Inandalahn 5 - Uwumbɔr aagbaŋ

Linimbaasaln aameel

¹ Uwumbɔr, teer tiwan ni dan ti pu na. Lik ni timi, ki kan timi aanimɔɔn.

² Timi aawangol gur bi biwɔwɔm aaŋaal ni la; bima le koo timi aadichal ni.

³ Bidim le ku titetiib, le tinatiib gur ye bikpopiib.

⁴ Ti daa nnyun le ki nyu; ti daa idɔ le ki tuur mmii.

⁵ Bi jak timi mpɔɔn ke ibon ni laakumii tiib na la, le ti ti bak, le baan cha ti fuur.

⁶ Ti chuun mee Ijipt yaab ni Asiria yaab tijikaar ti ti ga ji ki li bi na la.

⁷ Tiyaajatiib le nan tun titunwanbir, le kaa ki bi din wee, le timi le bi ji baatunwanbir ngbaan aafalaa.

⁸ Binaagbiib soor binib bi joo timi na, le ubaa mu aan ŋmaa gaa ti bi chee ki lii.

⁹ Binikurb chuun kpak kitiŋ kee pu la; ti joo timi aamɔfal pa talmaa, le ki nya ti ban tijikaar.

¹⁰ Nkon cha fee fee ti ban u ku timi la, le tiwon ton jer kikpawuŋ.

¹¹ Bi chur tipuutiib mpɔɔn ki doo bi chee Sionn Aajool pu; bi chur tibisatiib mpɔɔn ki doo bi chee Juda aatim mɔmɔk ni la.

¹² Bi chur timi aayidam buen le ki ti leen bi iŋmin; ubaa aa ki pak timi aaninkpiib.

¹³ Bi chur timi aanachipɔm mpɔɔn le bi nan idi ke binaagbiib na; mbijabim tui idɔ i nyuun na le kaa ki ŋmaa chuun.

¹⁴ Bininkpiib aa ki kaa kitiŋ aabisamɔb chee, le binachipɔm ni bisapɔm aa ki waa liwaal.

¹⁵ Taa ki kpa mpopiin; mpombiin cha taa ki waa liwaal.

¹⁶ Taah nan mak tiwan ni pu na aa ki gur. Ti tun titunwanbir, le timi aamɔfal kuln.

¹⁷ Ti gur ye bibum la, le tinyunyunn cha taa ki waa,

¹⁸ ba pu? Uwumbɔr Aadichal Aajool gur nkuun la, le ikakal san nuuni laalangbenn ni.

¹⁹ Uwumbɔr, le aa ma ye ubɔr n‑yoonn mɔmɔk, ki ga li joo dulnyaa ki ti saa ndoon.

²⁰ Aa yii timi ni yunn sakpen a. Saan ki teer timi aabɔr la aa?

²¹ Uwumbɔr, giin ni timi aabaa chee. Giin ni timi. Taah nan kpa kipak ki n‑yaajayoonn na, giin ki tii timi.

²² Aa yii timi kookoo la aa? Saaŋuul aa kpa ndoon la aa?