Bibɔjirb 10 - Uwumbɔr aagbaŋ

Usaloln Tola aabɔr

¹ Abimelek aakun aapuwɔb, le Pua aajapɔɔn Tola, u aayaaja nan ye Dodo na dan u nan gaa Israel aanib lii. U nan ye Isakar aanibol ni aanii la, le ki koo Samir aatiŋ ki bi Efraim aagongon aatiŋ pu na.

² U nan ye Israel aanib aasaloln ki ti saa ŋibin moninko ni ŋitaa la. U nan kpo, le bi di u sub Samir aatiŋ ni.

Usaloln Jair aabɔr

³ Tola aah nan kpo na, le Jair u nyan ni Gilead na paan u pu ki ye usaloln. U nan joo Israel aanib ki ti saa ŋibin moninko ni ŋilee.

⁴ U nan kpa japɔtiib piitaa, le bi dik ibon piitaa pu. Bi nan kpa ntim piitaa le Gilead aatiŋ pu. Bi beenin yin mu ke Jair aatimbim la.

⁵ Jair nan kpo, le bi di u sub Kamonn aatiŋ ni.

Usaloln Jefta aabɔr

⁶ Israel aanib nan ki piin ki dooni ŋiwaa Baal, ni Astaate, le ki tun Uwumbɔr titunwanbir. Bi nan ki dooni Siria yaab, ni Saidonn yaab, ni Moab yaab, ni Amonn yaab, ni Filistia yaab aawaa mu. Bi nan suln Uwumbɔr bɔr, kaa ki dooni u.

⁷ Kina pu na, Uwumbɔr aaŋuul nan fii Israel yaab pu, le u cha Filistia yaab ni Amonn yaab nyaŋ bi.

⁸ Bi nan muk ki ku Israel yaab bi nan bi Gilead aatiŋ ki bi Amor yaab aatiŋ ki bi Jɔɔdann Aamɔɔl aawipuul wɔb na ki ti saa ŋibin kipiik ni ŋiniin.

⁹ Hali Amonn yaab nan puur Jɔɔdann Aamɔɔl ki ti faa Juda, ni Benjaminn, ni Efraim aanibol ŋi bi nima na butɔb. Israel aanib nan bi mpombiin sakpiin ni la.

¹⁰ Le Israel yaab ngbaan nan wii yin Uwumbɔr ki bui ke, “Timi Aawumbɔr, ti tun si titunwanbir, ti di si lii, le ki dooni Baal aawaa.”

¹¹ Uwumbɔr aah nan tii bi ngarm mu na sɔ: “Ijipt yaab, ni Amor yaab, ni Amonn yaab, ni Filistia yaab,

¹² ni Saidonn yaab, ni Amalek yaab, ni Maonn yaab nan muk nimi n‑yaayoonn na, le ni wii yin mi. Maa nan gaa nimi lii ii?

¹³ Tɔ, ni nan ki yii mi ki dooni ŋiwaa, kina pu na, maan ki gaa nimi lii.

¹⁴ Li cha ti li yin man ŋiwaa ŋi ni lee ke ni ban na. Ni yaa bi limukl ni kan, ni cha ŋima gaa nimi lii.”

¹⁵ Le Israel aanib ngbaan nan bui Uwumbɔr ke, “Ti tun titunwanbir a. Ŋa saah gee pu na, tɔ, aa mu tee gaa timi lii din wee.”

¹⁶ Bi nan di ŋiwaa lii, le ki dooni Uwumbɔr, le baapombiin aabɔr nan ki muk u.

¹⁷ N‑yoonn ngbaan le Amonn yaab gaar ke bi buen butɔb, ki ti kuun bi Gilead aatiŋ pu, le Israel aajab mu kuun tɔb ki ti kal Mispa aatiŋ ki bi Gilead aatiŋ ni na ni.

¹⁸ Nima chee le Israel aanib, ni ŋinibol ngbaan aaninkpiib baa tɔb ke, “Ŋma ga loln timi nsan Amonn yaab aatɔb bue ni? Unii u loln ti pu nsan na le ga ŋa Gilead aanib mɔmɔk aasaloln.”