Bibɔjirb 17 - Uwumbɔr aagbaŋ

Maika aawaa aabɔr

¹ Uja ubaa nan bi, ki nan koo Efraim aatiŋ ki ye ŋigongon aatiŋ na ni, le bi yin u ke Maika.

² U nan bui una ke, “Unii ubaa aah nan sun aa chee tikunabr aakur aamombil lichur libaa ni nkub na, aa nan puun lii udaan pu. M nan ŋun saah puun pu na. Lik, min le joo ŋi. Min le nan yoor ŋi.” Una nan bui u ke, “Maabo, Uwumbɔr ŋa waanyoor ŋa aa pu.”

³ Maika nan di ŋimombil ngbaan tii una, le una bui u ke, “Min mbaa aasui ni le m joo ŋimombil ngbaan tii Uwumbɔr aan tipuun ngbaan taa dan maabo pu. M ga cha bi di ŋi ŋa busub aawaal aanaŋ le ki di tikunabr ngbaan boon li. Kina le m ga di tikunabr aakur aamombil ngbaan ki giin tii si.”

⁴ Maika nan di ŋi giin tii una. Una nan lee ŋi pu timombibir ikui ilee ki di tii uchaa, le u ŋa liwaal aanaŋ. U nan di busub le kpii li, le ki di tikunabr aamombibir boon li. Bi nan di li siin Maika aadichal ni la.

⁵ Maika ngbaan nan gur kpa kiwaadiik la. U nan ŋa ŋiwaa ŋibaa, ni utotoor aabɔkugeŋ le ki di ujapɔɔn ubaa ŋa waatotoor.

⁶ Ubɔr aa nan kee bi Israel aatiŋ pu n‑yoonn ngbaan; unii mɔmɔk nan ŋani waageehn la.

⁷ N‑yoonn baan ngbaan Liifai aanachipɔɔn ubaa nan bi Betlehem, kitiŋ ki bi Juda aanibol aatiŋ ni na ni.

⁸ U nan fii Betlehem ke u ki ban nibaa chee ki kal. Waah nan bi chuun na, le u ti fuu Maika do, Efraim aagongon aatiŋ ni.

⁹ Maika nan baa u ke, “Aa nyan la chee?” U nan gar u ke, “M ye Liifai aanii le ki koo Betlehem aatiŋ ki bi Juda aanibol aatiŋ ni na. M bi ban nkakaa chee la.”

¹⁰ Maika nan bui u ke, “Li koo m chee. Li ye maasusur ni utotoor. M ga li tii si tikunabr aamombibir kipiik libiln mɔmɔk ni, ni tiwanpeenkaan, ni tijikaar ti aa ga li ji na.”

¹¹ Liifai aanachipɔɔn ngbaan nan kii ke u li koo Maika chee, le ki ŋa ke ujapɔɔn na.

¹² Maika nan di u ŋa waatotoor, le u koo Maika do.

¹³ Maika nan bui ke, “Tɔ, maah kan Liifai aanii aan u ŋa maatotoor na, m bee ke Uwumbɔr ga cha maatuln mɔmɔk toor.”