Bibɔjirb 15 - Uwumbɔr aagbaŋ

¹ Nee aapuwɔb, lijikacheel yoonn, le Samsonn nan buen u ti mann upuu ki joo u uŋoob u laa diin na. U nan tuk upuu aate ke, “M ban m koo mpuu aadiik ni la.” Ute mu aa nan tee kii ke u koo.

² U nan bui Samsonn ke, “M nan sil dak ke saa gee u la, kina pu na, m di u tii aajɔ. Tɔ, unaal ŋan jer u. Aa ga ŋmaa yoor uma.”

³ Samsonn nan bui ke, “Maah ga ŋa Filistia yaab pu n‑yoonn mue na aan li ye maataani.”

⁴ Kina pu le u nan buen ki ti chur iŋɔk ikui itaa. U nan di ilelee aajuu gbin gbin tɔb, le ki di timoor buu tam tam waah gbin gbin nin chee na.

⁵ U nan see timoor ngbaan mmii, le ki cha iŋɔk ngbaan di koo Filistia yaab aajikaabim aakpaakon ni. Waah nan ŋa kina na, waa nan see baah chee njikaabim mu na baanja le lii, mu nan laa si kaa kee chee na mu na wun, le olif aasui na mu wun.

⁶ Filistia yaab aah nan baa baa ke ŋma ŋa kina na, bi nan ŋun ke Samsonn aachool u nyan ni Timna aatiŋ ni na aah di Samsonn aapuu tii Samsonn aajɔ na le cha u ŋa kina. Kina pu na, Filistia yaab nan ti see mmii wun ku upii ngbaan, ni ute mu.

⁷ Samsonn nan bui bi ke, “Tɔ, kina le ni ga ŋa aa? M puu ke m yaa kaa teen nimi kan, maan di cha.”

⁸ U nan di liŋuusakpeln le tak bi ki ku bi pam. Waah ŋa kina na, le u buen ti bi Etam aajoomɔgbeln aatakpaluŋ kibaa ni.

Samsonn aah nyaŋ Filistia yaab pu na

⁹ Filistia yaab nan dan ki nan ŋa baakakaa Juda aatiŋ ni, ki buen ti tak Lehi aatiŋ.

¹⁰ Le Juda aajab baa bi ke, “Ti ni nimi kpa bɔr bayaar aan ni tak timi?” Bi nan gar Juda yaab ngbaan ke, “Ti dan ti nan chuu Samsonn le tinaagbiir ki ti ŋa u waah ŋa timi pu na.”

¹¹ Kina pu le Juda aajab ŋichur ŋitaa nan buen Etam aajoomɔgbeln aatakpaluŋ ngbaan chee ki ti bui Samsonn ke, “Saa nyi ke Filistia yaab le joo timi ii? Aa ŋa timi ba na?” U nan gar bi ke, “Baah ŋa mi pu na le m di giin ŋa bi.”

¹² Bi nan bui u ke, “Ti dan ke ti nan buu si iŋmin, le ki di si ti tii bi.” Samsonn nan bui bi ke, “Puu tii mi man ke nimi nibaa aan ku mi.”

¹³ Bi nan bui ke, “Tɔ, ti ban ti buu si iŋmin baanja le ki di si ti tii bi. Taan ku si.” Nima le bi nan di iŋmipɔɔn ilee buu u, le ki di u nyan ni lijoomɔgbeln ngbaan pu.

¹⁴ Waah ti fuu Lehi aatiŋ ni na, le Filistia yaab san choo u chee ki tar u pu. Libuul ngbaan ni le Uwumbɔr Aafuur Nyaan gbiin u ki cha u pɔɔk nyib, le u daa keei iŋmin i buu uŋaal na ke yaah ye tikokonn ti wun mmii na le na.

¹⁵ U nan kan ubon u laa kpo na aamɔkpaween dɔ. U nan boon ki pii mu, ki di mu ku bijab lichur.

¹⁶ Nima pu le Samsonn nan gaa nlahn ke, “M di ubon aamɔkpaween ku bijab lichur; ubon aamɔkpaween le m di ku bi le ki kuun bi ŋikpuk ŋikpuk bil.”

¹⁷ Waah ŋa kina doo na, le u di mmɔkpaween ngbaan mee. Tiwan nee aah nan ŋa nin chee na, bi yin nima chee ke Ramaf Lehi.

¹⁸ N‑yoonn ngbaan le nnyunyuu chuu Samsonn, le u yin Uwumbɔr ki bui ke, “Aa tii mi linyaŋ sakpeln; aa ga cha nnyunyuu le ku mi aan Filistia aanifam ngbaan nan chuu mi ii?”

¹⁹ Uwumbɔr nan piir libugeln libaa Lehi aatiŋ ni nima chee, le nnyun nyan ni li ni. Samsonn nan nyun mu, le uwon ki sɔŋ. Kina pu le bi nan yin uyayak aanyunbun ngbaan ke Enn Hakore; mu beenin bi nima, Lehi aatiŋ ni.

²⁰ Samsonn le nan ye Israel yaab aasaloln ki ti saa ŋibin moninko, buyoonn Filistia yaab joo Israel aatiŋ na.