Bibɔjirb 11 - Uwumbɔr aagbaŋ

¹ Jefta nan ye butɔb aaja u kaar na la. U nan ye Gilead aatiŋ aanii, le una ye upii u joo ubaa kooh na. Bi nan yin ute ke Gilead,

² le u ni upuu nan ki kpa japɔtiib biken, le baah ŋa binib na, bi jenn nyan Jefta bite do. Bi nan bui u ke, “Saan ji tite aafaal libaa; aa ye ubɔnbo la.”

³ Jefta nan san ute aabim chee, le ki ti koo Tob aatiŋ ni. Nima chee le u ti kan maabitibaanidam bibaa, le bi ni uma chuun dii.

⁴ Ni nan ye n‑yoonn mubaa aapuwɔb le Amonn yaab ti faa Israel yaab butɔb.

⁵ Kina aah nan ŋa na, le Gilead aasalolm buen ti yoor ni Jefta, Tob aatiŋ ni.

⁶ Bi nan bui u ke, “Dan nan loln ti pu nsan aan ti ŋman ki jan Amonn yaab kijaak.”

⁷ Jefta mu nan giin kii bi ke, “Ni nan nan mi sakpen, le ki ti kpaan jenn nyan mi nte do. Ni ki ŋa kinye ki choo m chee ke ni bi tibɔr ni la?”

⁸ Bi nan bui Jefta ke, “Naah ŋa pu aan ti choo aa chee dandana na le ye ke ti ban ke ti ni sin dii ti jan Amonn yaab kijaak, aan aa loln Gilead aanib mɔmɔk pu nsan.”

⁹ Jefta nan bui bi ke, “Ni yaa di mi giin linampal ke m ti jan Amonn yaab kijaak aan Uwumbɔr yaa tii mi linyaŋ kan, min le ga li ye nimi aajojoor.”

¹⁰ Bi nan gar ke, “Ti kii. Uwumbɔr le ye timi aaseeraadaan.”

¹¹ Kina pu le Jefta nan gir dii Gilead aasalolm ngbaan, le binib ngbaan di u ŋa baajojoor, ni usaloln. Jefta nan tuk bi waalandak Mispa aatiŋ ni, Uwumbɔr aanimbiin ni la.

¹² N‑yoonn ngbaan le Jefta nan tun ituun Amonn yaab aabɔr chee ke, “Sin ni timi aajaak ye kinye? Ba ŋa aa koo timi aatiŋ ni?”

¹³ Amonn yaab aabɔr aah nan gar Jefta aatuun ngbaan pu na sɔ: “Israel yaab aah nan nyan ni Ijipt aatiŋ ni pu na, bi nan gaa maatiŋ ki nyan Anonn Aamɔɔl mɔk ki ti saa Jabok, ni Jɔɔdann Aamɔɔl mɔk la. Tɔ, ni giin kitiŋ ngbaan suuna tii timi.”

¹⁴ Jefta nan ki di tibɔr timina le giin Amonn yaab aabɔr chee ke:

¹⁵ “Naa ye mbamɔn ke Israel yaab nan gaa Moab yaab ni Amonn yaab aatim.

¹⁶ Naah nan ŋa pu na sɔ: Israel yaab aah nan nyan Ijipt aatiŋ ni na, bi nan di bɔ dii nteersakpiin ni ki ti saa Limɔɔkal Aanyusakpem chee, le ki yoor ti fuu Kades.

¹⁷ Nima chee le bi nan tun ituun Edom aabɔr chee ke u tii bi nsan aan bi bɔ waatiŋ ni jer. Tɔ, Edom aabɔr aa nan kii. Bi nan mee Moab aabɔr mu nsan, le u mu aa nan tii bi nsan ke bi bɔ waatiŋ ni jer. Kina pu le Israel aanib ngbaan nan gaar Kades aatiŋ ni.

¹⁸ Nee aapuwɔb le Israel yaab nan ki di koo nteersakpiin ni, ki gɔln Edom aatiŋ, ni Moab aatiŋ, ki ti fuu Moab yaab aatiŋ aawipuul wɔb, Anonn Aamɔɔdapuul. Bi nan laa kal nima, bi mu aa nan tee puur Anonn Aamɔɔl li nan ye Moab aatinaanmɔk na.

¹⁹ Nima chee le Israel yaab nan tun ituun Amor yaab Aabɔr Sihonn u nan bi Hesbonn aatiŋ ni na chee, ki mee nsan ke bi bɔ waatiŋ ni ki jer buen bido aatiŋ pu,

²⁰ le Sihonn aa nan kii ke Israel yaab bɔ waatiŋ ni jer. U nan kuun waatɔb aajab mɔmɔk nan kpaan, le bi ti kuun kal Jahas aatiŋ ni, le ki nyan nima ti tak Israel yaab.

²¹ Tɔ, Israel yaab Aadindaan Uwumbɔr nan cha Israel yaab nyaŋ Sihonn ni waajab. Kina pu le Israel yaab nan gaa Amor yaab bi nan koo kitiŋ ngbaan pu na aapepel mɔmɔk.

²² Bi nan gaa Amor yaab aapepel mɔmɔk ki nyan Anonn Aamɔɔl li bi ŋŋangii wɔb na ki ti saa Jabok Aamɔɔl li bi ŋŋangan wɔb na, ki nyan nima ki yoor nteersakpiin ni, liwipuul wɔb, ki ti saa Jɔɔdann Aamɔɔl mɔk liwilir wɔb.

²³ Kina pu na, Israel yaab Aadindaan Uwumbɔr le nan jenn nyan Amor aanib tii waanib Israel yaab.

²⁴ Aa ban ke aa pɔɔn aabaa ki ki gaa kitiŋ ngbaan la aa? Li joo saawaal Kemos aah tii si tiwan nimɔk na. Ti ban ti li joo Tidindaan Uwumbɔr aah di ni tii timi na la.

²⁵ Aa dak ke sin le jer Sipor aajapɔɔn Balak u nan ye Moab aatiŋ aabɔr na aa? U kee kpak Israel yaab aa? U kee faa timi butɔb aa?

²⁶ Ŋibin ikui itaa le na, le Israel yaab joo Hesbonn ni Aroer aatim, ni ntim mu mann goln mu na, ni ntim mu mɔmɔk bi Anonn Aamɔɔl aagbaan na. Ba ŋa saa ŋmaa gaa mu n‑yoonn ngbaan mɔmɔk ni?

²⁷ Mbamɔn, maa tun si taani ubaa. Saah bi ban mi kijaak na, aa bi tun taani le na. Uwumbɔr le ga len. U ga len Israel yaab ni nimi Amonn yaab aabamɔn din wee.”

²⁸ Tɔ, Amonn aabɔr aa nan di Jefta aabɔr tee yin nibaa.

²⁹ N‑yoonn ngbaan le Uwumbɔr Aafuur Nyaan gbiin Jefta. U nan bɔ dii Gilead ni Manase aatim ni, ki gir ni Mispa aatiŋ ki bi Gilead ni na, le ki di buen Amonn aatiŋ ni.

³⁰ Jefta nan puu tii Uwumbɔr ke, “Aa yaa cha m nyaŋ Amonn yaab ki gir choo kan,

³¹ tiwan ni puen nyan ni maadichal ni ke ni nan tooh mi nsan ni na, m ga di ni see mmii ni ipiin tii si. M ga di ni tii si ipiin.”

³² Jefta nan puur limɔɔl ngbaan ke u ni Amonn yaab ti pii tɔb, le Uwumbɔr nan cha u nyaŋ bi.

³³ U nan peer bi Aroer aatiŋ ni, le ki ti saa lipepel li bi Minif aatiŋ chee na, mu nan ti kpaan ntim moninko la, le ki nyan nima chee ki ti saa Abel Keramim, ki ku binib pam. Kina le Israel yaab nan nyaŋ Amonn yaab.

Jefta aabisal aabɔr

³⁴ Jefta aah gir kun Mispa aatiŋ ni na, ubisal nan nyan ni ke u tooh ute nsan ni, le ki yikr nchayakrtuun, ki waa liwaal. Uma le nan ye waabobaal li u kpa na.

³⁵ Waah kan u na, le u daa kar waawanpeenkaan mpombiin pu, le ki bui ke, “Mbisal, aa bii nsui. Ni ŋa kinye aan sin le tii mi iyiween? M puu tipuukpaan tii Uwumbɔr, kaan ki ŋmaa bii ti.”

³⁶ U nan gar ute ke, “Aa yaa puu tipuur tii Uwumbɔr kan, ŋa saah len ke aa ga ŋa pu na, ba pu? Uwumbɔr cha aa teen saadim Amonn yaab a.”

³⁷ U nan tee mee ute ke, “Ŋa tiwan nee tii mi. Cha m li bi mbaa pu iŋmal ilee, aan m ni nnaakoon tiib ga ŋmaa dii buen ŋijoo ni, ki ti wii maah ga kpo kaa nyi uja na pu.”

³⁸ Ute nan bui u ke u li cha, le ki cha u buen ki ti saa iŋmal ilee. U ni unaakoon tiib nan buen ŋijoo ni, ki ti wii, waah ga kpo, kaa mɔn tichar, kaa kpa ubo pu na pu.

³⁹ Iŋmal ilee ngbaan aah jer na le u gir ni ute chee. U nan ŋa waah nan puu pu tii Uwumbɔr na, le ubisal nan kpo kaa nyi uja. Nima chee le Israel yaab aakaal mue nan piin

⁴⁰ ke bipiisapɔm buen timoor ni iwiin inaa, libiln mɔk ni, ki ti wii Gilead aanii Jefta aabisal pu.