Bibɔjirb 19 - Uwumbɔr aagbaŋ

Liifai aaja ubaa ni upuu aabɔr

¹ N‑yoonn ngbaan Israel yaab aa nan kee kpa ubɔr, le Liifai aanii ubaa nan bi Efraim aagongon aatiŋ ni, dandar. U nan bɔnn upiibo ubaa Betlehem aatiŋ ki bi Juda aatiŋ ni na ki di u kunn udo.

² Tɔ, daalbaadaal, u nan gee u pu liŋuul ki gir kun ute do Betlehem aatiŋ ni, ki ti bi nima ki ti saa iŋmal inaa.

³ Le uja ngbaan nan ŋa nlandak ke u ga paan u pu ki ti gaŋ u aan u gir ni. U nan yoor waanaagbiija ni ibon ilee, le bi di buen. Usapɔɔn ngbaan nan di Liifai aaja ngbaan koo ute do. Ute aah nan kan u na, u nan kpa mpopiin ki chann u tichann.

⁴ Ute ngbaan nan bui u ke u ŋa iwiin ilee, kina pu na, u nan doon nima iwiin itaa. U ni upuu ni uchootiib nan jin tijikaar le ki kpaan doon.

⁵ Bi nan fii winaa daal mala ki gor ke bi kun. Tɔ, upiibo ngbaan aate nan bui Liifai aanii ngbaan ke, “Ji man tijikaar waahr. Ni ga ter nimi. Nee aapuwɔb, ni ga nan buen.”

⁶ Kina pu na, bijab bilee ngbaan nan kpaan kal ki jin tijikaar ki nyun tiwanyukaan mu. Upiibo ngbaan aate nan ki bui u ke, “Ŋaanii ki doon do aan ki kan nibaa man.”

⁷ Liifai aaja ngbaan nan fii ke bi li cha, le uchool ngbaan gaŋ u ke bi doon, kina pu na, u nan ki gir doon nima.

⁸ Winŋmu daal aachakpinaanyeek ni le u nan ban u fii, le upiibo ngbaan aate ki bui ke, “Ŋaanii ki ji tijikaar. Ni ga nan ŋmaa buen nwiin pu.” Kina pu na, bijab bilee ngbaan nan ki kpaan kal ki ji.

⁹ Uja ngbaan, ni upuu ni waanaagbiija aah nan ki fii ke bi buen na, upiibo aate nan ki bui ke, “Lik, ni kpaan mue le na, ni ga ŋmaa doon. Ni ga mue dandana. Doon do man aan ki ji naah gee pu na. Ni ga fe ŋmaa pue ki kal nimi aasan pu ki kun.”

^10-11 Uja ngbaan aa nan ki ban bi doon nima, kina pu le u ni upuu fii kal baasan pu, le waanaagbiija, ni ibon ilee i tu ŋitun na dii bi. Ni nan ti bi joor le bi peen Jebus aatiŋ, Jerusalem aatiŋ le na, le unaagbiija ngbaan bui waaninkpel ke, “Ba ŋa naa cha ti doon Jebus yaab aatiŋ kee ni?”

^12-13 Waaninkpel nan gar u ke, “Taan sil kitiŋ ki kaa ye Israel aanib aatiŋ na ni. Ti ga jer le ki foor siib ki ti doon Gibea aatiŋ ni, bee Rama aatiŋ ni.”

¹⁴ Kina pu na, bi nan jer Jebus aatiŋ ngbaan le ki cha. Nwiin nan ban mu koo le bi fuu Gibea aatiŋ ki bi Benjaminn aanibol aapepel ni na.

¹⁵ Bi nan paal ke bi ti doon nima. Bi nan koo kitiŋ ngbaan ni, le ki ti kal kinyaŋ ni. Ubaa mu aa nan tee dan nan chɔi bi ke bi nan ti doon udo.

¹⁶ Baah nan ka nima na, le ujaninkpel ubaa nan nyan ni waasaak kijook wɔb. U nan puen bi Efraim aagongon aatiŋ ni la, le ki nan gur koo Gibea aatiŋ ni. Kitiŋ ngbaan ni aanib bi gur na nan ye Benjaminn aanibol yaab la.

¹⁷ Ujaninkpel ngbaan nan kan uchaan u ka kinyaŋ ni na, le ki baa u ke, “Aa nyan ni la chee? Aa cha la chee?”

¹⁸ Liifai aaja ngbaan nan gar u ke, “Ti buen Betlehem aatiŋ ki bi Juda aatiŋ pu na, le ki gir chaa kun tido Efraim aagongon aatiŋ ni. Taa kpa unii u ga bil timi udo kinyeek kee na.

¹⁹ Tɔ, ti kpa tijikaar ni timokuun ti tii timi aabon, le m ni mpuu ni maanaagbiija mu kpa timi aajikaar ni tiwanyukaan. Ti kpa tiwan ni mɔmɔk ti ban na.”

²⁰ Ujaninkpel ngbaan nan bui u ke, “Ni ga ti ŋmaa doon ndo. M ga ŋmaa joo nimi; naa ŋan ke ni doon kinyaŋ ni do.”

²¹ U nan di bi kunn udo, le ki ti kpiin baabon, le bi finn bitaa le ki jin tijikaar.

²² Bi nan bi ji ki mɔɔni, le bininsum bibaa nyan ni kitiŋ ni ki nan kpaan gob lidichal ngbaan ti ton ki gbaa jaaleŋ. Bi nan bui ujaninkpel ngbaan ke, “Nyan ni uja u ba dii si kun ni na. Ti ban ti doon u chee la.”

²³ Ujaninkpel ngbaan nan nyan bi chee lipaal le ki ti bui bi ke, “Njɔtiib, maa kii. M gaŋ nimi la, taa tun kininsuŋ aatunwanbir timina man. Uja wee ye maachaan la.

²⁴ Lik man, upuu ni min mbaa aabisal u kaa kee nyi uja na sɔ. M ga nyan ni bi nan tii nimi. Ni ga ŋmaa ŋa bi naah gee pu na. Ni taa tee ŋa uja wee inimɔɔn sakpiin aawan nee.”

²⁵ Bijab ngbaan aa nan ban ke bi ŋun tii u. Kina pu na, Liifai aajab ngbaan nan nyan upuu lipaal le ki di u tii bi. Bi nan chuu u mpɔɔn ki doon u chee, ki bii u kina, kaa di cha, le kitaak ti woln.

²⁶ Lichakpitaawoln le upii ngbaan nan gir choo uchal chee, ujaninkpel ngbaan do, ki nan nyaa lir linaakɔbaal. U nan beenin dɔ nima chee le ni woln kpiir u pu.

²⁷ Uchal nan fii kichakpiik ngbaan ni ke u nab waasan pu, le waah piir jaaleŋ na, u kan upuu le dɔ linaakɔbaal aan uŋaal taln mu ti chuu jaaleŋ na.

²⁸ U nan bui ke, “Fii aan ti li cha.” Tɔ, upii aa nan deŋ. Kina pu le u nan yoor u ki di paan ubon pu, le ki di kal udo aasan pu.

²⁹ Waah ti fuu na, le u koo udo ki ti ban kijuk. U nan yoor linikpol ngbaan, le ki gii gii li nfum kipiik ni mulee pu, le ki di ligeln libaabaa tun ti tii Israel aanibol kipiik ni ŋilee ngbaan.

³⁰ Unii umɔk nan kan kina na nan bui ke, “Taa kee ŋun kina aabɔr pu. Israel yaab aah nyan ni Ijipt aatiŋ ni ki nan saa din na, kina aawan aa kee ŋa. Ni ŋan ke ti ŋa nibaa ti pu. Ni ga li ye ba?”