Bibɔjirb 2 - Uwumbɔr aagbaŋ

Uwumbɔr aatuun aah buen Bokim pu na

¹ Uwumbɔr aatuun nan nyan Gilgal aatiŋ ni, ki buen Bokim aatiŋ ni, ki ti bui Israel yaab ke, “M nyan ni nimi Ijipt aatiŋ ni, ki di nimi dan kitiŋ ki m nan puu ke m ga di tii niyaajatiib na pu. M nan bui ke, ‘Maan bii tipuur ti m nan puu tii nimi na daalbaadaal.

² Ni taa puu tipuur tibaa tii binib bi koo kitiŋ kee ponn ni na. Ni ber baawaa aatork aabimbin.’ Le ni yii, kaa ŋa maah tuk nimi pu na. Maah tuk nimi ke ni taa ŋa pu na le ni tee ŋa.

³ Nima le m bui nimi ke naah tur koo binib bi ponn ni na, maan jenn nyan bi baatiŋ ni. Bi ga li ye nimi aadim la, le baawaa ga li ye gaawɔb tiib le ni chee.”

⁴ Uwumbɔr aatuun ngbaan aah len kina ti doo na, le Israel aanib mɔmɔk piin ki wii,

⁵ nima pu le bi nan yin nima chee ke Bokim. Le bi toor kitork nima chee tii Uwumbɔr.

Josua aakun aabɔr

⁶ Josua nan chɔi Israel aanib, le unii mɔk buen ti kal waatiŋ aah ye nin chee na.

⁷ Josua aamɔfal mɔmɔk ni, Israel aanib nan dii Uwumbɔr la, le waakun aapuwɔb na bi nan beenin dii Uwumbɔr; buyoonn bininkpiib bi nan bi ki kan Uwumbɔr aah nan tun ŋitukpaan ŋi tii Israel yaab na nan beenin bi na.

⁸ Uwumbɔr aatutunn Josua u aate nan ye Nunn na nan ti saa ŋibin nkub ni kipiik le ki nin kpo.

⁹ Bi nan di u sub ubaa aatiŋ, Timnaf Sera ki bi Efraim aanibol aatiŋ ki bi Gaas Aajool aaŋangan wɔb na ni la.

¹⁰ Josua aaŋeen aatɔtiib ngbaan mɔmɔk nan kpo doo, le binib bi nan paan ni bi pu na nan suln Uwumbɔr, ni waah nan tun pu tii Israel aanib na bɔr.

Israel yaab aah kaa ki dooni Uwumbɔr pu na aabɔr

¹¹ Le Israel aanib piin ki dooni ŋiwaa ŋi bi yin ŋi Baal na ki tun Uwumbɔr titunwanbir.

¹² Baa nan ki dooni Uwumbɔr u ye biyaajatiib Aadindaan ki nan nyan ni bi Ijipt aatiŋ ni na, le ki tee piin ki dooni binib bi koo gbɔk bi na aawaa. Bi nan gbaani ŋinimbiin ni, le ki fiin Uwumbɔr aaŋuul.

¹³ Bi nan di cha Uwumbɔr aadoon, le ki dooni liwaal Baal, ni liwaal Astaate.

¹⁴ Kina pu le Uwumbɔr aaŋuul nan fii Israel yaab pu sakpen, le u cha bijab gur looni bi ki su baawan. U nan cha bidim bi mɔmɔk mann goln bi ki ti ton na nyaŋ bi, le Israel yaab aa nan ki ŋmaa kiir bibaa.

¹⁵ N‑yoonn mumɔk bi buen butɔb ni na, Uwumbɔr aaŋuul nan ka bi pu, ke waah nan len pu na la. Bi nan gur bi mpombiin sakpiin ni la.

¹⁶ Le Uwumbɔr tii Israel yaab bisalolm bi ga gaa bi binib bi looni bi na chee lii na.

¹⁷ Israel yaab mu aatafal aa nan bi baasalolm ngbaan ni. Baa nan kii Uwumbɔr aamɔb, le ki dooni ŋiwaa. Bitetiib nan kii Uwumbɔr aamɔb, le binipɔm bimina ma nan kpaan di cha kina aatuln.

¹⁸ N‑yoonn mumɔk Uwumbɔr nan ti tii Israel yaab usaloln na, u ga nan ter usaloln ngbaan le ki gaa Israel yaab baadim chee lii. U nan ti kii bi kina le ki ti saa usaloln ngbaan aamɔfal aadoon. Baah nan ker idun, baafalaa ni limukl pu pu na, le Uwumbɔr san bi kinimbaak.

¹⁹ Le usaloln ngbaan yaa ti ti kpo kan, le binib ngbaan ki gir buen baatunwanbir ni, le ki tun ni bir jer biyaajatiib na. Bi nan dooni ŋiwaa, le ki tun tii ŋi, ki yii, kaan di cha baatunwanbir aatum.

²⁰ Le Uwumbɔr aaŋuul ti fii Israel yaab pu sakpen, le u bui ke, “Litimbol limina bii tipuur ti m nan bui biyaajatiib ke bi li joo ti na. Baah kaa kii maamɔb pu na,

²¹ maan ki jenn nyan ŋitimbol ŋi aanib beenin bi kitiŋ ngbaan pu Josua aakun yoonn na libaa aanib.

²² M ga di bima le lik ke Israel yaab bimina ga dii maasan ke biyaajatiib aah nan dii pu na aan baan dii.”

²³ Kina pu na, Uwumbɔr nan cha ŋitimbol ngbaan aanib gaar kitiŋ ngbaan pu; waa nan cha Josua nyaŋ bi, le Josua aah kpo na, Uwumbɔr aa kpaan jenn nyan bi.