Bibɔjirb 12 - Uwumbɔr aagbaŋ

Jefta ni Efraim aanib aabɔr

¹ Efraim aajab nan gor bibaa ke bi buen butɔb; bi nan puur Jɔɔdann Aamɔɔl ki ti bi Safonn aatiŋ ni, le ki bui Jefta ke, “Ba ŋa aa nan puur kitiŋ aanaanmɔk ke aa ni Amonn yaab ti faa tɔb butɔb, kaa yin timi? Ti ga see saadichal ngbaan lii aa pu.”

² Jefta nan bui bi ke, “M ni maanib ni Amonn yaab nan kpa kijaasakpeŋ la. M nan yin nimi, le ni nan yii, kaa gaa mi bi chee lii.

³ Maah nan ti bee ke naan gaa mi lii na, le m di maamɔfal ŋa ŋŋaal ni, ki puur ke m ti faa bi butɔb, le Uwumbɔr cha m nyaŋ bi. Tɔ, ba ki ŋa aan ni choo ke ti nan jan?”

⁴ Nima pu le Jefta nan kuun ni Gilead aajab mɔmɔk nan kpaan, le bi ni Efraim yaab di pii tɔb, le u nyaŋ bi. Efraim yaab nan puen len ke, “Nimi Gilead yaab ye bichayiim le Efraim yaab ni Manase yaab chee.”

⁵ Gilead yaab nan ti gaa gaa baah puur Jɔɔdann Aamɔɔl nin chee na le ke Efraim yaab ngbaan ubaa taa ŋmar ki san. Efraim yaab ponn ni ubaa yaa nan ti ban u puur ki san ŋmar kan, Gilead aajab baa u le ke, “Aa ye Efraim aanii la aa?” Le u yaa bui ke, “Aayii” kan,

⁶ le bi bui u ke u len ke, “Shibolef.” Tɔ, u ga di len le ke, “Sibolef,” ba pu? waan ŋmaa len ni mbamɔm. Kina pu le bi ga bee u, ki chuu u, baah puur Jɔɔdann Aamɔɔl ŋipepel ŋi chee na libaa chee, ki ku u. N‑yoonn ngbaan bi nan ku Efraim aajab ŋichur imonko ilee ni ŋilee la.

⁷ Jefta nan joo Israel aanib ki ti saa ŋibin ŋiloob le ki nin kpo, le bi di u sub udo aatiŋ Gilead ni.

Bisalolm Ibsann, ni Elonn, ni Abdonn aabɔr

⁸ Jefta aakun aapuwɔb, le Ibsann u ye Betlehem aatiŋ aanii na joo Israel yaab.

⁹ U nan kpa japɔtiib piitaa, ni bisatiib mu piitaa la. U nan cha ubisatiib mɔn kidiyayaŋ ni la, le u kan ni bisapɔm piitaa nan tii ujapɔtiib. Ibsann nan joo Israel yaab ki ti saa ŋibin ŋilole la,

¹⁰ le ki kpo, le bi di u sub Betlehem aatiŋ ni.

¹¹ Ibsann aah nan kpo na, le Sebulunn aatiŋ aanii Elonn mu nan joo Israel aanib ki ti saa ŋibin kipiik.

¹² U nan kpo, le bi di u sub Aijalonn aatiŋ ki bi Sebulunn aapepel ni na.

¹³ Elonn aapuwɔb na, Hilel aajapɔɔn Abdonn u nyan ni Piratonn aatiŋ ni na mu nan joo Israel yaab.

¹⁴ U nan kpa japɔtiib imonko ilee, ni yaabitiib piitaa la, le bi mɔmɔk imonko itaa ni kipiik ngbaan kpa ibon imonko itaa ni kipiik. Abdonn nan joo Israel aanib ki ti saa ŋibin ŋiniin la,

¹⁵ le ki nin kpo. Bi nan sub u Piratonn aatiŋ ki bi Efraim aapepel li ye ŋigongon aatiŋ ki bi Amalek yaab aatiŋ pu na ni la.