Bibɔjirb 16 - Uwumbɔr aagbaŋ

Samsonn aah nan bi Gasa aatiŋ ni pu na

¹ Daalbaadaal le Samsonn nan buen Gasa aatiŋ ni ki ti kan pateer ubaa ki doon u chee.

² Gasa aatiŋ aanib nan ŋun ke u bi nima chee, le ki gob nima chee ki kii u, kitiŋ ngbaan aabisamɔb chee kina, le kitaak ti woln. Baa nan ŋa kifuuk kinyeek, le ki dak bineen ni ke, “Ti ga cha ni woln la, le ti nin ku u.”

³ Samsonn nan doon le kitaak ti siir, le u fii ki chuu daa ŋɔb kitiŋ ngbaan aabisamɔb aajaaleŋ, ni idɔ, ni lilakl mɔmɔk. U nan di ni mɔmɔk buŋ ubɔgbiln pu, le ki di ti jon ligongoln li lik Hebronn aatiŋ na paab.

Samsonn ni Delila aabɔr

⁴ Nee aapuwɔb, le Samsonn aasui nan koo upii u bi yin u ke Delila na ni. Upii ngbaan nan koo Sorek Aafataŋ ni la.

⁵ Filistia aabɔrb biŋmu na nan buen upii ngbaan chee le ki ti bui u ke, “Ŋmann Samsonn aan u bui si waah ŋa pu ki ti kpa mpɔɔn sakpen kina na, ni taah ga ŋa pu ki nyaŋ u, aan ki buu u iŋmin, aan u taa ki ŋmaa ŋa nibaa na. Ti mɔmɔk ubaabaa ga tii si tikunabr aakur aamombil lichur ni nkub nkub.”

⁶ Kina pu le Delila nan bui Samsonn ke, “Ŋaanii ki bui mi tiwan ni cha aa kpa mpɔɔn sakpen kina na. Unii yaa ban ke u buu si iŋmin aan aa taa ki ŋmaa ŋa nibaa kan, u ga ŋa kinye?”

⁷ Samsonn nan gar u ke, “Bi yaa di itaŋmin i laa soon na ilole buu mi kan, m ga diŋ ke unii mɔmɔk aah bi pu na la.”

⁸ Kina pu na, Filistia yaab nan ti ban itaŋmin i laa soon na ilole nan tii Delila, le u di buu Samsonn.

⁹ U nan cha bijab bibaa si kidiik kiken ni ki kii. Samsonn aah doo na le u teen mpɔɔn pu ke, “Samsonn, Filistia yaab choo.” Le Samsonn nan daa keei itaŋmin ngbaan ke mmii aah meeh tikokonn kan, ti keei pu na la. Kina pu na, baa nan kee bee tiwan ni cha Samsonn kpa mpɔɔn kina na.

¹⁰ Delila nan ki bui Samsonn ke, “Lik, aa joo mi ŋani yaansara la, le kaa tuk mi mbamɔn. Ŋaanii ki bui mi unii aah ga ŋa pu ki buu si iŋmin na.”

¹¹ U nan gar u ke, “Bi yaa di iŋmipɔɔn i baa kee di i buu nibaa na buu mi kan, m ga diŋ ke unii mɔmɔk aah bi pu na la.”

¹² Kina pu na, Delila nan ban iŋmipɔɔn i baa kee di buu nibaa na, le ki di buu u. Waah buu u doo na, le u teen ke, “Samsonn, Filistia yaab choo.” Bijab ngbaan nan bi kidiik kiken ponn ni ki kii. Tɔ, u nan ki keei iŋmin ngbaan ke tikokonn na.

¹³ Delila nan ki bui Samsonn ke, “Aa beenin joo mi ŋani yaansara la, kaa tuk mi mbamɔn. Tuk mi unii aah ga ŋa pu ki buu si iŋmin na.” U nan gar u ke, “Aa yaa chuu maayikpir ti pal ŋiker ŋilole na, ki ŋa ti ke baah luu likekeln pu na, ki di nkpaa saŋ ti ni kan, m ga diŋ ke unii mɔmɔk aah bi pu na la.”

¹⁴ Delila nan pai u le u ti geen, le u chuu uyikpir ti pal ŋiker ŋilole pu na ki ŋa ti kina, le ki di nkpaa saŋ ti ni kin kin, le ki teen mpɔɔn pu ke, “Samsonn, Filistia yaab choo.” Tɔ, u nan finn le ki chuu daa nyan uyikpir kiŋmilol ngbaan ni.

¹⁵ Delila nan ki bui u ke, “Aa ŋmanni mi, le ki bui ke aa gee mi ii? Aa di mi ŋa ugbaan nfum mutaa le na, le kaa kee bui mi tiwan ni cha aa kpa mpɔɔn sakpen kina na.”

¹⁶ Iwiin mɔmɔk u nan baa u le ki gir baa u. Waah nan muk u ni pu ki ti cha ulaasaab nyan ubaa ni pu na pu, le u ti baan tuk u mbamɔn. U nan bui u ke, “Baa kee di kijuk meeh maayikpir.

¹⁷ Baah ma mi bundaal na, le bi di mi tii Uwumbɔr ke m li tun waatuln ki taa nyu ndaan mubaa. Bi yaa chee maayikpir pu kan, m ga diŋ ke unii mɔmɔk aah bi pu na la.”

¹⁸ Delila aah bee ke u sil tuk u mbamɔn na, le u tun ti bui Filistia aabɔrb na ke, “Ki gir ni nfum mubaa mue man. U tuk mi mbamɔn a.” Le bi nan gir ni ki joo ni ŋimombil ngbaan.

¹⁹ Delila nan pai Samsonn u ti geen utaa pu, le u yin uja ubaa, le u nan chuu gii nyan Samsonn aah pal uyikpir nfum mulole pu pu na. N‑yoonn ngbaan le Delila piin ki bi muk u, le waa nan ki kpa mpɔɔn.

²⁰ Delila nan teen mpɔɔn pu ke, “Samsonn, Filistia yaab choo.” U nan finn le ki dak usui ni ke, “M ga ti gaa mbaa lii ke maah ti ŋani pu na.” Waa nan nyi ke Uwumbɔr aa nan ki bi u chee.

²¹ Filistia yaab nan chuu u, le ki chuu lokr unimbil. Bi nan di u buen Gasa aatiŋ ni, le ki ti di tikumann aakululn baa u, le u nan n‑yon kiyondiik ni.

²² Tɔ, uyikpir nan piin ki ki bi muuni.

Samsonn aakun aabɔr

²³ Filistia aabɔrb ngbaan nan kuun tɔb ke bi nan ji njim ki toor kitork tii baawaal Dagonn. Bi nan gaa nlahn ke, “Timi aawaal le tii timi linyaŋ timi aadin Samsonn pu.”

^24-25 Bi nan bi ji baageehn, le ki bui ke, “Yin ni Samsonn man, cha ti cha u gbiir ngbiir tii timi man.” Baah nan nyan ni Samsonn kiyondiik ni na, bi nan cha u gbiir ngbiir tii bi, le ki cha u sil jaatɔlk tiib aasisik ni. Binib ngbaan aah kan u na, le bi gaa ilahn ki pak baawaal ke: “Timi aawaal cha ti nyaŋ timi aadin u kuln timi aatiŋ ki ku timi aanib sakpen na.”

²⁶ Samsonn nan bui ubo u dar u na ke, “Cha ŋŋaal meeh jaatɔlk tiib bi joo lidichal li na. M ban m sil din bi la.”

²⁷ Bijab ni bipiib le nan gbii lidichal ngbaan. Filistia aabɔrb biŋmu na mu nan bi li ponn ni, le bijab ni bipiib bi nan bi lidichal ngbaan aapaacham na mu ga nan li pii ŋichur ŋitaa, le ki lik Samsonn aah gbiir ngbiir pu tii bi na.

²⁸ Samsonn nan mee limeel ke, “Ndindaan Uwumbɔr, ŋaanii ki teer m bɔr; Uwumbɔr, ŋaanii ki ki tii mi mpɔɔn nfum mubaa, aan m di nfum mubaa teen Filistia yaab baah lokr nyan nnimbil ŋilee pu na pu.”

²⁹ Samsonn nan chuu jaatɔlk tiib bilee bi si sisik ni ki joo lidichal ngbaan na. U nan di uŋaal mubaa nyii jaatɔlk ubaa pu, ki di muken nyii uken pu, le ki tur bi,

³⁰ ki teen mpɔɔn pu ke, “Cha m ni Filistia yaab kpaan kpo.” U nan di waapɔɔn mɔmɔk tur, le lidichal ngbaan lir ni bibɔrb biŋmu ngbaan ni binib bi mɔmɔk gur na pu. Samsonn nan ku binib waakun daal ki jer waah nan laa fu pu na.

³¹ Ute aabim, ni udo yaab mɔmɔk nan dan ke bi nan yoor u. Bi nan yoor u giin kun ki ti sub u ute Manoa aakaakul ni, Sora ni Estaol aatim aasisik ni. U nan ye Israel yaab aasaloln ki ti saa ŋibin moninko la.