴ N‑yoonn baan ngbaan le Israel yaab bi gur na mu buen, uja mɔk gir buen waanibol ni, ni waadichal ni, ni waatiŋ pu.

²⁵ Israel aatiŋ aa nan kpa ubɔr n‑yoonn ngbaan. Unii mɔmɔk nan ŋani waageehn la.