Bibɔjirb 13 - Uwumbɔr aagbaŋ

Baah ma Samsonn pu na

¹ Israel yaab nan ki gir tun Uwumbɔr titunwanbir, le u cha Filistia yaab joo bi ki ti saa ŋibin imonko ilee.

² N‑yoonn ngbaan le Sora aatiŋ ni aaja ubaa nan bi, le bi yin u ke Manoa. U nan ye Dann aanibol ni aanii la. Upuu aa nan ŋmaa maa ubo.

³ Uwumbɔr aatuun nan dan upii ngbaan chee le ki nan bui u ke, “Saa kee ma ubo, tɔ, aa ga gbeen dek ki maa ubijabo.

⁴ Li nyi ki taa nyu ndaan, ki taa ji tijikaar ti kɔ Uwumbɔr chee na;

⁵ le aa yaa nan ma aajapɔɔn ngbaan kan, aa li nyi ki taa di kijuk meeh uyikpir, ba pu? ki nya nwiin mundaal aa ma u na, u ga li ye Uwumbɔr yoo le ki tun waatuln. Uma le ga piin ki nyan Israel aanib Filistia yaab aaŋaal ni.”

⁶ Upii ngbaan nan siir le ki ti bui uchal ke, “Uwumbɔr aaja ubaa dan m chee, ki kpa mi ijawaan ke Uwumbɔr aatuun na. Maa baa u ke u nyan ni la, u mu aa tuk mi waayimbil.

⁷ U tee bui mi ke m ga dek lipuul ki maa ubijabo. U tuk mi ke m taa ki nyu ndaan mubaa, ki taa ki ji tijikaar ti kɔ Uwumbɔr chee na; ba pu? ubijabo ngbaan ga nan li ye Uwumbɔr yoo, ki tun waatuln baanja, le ki ti saa waamɔfal mɔmɔk.”

⁸ Manoa nan mee Uwumbɔr ke, “Ndindaan, ŋaanii ki cha Uwumbɔr aanii u aa tun ni na gir ni, ki nan tuk timi taah ga nan li joo ubo ngbaan pu na.”

⁹ Uwumbɔr nan ŋa Manoa aah nan mee ban pu na, le ki cha waatuun ngbaan gir ni upii ngbaan chee, n‑yoonn mu u ka ikpaakon ni na. Uchal Manoa aa nan bi u chee.

¹⁰ Le u fii ki san mala ki ti bui u ke, “Lik, uja u nan dan m chee liyaadaal na ki dan.”

¹¹ Manoa nan fii le ki dii upuu buen. U nan ti sil uja ngbaan chee, le ki baa u ke, “Sin le nan bi len mpuu chee tibɔr na aa?” Le u kii ke, “Een.”

¹² Manoa nan ki bui u ke, “Saamɔbon yaa nan gbiin kan, ubo ngbaan ga ŋa ba aatuln? Waabimbin ga li bi kinye?”

¹³ Uwumbɔr aatuun ngbaan nan gar u ke, “Aapuu li nyi ki ŋa maah tuk u pu na mɔmɔk.

¹⁴ U taa ji tiwan nimɔk nyan ni ndaan aasubil aasub ni na; u taa nyu ndaan mɔmɔk, ki taa ji tijikaar ti kɔ Uwumbɔr chee na. U ŋa maah tuk u pu na mɔmɔk.”

^15-16 Manoa aa nan nyi ke Uwumbɔr aatuun ye, le ki bui ke, “Ŋaanii ki taa kee siir. Cha ti kɔr si uŋobo ubaa ki ŋaan tii si.” Le ntuun ngbaan nan bui ke, “M yaa gaar kan, maan ji nimi aajikaar. Aa yaa tee ban ke aa ŋa ti kan, di ti toor kitork ki see mmii ni tii Uwumbɔr.”

¹⁷ Manoa nan gar u ke, “Tuk timi saayimbil, aan saamɔbon yaa nan gbiin kan, ti nyuŋ si.”

¹⁸ Ntuun ngbaan nan baa ke, “Ba ŋa ni ban ni bee maayimbil? Li ye lijinjiir aayimbil la.”

¹⁹ Tɔ, Manoa nan ban uŋoob u laa diin na, ni njikaabim, ki di toor kitork, ki see mmii ni, litakpal aabimbiln paab, tii Uwumbɔr; le Uwumbɔr tun lijinjiir aatun.

^20-21 Imiigaal aah nan nyan libimbiln ngbaan pu ki fii paacham na, le Manoa ni upuu kan Uwumbɔr aatuun ngbaan bi imiigaal ngbaan ni, ki fii toŋ paacham. N‑yoonn ngbaan le Manoa nin bee ke uja na ba ye Uwumbɔr aatuun la, le u ni upuu tar lir kitiŋ bipuu pu. Baa nan ki kan ntuun ngbaan daalbaadaal.

²² Manoa nan bui upuu ke, “Tinimbil aah kan Uwumbɔr na, ti ga kpo.”

²³ Le upuu nan gar u ke, “Uwumbɔr yaa ba ban u ku timi kan, waa ba ga gaa timi aapiin; waa ba ga mɔk timi nimina mɔmɔk, kaa ba ga tuk timi tibɔr ti u len dandana wee na.”

²⁴ Upii ngbaan nan ma ubijabo, le ki yin u ke Samsonn. Ubo ngbaan nan ŋa unii, le Uwumbɔr ŋa waanyoor ŋa u pu.

²⁵ Le waah nan bi Dann aajab aakakaa ni, Sora ni Estaol aatim aakaasisik ni na, Uwumbɔr Aafuur Nyaan piin ki tii u mpɔɔn.