Inandalahn 4 - Uwumbɔr aagbaŋ

Jerusalem aatiŋ aah nan lir pu na aapuwɔb

¹ Timi aasalmaa u nan moor lak lak na gur bɔn timm la. Uwumbɔr Aadichal aagon ŋi wii na aatakpal yaa, le ki dɔ kitiŋ ponn ni, ni kookoo.

² Sionn aanachipɔm nan ye ti chee liwangol ke salmaa na la, le dandana ma kan, bi gur ŋani bi ke tiyakr aabuu na.

³ Hali takɔ tiib kpiini baabim la, le maanib ma bi ke taataa tiib na, bi ŋani baabim mbiin la.

⁴ Bi cha baabim kpo nkon ni nnyunyuu la; mbim mee ban tijikaar ti ubaa aan tii bi na la.

⁵ Binib bi nan ji tijikaar ti ŋan sakpen na gur kpoi nkon kitiŋ ponn ni, binib bi nan ji nkpan ni n‑yaan na gur bi ŋitapun pu le ki far ban tijikaar.

⁶ Maanib kan ntafadaan ki jer Sodom yaab bi Uwumbɔr aaŋaal nan dan nan kuln bi liwinbaal na.

⁷ Timi aayidam nan ye binib bi kaa kpa tijɔŋ ki piin chain ke nkokoyon na la, bi nan kpa mpɔɔn, ki kpa laafee.

⁸ N‑yoonn mumina ma kan, ubaa aan ki bee bi, le bi dɔ titan ni, kitiŋ ponn ni, le nkun bɔnn binimbil wɔb; biwon kuur ke ndɔkuun na, le ki faan tam baakpab.

⁹ Binib bi nan kpoi butɔb ni na aakun nan soor ni bi kpo puwɔb na, nkon le nan ku bima ngbaan, le tijikaar aa nan bi, bi ji ki ŋmar.

¹⁰ Tibɔbir nan dan maanib pu ki joo ni ijawaan; natiib bi nan gee baabim sakpen na nan di bi ŋa tijikaar ki ŋaan bi.

¹¹ Uwumbɔr nan buur waaŋuusakpeln lii; U nan tuur mmii Sionn aatiŋ ponn ni le mu wun ki pel pel.

¹² Ubaa aa nan bi nibaa chee, hali ntiyayam aayidam aa nan dak ke udin ga ŋmaa dii Jerusalem aabisamɔi ki koo ki ponn ni.

¹³ Uwumbɔr aabɔnabr bi nan bi ki ponn ni na nan tun titunwanbir, le kaatotoorb mu nan cha binib bi kaa tun taani na kpoi, nima le nan cha kina ngbaan ŋa.

¹⁴ Kaasalolm nan chuun kpak kitiŋ ponn ni ke bijoom na, biwon mɔmɔk nan ye nsin, le ubaa aan kii ki meeh bi.

¹⁵ Binib nan teen ke, “Li cha man. Ni kpa tijɔŋ. Taa meeh mi.” Kina le ubaa aa nan gaa bi, le bi chuun kpak ki nya litimbol lee ni, ki ti saa lee ni.

¹⁶ Uwumbɔr aatafal aa nan ki bi bi ni; uma ubaa le nan yaa bi. Utafal aa nan bi timi aatotoorb ni biyidam ni.

¹⁷ Ti lik ban nterm mu kaa choo na, le kaa ti ki ŋmaa lik. Ti nan kiir ban nterm litimbol li kaa kpa nterm li tii timi na chee, le kaa kan.

¹⁸ Bidim nan bi lik ban timi; le taa nan ti ki ŋmaa chuun kitiŋ ponn ni. Timi aayoonn nan doo; timi aamɔfal nan kuln.

¹⁹ Bi nan jenn timi sunn mala mala ke likaagiil le aah boon ki nyan ni paacham na. Bi nan ti gob timi ŋigongon pu la; nteersakpiin pu le bi nan loon timi.

²⁰ Bi nan chuu timi aabɔr u ye timi aamɔfal na; uma le Uwumbɔr nan lee, le ti nan kpa limakl u pu ke u ga li kii timi bidim chee.

²¹ Edom ni Us aanib, li laa man; buyoonn ni ga ŋman na kan, li kpa mpopiin man. Ni mu aabɔbir choo; ni mu ga li chuun gbeer niŋmeen inimɔɔn ŋmeen.

²² Sionn aatiŋ pan kaatunwanbir pu; Uwumbɔr aan ki cha ti li bi tinaagbiir ni. Le sin Edom aatiŋ ma, Uwumbɔr ga daa aatafal; u ga nyan saataani mpaan pu.