Bibɔjirb 20 - Uwumbɔr aagbaŋ

Israel yaab aah gor bibaa kii butɔb pu na

¹ Israel aanib mɔmɔk bi nan ye Dann aanibol yaab ki bi ŋŋangan wɔb na, ki ti saa Beerseba aatiŋ ki bi ŋŋangii wɔb na, ki yoor kina ki nyan Gilead aatiŋ ni liwipuul wɔb mɔmɔk nan kii n‑yim ngbaan. Bi mɔmɔk nan kuun ti ŋa unibaan Uwumbɔr aanimbiin ni, Mispa aatiŋ ni.

² Israel aanibol mɔmɔk aasalolm nan bi Uwumbɔr aanib aakuun mumina ponn ni, le butɔb aajab bi chuun bitaa pu na ti saa bijab ŋichur ikui inaa.

³ Tɔ, Benjaminn aanibol mu nan ŋun ke Israel yaab biken na mɔmɔk kuun Mispa aatiŋ ni. Israel yaab ngbaan nan len ke, “Tuk timi libiil ngbaan aah nan ŋa pu ki ti bii na.”

⁴ Baah nan ku Liifai aaja u aapuu na nan gar ke, “M ni mpuu nan buen Gibea aatiŋ ki bi Benjaminn aapepel ni na ke ti ti doon nima.

⁵ Gibea aatiŋ ni aajab nan nyan ni ke bi nan tak mi, le ki gob lidichal li ponn ni ti bi na kinyeek. Baalandak le nan ye ke bi ku mi; tɔ, bi nan ki yii kina le ki tee chuu mpuu mpɔɔn ki doon u chee le u ti kpo.

⁶ Le m gii waawon, ki di linankpiln libaabaa tun tii Israel aanibol kipiik ni ŋilee na. Binib ngbaan tun titunwanbir ni kininsuŋ aatuln tikaasisik ni la.

⁷ Ni mɔmɔk bi ka do na ye Israel aanib la. Ti ga ŋa tibɔr ngbaan kinye?”

⁸ Binib ngbaan mɔmɔk nan sil nfum mubaa pu le ki bui ke, “Ti ponn ni ubaa aan gir kun, udaan yaa koo libool ni, bee lidichal ni kan, ubaa aan kun.

⁹ Taah ga ŋa pu na sɔ: ti ga too inaan le ki lee bijab bi ga ti tak Gibea aatiŋ na.

¹⁰ Israel aanib aagetek kipiik ponn ni, ti ga nyan ligetekr libaa le li ban tijikaar ti butɔb aajab ga ti ji na, le ŋigetek ŋi gur na ga buen ki ti daa Gibea aatiŋ aanib aatafal, baah tun kininsuŋ aatunwanbir ti Israel aanib ni na pu.”

¹¹ Kina pu na, Israel aajab mɔmɔk nan kuun ki kpa nlandakbaan le ke bi ti tak Gibea aatiŋ.

¹² Israel aanibol ngbaan nan tun ituun Benjaminn aanibol aapepel mɔmɔk ni ke, “Ba aabiil aan ni bii na?

¹³ Nyan ni man bininsum ngbaan Gibea aatiŋ ni, aan ti ku bi ki nyan titunwanbir ngbaan Israel aanib ni.” Tɔ, Benjaminn aanibol aanib ngbaan aa nan di Israel yaab ngbaan aabɔr ngbaan yin nibaa.

¹⁴ Bi nan nyan ni Benjaminn aapepel aatim mɔmɔk ni, ki dan Gibea aatiŋ ni ke bi ni Israel yaab biken na nan jan kijaak.

^15-16 Liyaadaal ngbaan bi nan nyan baatim ni butɔb aajab ŋichur moninko ni ŋiloob la. Ki kpee bimina pu na, Gibea aatiŋ ni yaab nan gann ki kuun bijab bi nyi butɔb aabɔr mbamɔm na bijab ikui ilole. Bi mɔmɔk nan ye bigandam la. Bi mɔmɔk ga nan ŋmaa faa kiyikpirk kibaa lifulaataln, kaan lann.

¹⁷ Israel aanibol ŋiken na nan kuun butɔb aajab bi nyi butɔb aabɔr mbamɔm na bijab ŋichur ikui inaa la.

Benjaminn aanibol ni Israel aanibol ŋiken aatɔb

¹⁸ Israel yaab nan buen baah dooni Uwumbɔr nin chee na Betel aatiŋ ni. Nima chee le bi ti baa Uwumbɔr ke, “Lilanibol ga puen tak Benjaminn aanibol?” Uwumbɔr nan gar bi ke, “Juda aanibol le ga puen tak.”

¹⁹ Kina pu le Israel yaab nan woln kitaak ki fii kichakpiik ni ki ti kuun kal Gibea aatiŋ chee.

²⁰ Bi nan buen le ki ti tak Benjaminn aajab, le ki cha butɔb aajab aanimbil wɔb lik kitiŋ ngbaan.

²¹ Benjaminn aatɔb aajab nan nyan ni baatiŋ ni; ki joo cha ni kijook wɔb na, Benjaminn aajab nan ku Israel yaab biken na aajab ŋichur moninko ni ŋilee.

^22-23 Israel yaab nan gir buen baah dooni Uwumbɔr nin chee na, Uwumbɔr aanimbiin ni, ki ti wii ikpowiil ki ti lir nwiin. Bi nan baa u ke, “Ti ki gir ti faa tinaabitiib Benjaminn yaab butɔb aa?” Uwumbɔr nan gar bi ke, “Een.” Nima le nan pɔɔk Israel aajab aataakpab, le bi nan ti ki lol baajab siin ke baah fe si fen na pu na.

²⁴ Bi nan ki gir ti tak Benjaminn aajab lelee.

²⁵ Benjaminn aatɔb aajab mu nan ki nyan ni Gibea aatiŋ ni. N‑yoonn mue ma, bi nan ku Israel yaab biken na aatɔb aajab ŋichur kipiik ni ŋiniin la.

²⁶ Israel aanib mɔmɔk nan ki buen Betel aatiŋ ni ki ti wii ikpowiil. Bi nan ka Uwumbɔr aanimbiin ni, nima chee, kaa jin tijikaar le nwiin ti lir. Bi nan toor kimɔbaan aapiin aatork, ki di tiwakor ngbaan tibaa timɔnn see mmii ni, Uwumbɔr aanimbiin ni.

^27-28 N‑yaayoonn ngbaan Uwumbɔr Aakaal Aadakaa nan laa bi Betel aatiŋ ni nima chee, le Eleasar aajapɔɔn Fineas u aayaaja ye Aaronn na, nan lik u. Binib ngbaan nan baa Uwumbɔr ke, “Ti ki gir ti faa tinaabitiib Benjaminn yaab butɔb aan ti di cha?” Uwumbɔr nan gar bi ke, “Ti jan man. M ga fe tii nimi linyaŋ bi pu fen.”

²⁹ Nima pu na, Israel yaab nan ti di baajab bibaa bɔr Gibea aatiŋ aapuwɔb.

³⁰ Tɔ, le wintaa daal bi nan ti ki tak Benjaminn aajab, ki cha baajab lik Gibea aatiŋ wɔb ke baah ti si pu na.

³¹ Benjaminn aajab nan nyan ni ke bi nan pii tɔb, le bi di bi foor cha baatiŋ. Bi nan ti piin ki bi ku Israel yaab ke baah ti ŋani pu na mpataawiin pu, Betel aasan pu, ni Gibea aasan pu. Baah nan ku Israel yaab biken na pu na ga nan li pii bijab piitaa.

³² Benjaminn yaab ngbaan nan bui ke, “Ti ki nyaŋ bi ke taah ti ŋani pu na la.” Tɔ, Israel yaab biken nan kpokl ke bi di bi foor nyan baatiŋ ni ki di bi buen nsan ni la.

³³ Kina pu na, Israel aajab bi nan nyan sil ni na aah nan sur bipuwɔb ki ti nyal sil Baal Tamar aatiŋ chee na, le baajab bi bɔr Gibea aatiŋ aapuwɔb na kpaan chee nyan ni baah bɔr bɔr ŋitakpal ŋi ponn ni na.

³⁴ Bi nan ye bijab ŋichur kipiik bi Israel yaab nan gann na la, le bi di koo Gibea aatiŋ ponn ni, le kijaak toŋ kpan kpan. Benjaminn aajab aa nan kee bee ke bi ban bi kuln bi la.

³⁵ Uwumbɔr nan cha Israel yaab biken na nyaŋ Benjaminn aajab. Israel yaab biken na nan ku Benjaminn aajab ŋichur moninko ni ŋiŋmu, ni nkub la,

³⁶ le Benjaminn yaab ngbaan nin bee ke bi nyaŋ bi a. Israel aajab bi nan sil nyan sil ni butɔb pu na nan mak baah di bijab bi bɔr Gibea aatiŋ aapuwɔb na pu, nima pu le bi nan fenn ke bi san.

Israel yaab aah nan ŋa pu ki nyaŋ bi na

³⁷ Bijab bi nan bɔr n‑gbaan na nan chee nyan ni ki di toŋ Gibea aatiŋ ni, le ki yaa koo ki ponn ni ki ku unii umɔk nan bi ki ponn ni na.

³⁸ Israel aajab bi nan sil nyan sil butɔb pu na, ni biken na, nan siin tɔb limɔkl la. Bi nan nyi ke bi yaa ti kan liŋmanyuubɔɔl fii kitiŋ ngbaan ni kan,

³⁹ Israel yaab bi nan bi butɔb ni lipaal na fenn lir Benjaminn yaab pu. N‑yoonn mumina na, Benjaminn aajab nan puun ku Israel yaab piitaa la. Bi nan bui bibaa ke, “Mbamɔn, ti ki nyaŋ bi ke taah ti nyaŋni bi pu na la.”

⁴⁰ N‑yoonn ngbaan le limɔkl na fii; liŋmanyuubɔɔl nan piin ki bi fii kitiŋ ngbaan ni. Benjaminn aajab nan fenn lik bipuwɔb, le ni gar bi ke baatiŋ gaa mmii a.

⁴¹ N‑yoonn ngbaan le Israel yaab biken na daa fenn ni, le ijawaan sakpiin nan chuu Benjaminn aajab ngbaan; ba pu? bi nan bee ke Israel yaab biken nan ban bi kuln bi la.

⁴² Bi nan fenn bipuwɔb ke bi san ŋmar Israel yaab biken na chee ki di koo timoor ni; bi mu aa nan ŋmaa san ŋmar. Bi nan gaar Israel aajab bi dii bi na, ni bijab bi nan bi nyan ni kitiŋ ngbaan ni na aakaasisik ni la. Bi nan kuln bi.

⁴³ Israel yaab nan chɔb chuu baadim la, le ki nan ka bi pu, kaa di cha kina ki ti saa Gibea aawipuul wɔb, ki ku bi cha.

⁴⁴ Bi nan ku Benjaminn aajab bi nyi butɔb aabɔr mbamɔm na bijab ŋichur kipiik ni ŋiniin la.

⁴⁵ Biken na nan fenn ki di san toŋ timoor ni, Rimonn Aatakpal na wɔb. Bi nan ku bi mu ŋichur ŋiŋmu nsan ni. Israel yaab nan beenin ka bijab bi gur na pu ki ti fuu Gidom aatiŋ ni, ki ku bi mu ŋichur ŋilee.

⁴⁶ Baah nan ku Benjaminn aajab bi na nan ti kpaan bijab ŋichur moninko ni ŋiŋmu la, le bi mɔmɔk ye butɔb aajab bi kaar na.

⁴⁷ Bijab ikui iloob mu nan ŋmaa san ŋmar ki buen Rimonn Aatakpal na chee, ki nan koo nima ki ti saa iŋmal inaa.

⁴⁸ Israel yaab biken na nan fenn lir Benjaminn yaab bi gur na pu le ki ku bi mɔmɔk: bi nan ku bijab, ni bipiib, ni mbim, ni tiwakor mu. Bi nan see kitiŋ kimɔk bi lipepel ngbaan na.