Bibɔjirb 1 - Uwumbɔr aagbaŋ

Juda ni Simeonn aanibol aah nyaŋ Adonibesek pu na

¹ Josua aah nan kpo na aapuwɔb le Israel aanib baa Uwumbɔr ke, “Lilanibol ga puen buen ti tak Kanaann aanib.”

² Le Uwumbɔr gar bi ke, “Juda aanibol le ga puen buen. M ga cha bi gaa kitiŋ ngbaan.”

³ Le Juda aanib bui Simeonn aanibol aanib ke, “Dii timi, ti buen baah di lipepel li tii timi na man, aan ki ti ter timi ti jan Kanaann aanib, le ti mu dii nimi buen baah di lipepel li tii nimi na.” Kina pu na, Simeonn aanibol,

⁴ ni Juda aanibol nan kpaan le ki buen butɔb ni. Uwumbɔr nan tii bi linyaŋ, Kanaann ni Peres aanibol pu, le bi nyaŋ butɔb aajab ŋichur kipiik, Besek aatiŋ pu.

⁵ Bi nan ti kan Adoni Besek nima chee le bi ni u jan.

⁶ U nan san, le bi san dii u, ki ti chuu u, le ki geei uŋanbijam ni utaaŋanbijam.

⁷ Le Adoni Besek bui ke, “Bibɔrb imonko itaa ni kipiik bi aaŋanbijam ni bitaaŋanbijam geei na, nan peei ŋijikaabol maasambil taab. Maah nan ŋa bi pu na, le Uwumbɔr di ŋa mi din na.” Bi nan di u buen Jerusalem aatiŋ ni, le u ti kpo nima.

Juda aanibol aah nyaŋ Jerusalem ni Hebronn aatim pu na

⁸ Juda aajab nan tak Jerusalem aatiŋ le ki nyaŋ ki. Bi nan ku kaanib, le ki see ki mmii lii.

⁹ Nee aapuwɔb le bi buen ti faa Kanaann yaab bi koo ŋigongon aatiŋ pu na, ni bi koo taataab aagongon ni na, ni bi koo kitikuun ki bi ŋŋangii wɔb na mu.

¹⁰ Bi nan buen ti tak Kanaann yaab bi koo Hebronn aatiŋ ki bi nan laa yin ki ke Kiriaf Aba na. Nima chee le bi nan nyaŋ Sesai, ni Ahimann, ni Talmai aataŋaal pu yaab.

Otniel aah nan nyaŋ Debir aatiŋ pu na

¹¹ Juda aajab nan nyan nima chee le ki ti tak Debir aatiŋ, n‑yoonn ngbaan bi nan laa yin ki ke Kiriaf Sefer la.

¹² Le bi ponn ni ubaa, bi yin u ke Kaleb, bui ke, “M ga di mbisal Aksa tii uja u nyaŋ Kiriaf Sefer aatiŋ na, u di ŋa upuu.”

¹³ Otniel u nan ye Kaleb aanaal Kenas aajapɔɔn na le nan nyaŋ kitiŋ ngbaan, le Kaleb di ubisal Aksa tii u.

¹⁴ Waabɔndinn daal le Otniel nan saa u ke u mee ute kitiŋ. Le u nan sunn waabon pu, le Kaleb bui u ke u tuk u waah ban tiwan ni na.

¹⁵ Le u gar ke, “M ban kitiŋ ki kpa nnyun na la. Saah tii mi kitiŋ ki na ye kitikuun la.” Nima pu le Kaleb nan di paacham ni taab aatiŋ ki kpa nnyun na tii u.

Juda ni Benjaminn aanibol aah nan kan linyaŋ pu na

¹⁶ Moses aachool, u nan ye Kenn aanii na aayaabitiib nan nyan Jeriko, kitiŋ ki ye ŋibɔkpal aatiŋ na ni, ki dii Juda aanib buen kitikuun ki bi Arad aatiŋ aaŋangii wɔb, Juda aapepel ni na, le ki ti kal Amalek yaab chee nima.

¹⁷ Juda aanibol aanib, ni Simeonn aanibol aanib nan buen ki ti nyaŋ Kanaann aanib bi bi Sefaf aatiŋ ni na. Bi nan kuln kitiŋ ngbaan, le ki yin ki ke Homa.

^18-19 Uwumbɔr nan ter Juda aanib, le bi gaa ŋigongon aatiŋ ngbaan. Bi mu aa nan tee ŋmaa nyaŋ Gasa, ni Askelonn, ni Ekronn aatim, ni mu aapepel. Binib ngbaan, bi nan koo nnyusakpem aagbaan na, nan kpa itaan aah dar tikur aatɔroku tiib, kina pu na, Juda aanib aa nan ŋmaa jenn nyan bi.

²⁰ Moses aah nan len pu na, le bi nan di Hebronn aatiŋ tii Kaleb, le u jenn nyan Anak aayaabitiib aataŋaal itaa i bi ki ponn ni na.

²¹ Tɔ, Benjaminn aanibol ma aa nan jenn nyan Jebus yaab bi nan koo Jerusalem ponn ni na, le Jebus yaab ngbaan, ni Benjaminn aanibol aanib beenin kpaan koo nima.

Efraim ni Manase aanibol aah nyaŋ Betel aatiŋ pu na

^22-23 Efraim ni Manase aanibol nan buen ti tak Betel aatiŋ, n‑yoonn ngbaan bi nan laa yin ki ke Lus la. Uwumbɔr nan ter bi. Bi nan tun bipepekb kitiŋ ngbaan ni,

²⁴ le bi ti kan uja ubaa nyan ki cha, le bi bui u ke, “Mɔk timi taah ga ŋa pu ki koo kitiŋ ngbaan ni na, aan ti taa ŋa si nibaa.”

²⁵ Le u mɔk bi, le Efraim ni Manase aanibol aanib ku kitiŋ ngbaan aanib mɔmɔk. Uja ngbaan ni waadichal baanja le nan gur.

²⁶ Puwɔb le u nan buen Hef yaab chee ki ti maa kitipɔŋ nima chee, ki yin ki ke Lus, le kitiŋ ngbaan beenin joo liyimbil ngbaan.

Israel yaab aah kaa nan jenn nyan binib bi na aabɔr

²⁷ Manase aanibol aa nan jenn nyan binib bi nan koo Bef Sann, ni Taanak, ni Dor, ni Ibleam, ni Megido aatim, ni ntim mu bi gbɔk mu na; Kanaann yaab nan beenin koo nima.

²⁸ Israel yaab aah nan moo pɔɔk na, le bi chuu Kanaann yaab mpɔɔn, le bi tun baatun, bi mu aa nan tee jenn nyan bi mɔmɔk.

²⁹ Efraim aanibol aa nan jenn nyan Kanaann yaab bi nan koo Geser aatiŋ ni na, kina pu na, Kanaann yaab ngbaan nan beenin koo bi chee la.

³⁰ Sebulunn aanibol aa nan jenn nyan binib bi nan koo Kitronn, ni Nahalal aatim ni na, kina pu na, Kanaann yaab ngbaan nan beenin koo bi chee nima, le bi chuu bi mpɔɔn, le bi tun baatuln.

³¹ Aser aanibol aa nan jenn nyan binib bi nan koo Ako, ni Saidonn, ni Alab, ni Aksib, ni Helba, ni Afek, ni Rehob aatim ni na.

³² Aser aanibol aanib, ni Kanaann yaab bi nan puen koo nima chee na le nan kpaan koo, ba pu? baa nan jenn nyan bi.

³³ Naftali aanibol aa nan jenn nyan binib bi nan koo Bef Semes, ni Bef Anaf aatim ni na. Naftali aanibol aanib ni Kanaann yaab bi nan puen koo nima chee na le nan kpaan koo, le bi chuu bi mpɔɔn, le bi tun baatuln.

³⁴ Amor aanib nan nyaŋ Dann aanibol, le bi ti koo ŋigongon aatiŋ pu, kaa kii ke bi dan kitiŋ ki dɔ taar na pu.

³⁵ Amor yaab nan beenin koo Aijalonn, ni Saalbim aatim ni, ni Heres Aajool pu, tɔ, bi nan tee bi Efraim ni Manase aanibol yaab aataab la, le ki tun baatuln.

³⁶ Amor yaab aatinaanmɔk nan yoor Sela aatiŋ aaŋangan wɔb le ki di bɔ dii Akrabim Aasan ni.