Bibɔjirb 18 - Uwumbɔr aagbaŋ

Maika ni Dann aanibol aabɔr

¹ Israel aatiŋ aa nan kpa ubɔr n‑yoonn ngbaan. N‑yoonn ngbaan, Dann aanibol aa nan kee kan baatiŋ Israel yaab biken chee, le ki chuun ban kitiŋ ke bi kal.

² Kina pu le Dann aanibol aanib nan nyan bijakaab biŋmu ŋidichal ŋi mɔmɔk bi linibol ngbaan ni na, le ki tun bi nyan Sora ni Estaol aatim ni, ke bi chuun ki lik kitiŋ ngbaan. Baah nan fuu ni Efraim aagongon aatiŋ pu na, bi nan koo Maika aadichal ni la.

³ Baah nan bi nima chee na, le bi bee Liifai aanachipɔɔn na aaliin, le ki buen u chee ki ti baa u ke, “Aa ŋani ba do? Ŋma joo ni si do?”

⁴ U nan gar bi ke, “M ni Maika le kpaan ki tun. U cha m tun utotoor aatuln, le u pa mi.”

⁵ Bi nan bui u ke, “Ŋaanii ki baa Uwumbɔr ke ti ga kan kinyaan timi aasachuln lee ni aan taan kan.”

⁶ Utotoor ngbaan nan gar bi ke, “Ni taa li san nibaa. Uwumbɔr le lik nimi lisachuln lee ni.”

⁷ Bijab biŋmu ngbaan nan nyan nima chee le ki buen Lais aatiŋ ni, ki nan kan binib ngbaan aah bi nsuudoon ni pu na. Bi nan bi nsuudoon ni ke Saidonn yaab na la. Bi nan ye nsuudoon aanib bi bi suuna na la, kaa kpa unii ubaa chee kijaak; bi nan kpa baah ban tiwan ni mɔmɔk na. Baah nan koo nin chee na nan daa Saidonn yaab sakpen, le bi ni binib biken aa kpa limaantɔl libaa.

⁸ Bijab biŋmu ngbaan aah nan gir kun Sora ni Estaol aatim ni na, bido yaab nan baa bi baah kan pu na.

⁹ Bi nan gar bi ke, “Fii man, cha ti ti tak Lais aatiŋ aanib man. Ti kan baatiŋ; ki ŋan sakpen a. Taa ka fam man. Ŋa mala man. Fii ki ti gaa ki man.

¹⁰ Ni yaa ti fuu nima chee kan, ni ga kan ke binib ngbaan aa dak nibaa pu. Ki ye kitisakpeŋ la; ki kpa unii aah ga ban tiwan ni mɔmɔk na. Uwumbɔr di ki tii nimi a.”

¹¹ Kina pu le Dann aanibol aajab ikui iloob nan nyan Sora ni Estaol ki gor bibaa ki cha butɔb.

¹² Bi nan buen le ki ti kuun kal Kiriaf Jearim aatiŋ ki bi Juda aatiŋ pu na aawilir wɔb. Nima pu le bi beenin yin nima chee ke Dann Aakakaa chee.

¹³ Bi nan nyan nima chee le ki di buen Maika do, Efraim aagongon aatiŋ ni.

¹⁴ Nima le bijab biŋmu bi nan chuun lik kitiŋ ki mann goln Lais aatiŋ na bui biŋeen aatɔtiib ke, “Ni ba nyi ke liwaal bi lidichal libaa ponn ni do aan bi di tikunabr boon li ii? Ŋiwaa ŋiken ni utotoor aabɔkugeŋ mu bi. Ni dak ke ti ga ŋa kinye?”

¹⁵ Bi nan koo Maika aadichal ni, nin chee Liifai aanachipɔɔn na koo na, le ki baa Liifai aanii ngbaan naah bi pu na.

¹⁶ N‑yoonn mue na, Dann aanibol aajab ikui iloob bi gor bibaa ki kii butɔb na, si mbisamɔb.

¹⁷ Bipepekb biŋmu na nan koo lidichal ngbaan ponn ni, le ki ti yoor liwaal li bi di tikunabr boon li na, ni ŋiwaa ŋiken na, ni utotoor aabɔkugeŋ na, le utotoor ngbaan nan beenin si mbisamɔb, bijab ikui iloob bi joo tijawan na chee.

¹⁸ Bijab ngbaan aah nan koo Maika do ki yoor ŋiwaa ngbaan na, le utotoor ngbaan baa bi ke, “Ni bi ŋani ba na?”

¹⁹ Bi nan bui u ke, “Ŋmin aamɔb. Taa ki waar aamɔb. Dan ki nan li ye timi aatotoor ni ususur. Saa ga li gee ke aa li ye Israel aanibomɔln aatotoor ki jer aa li ye ujabaan aadichal aatotoor aa?”

²⁰ Nimina nan piir utotoor ngbaan aasui sakpen, le u yoor ŋiwaa ngbaan ki di dii bi buen.

²¹ Bi nan fenn le ki siir cha; baabim, ni baawakor, ni baawan le nan loln bi pu nsan, le bi paa.

²² Baah buen dandar na, le Maika yin uŋeen aatɔtiib ke bi ti faa bi butɔb. Bi nan ti pii Dann aanibol aajab ngbaan,

²³ le ki teen bi pu. Dann aanibol aajab ngbaan nan fenn le ki baa Maika ke, “Ba ŋa? Kinipaak kee ban ba?”

²⁴ Maika nan gar bi ke, “Ni len kinye ke, ‘Ba ŋa?’ Ni yoor maatotoor ni maawaa ŋi m ŋa na ki di siir. M ki kpa ba?”

²⁵ Dann aanibol aajab ngbaan nan bui ke, “Aa yaa kaa ban ke aa fiin bijab bimina aaŋuul ke bi tak nimi kan, aa taa ki len tibaa. Ni yaa kaa ye kina kan, aa ni saadichal mɔmɔk ga kpo,”

²⁶ le ki siir cha. Maika nan kan ke baapɔɔn jer uyaan, le u fenn ki gir kun.

^27-28 Dann aanibol aajab ngbaan nan yoor Maika aah nan naan tiwan ni na, ni waatotoor na, le ki buen ti tak Lais aatiŋ ki ye nsuudoon aatiŋ, aan kaanib ŋmin suuna ki mu bi Bef Rehob aafataŋ ni na. Bi nan ku kaanib, le ki see ki lii. Lais aatiŋ nan daa Saidonn aatiŋ, le kaanib ni bibaa aa nan kpa limaantɔl, kina pu na, ubaa aa nan bi ki gaa bi lii. Dann aanib aajab nan gir maa kitiŋ ngbaan le ki kal nima.

²⁹ Bi nan kpeln kaayimbil Lais, ki gur joo biyaaja Dann u nan ye Jakob aajapɔɔn na aayimbil le yin ki.

³⁰ Dann aanibol aanib ngbaan nan di liwaal ngbaan siin ki dooni li, le ki di Gesom aajapɔɔn Jonatann ŋa baatotoor. Jonatann aayaaja le nan ye Moses. U ni uyaabitiib nan ye bitotoorb kina le ki ti saa n‑yoonn mu bi nan di bi buen tinaagbiir ni na.

³¹ Maika aawaal ngbaan nan bi nima chee n‑yoonn mu mɔmɔk Uwumbɔr Aabool nan bi Silo aatiŋ ni na.