Bibɔjirb 14 - Uwumbɔr aagbaŋ

Samsonn ni Timna aatiŋ aasapɔɔn aabɔr

¹ Daalbaadaal le Samsonn nan di buen Timna aatiŋ ni, le ki ti kan Filistia aasapɔɔn ubaa nima chee.

² U nan gir kun le ki ti bui ute ni una ke, “Filistia aasapɔɔn ubaa bi Timna aatiŋ ni ki koo nsui ni sakpen. Ban u tii mi man; m gee ke m di u ŋa mpuu.”

³ Ute ni una nan baa u ke, “Ba ŋa aa ban aa ti ban upii, nifam bimina ni? Saan ŋmaa kan usapɔɔn timi aataŋaal ponn ni, timi aanib mɔmɔk ni ii?” Le Samsonn nan bui ute ke, “Uma ngbaan le m ban ke aa chɔi tii mi. M gee uma la.”

⁴ Ute ni una aa nan nyi ke Uwumbɔr le bi ŋani kina. Uwumbɔr le nan bi ban nsan ke u ban Filistia yaab kijaak. N‑yoonn mumina na Filistia yaab le nan joo Israel yaab.

⁵ Kina pu na, Samsonn nan di ute ni una buen Timna aatiŋ ni. Baah nan bi ŋisubil aasar ponn ni ki cha na, u nan ŋun uchinn ubaa bi ŋuuni.

⁶ Libuul ngbaan ni le Uwumbɔr Aafuur Nyaan gbiin Samsonn, le u pɔɔk nyib, le u di uŋaal chuu uchinn ngbaan ki daa par u, ke waah ye uŋobo le na. Tɔ, waa nan kpiir tuk ute ni una waah ŋa pu na,

⁷ le ki buen ti gbaa usapɔɔn ngbaan chee tibɔr, ki gee u.

⁸ Naa nan yunn le Samsonn nan gir ke u ti yoor u ki di ŋa upuu. Waah nan cha na, le u paal ke u ti lik waah nan ku uchinn u na, le ki ti muin inangbee ni tisiir bi lichinkpol ngbaan ni.

⁹ U nan di uŋaal bɔ tɔk tisiir ngbaan le ki joo ji cha. U nan joo tibaa ti tii ute ni una. Bi nan jin ti, Samsonn mu aa nan tee tuk bi ke u nyan tisiir ngbaan lichinkpol aaponn ni la.

¹⁰ Ute nan buen usapɔɔn ngbaan do, le Samsonn ti ŋa njim sakpem nima. Binachipɔm aakaal mubaa le nan na.

¹¹ Filistia yaab aah kan u na, le bi cha binachipɔm piitaa ti bi u chee.

^12-13 Samsonn nan bui bi ke, “Cha m ŋakl nimi liyataŋakl libaa. Ni yaa ŋmaa tuk mi laatataa aan tibɔndinn aajim mue aawiin ilole nin fuu kan, m ga tii ni mɔmɔk ubaabaa litanyaan, ni tiwanpeenkaan nyaan. Ni yaa kaa ŋmaa tuk mi laatataa kan, nimi le ga tii mi ŋitanyaan piitaa ni tiwanpeenkaan nyaan piitaa.” Bi nan bui u ke, “Ŋakl saayataŋakl ngbaan aan ti ŋun.”

¹⁴ U nan bui bi ke, “Uwanjir ponn ni le tiwanjikaan nyan ni; Mpɔɔndaan ni le tiwamɔɔn nibaa nyan ni.” Iwiin itaa nan jer, le baa kee ŋmaa bee laatataa.

¹⁵ Winaa daal le bi bui Samsonn aapuu ke, “Ŋmann aachal aan u bui timi liyataŋakl ngbaan aatataa. Aa yaa kaa ŋa kina kan, ti ga see aate aadichal lii, le ki kpaan see aa mu mmii. Nimi bilee bimina yin ni timi ke ni nan su timi kinaayuk la, naa ye kina aa?”

¹⁶ Kina pu na, Samsonn aapuu nan wii tinyunyunn le ki ti bui u ke, “Saa gee mi. Aa nan mi la. Aa baa ndo yaab liyataŋakl, kaa bui mi laatataa.” U nan bui u ke, “Lik, maa tuk nte ni nna bibaa laatataa, m ga ŋa kinye ki tuk aa ma?”

¹⁷ Upuu nan wii li pu kina le tibɔndinn aawiin ilole ngbaan ti saa. Tɔ, winlole daal le u nan tuk upuu laatataa aah ye pu na, ba pu? u nan cha ulaasaab ti nyan ubaa ni. Le u mu ti di tuk Filistia yaab ngbaan.

¹⁸ Kina pu na, winlole ngbaan daal, waahr aan Samsonn koo u ti doon na, le kitiŋ ngbaan ni aanib ngbaan bui u ke, “Ba ki mɔ jer tisiir? Ba ga ki li pɔɔ jer uchinn?” Samsonn nan gar bi ke, “Ni yaa kaa ba joo maanaasal le ko kan, naa ba ga bee maayataŋakl aatataa.”

¹⁹ Libuul ngbaan ni, le Uwumbɔr Aafuur Nyaan gbiin u, ki cha u pɔɔk nyib, le u buen Askelonn aatiŋ ni, ki ti ku bijab piitaa, ki chuu peer baawanpeenkaan nyaan nan tii bijab piitaa bi tuk u liyataŋakl ngbaan aatataa na. Nee aapuwɔb le u gir kun, le baah ŋmann u pu na aaŋuul ban li ti ku u.

²⁰ Tɔ, bi nan di upuu tii uja u nan ter u tibɔndinn aajim ngbaan ni na.