Inandalahn 3 - Uwumbɔr aagbaŋ

Ntafadaan, ni titunwanbir aayiim, ni limakl

¹ M ye unii u nyi Uwumbɔr aatafadaan aah bi pu na la.

² U jenn mi koon mbɔmbɔɔn aakaasisik ni,

³ le ki gbaa mi kpakpaayuk, kaa san mi kinimbaak.

⁴ U gbaa mi le nwon lakr lakr, le ki kool maakpab.

⁵ U di mi ŋa falaa, ni iween aayondiik ni.

⁶ U chuu mi mpɔɔn le m ti koo kitekpiitiŋ ni, nin chee ye mbɔmbɔɔn ŋmeen na.

⁷ U buu mi tikululn kaan, le m kpaln unaagbiija u kaan ki ŋmaa san ŋmar na.

⁸ M wii mpɔɔn pu ki ban nterm, le Uwumbɔr yii, kaan pel m chee.

⁹ M yaa chuun kan, m gbeer la; le baah di ŋitakpal maa ŋigon ŋi na leŋ maasan mɔmɔk.

¹⁰ U nan dɔ kii mi ke kipeewanbiik na, le ki nan bib m pu ke uchinn na.

¹¹ U nan jenn mi koon timoor ni, ki ti daa par mi, ki siir cha mi nima chee.

¹² U nan taln waapiin mɔk mi ke u too.

¹³ U too waapiin chaar mi.

¹⁴ Binib laa mi le nwiin ti lir; m gur ye yaansara aanii binib mɔmɔk chee la.

¹⁵ U di falaa u wu sakpen na le di tii mi ke ni li ye maajikaar ni nnyun.

¹⁶ U di nnimbil tur buun titan ni, le ki tur mi lii isak pu le nnyin kool.

¹⁷ Maa ki nyi ngbapɔɔn ni nsuudoon ni mpopiin aah ye tiwan ni na.

¹⁸ Maamɔfal aa ki cha dik dik, maah nan mak Uwumbɔr pu pu na doo a.

¹⁹ M yaa dak maaween, ni maah kaa ki kpa do pu na kan, ni naahn ke maah nyun liluul le na.

²⁰ M dak ni pu n‑yoonn mɔmɔk la, le nsui mɔmɔk bii doo.

²¹ Le m yaa ti teer tiwan nibaa ni paa ni na pu kan, m ki kpa limakl.

²² Uwumbɔr aageehm ni linimbaasaln li kaa door na beenin bi.

²³ Waageehm ni linimbaasaln aa door ke kichakpiik ni, bee nwiin aah puur pu na, aah kaa door pu na la.

²⁴ Uwumbɔr baanja le m kpa, kina pu le m kpa limakl u pu.

²⁵ Uwumbɔr kpa tiŋann unii umɔk kii tii u na pu.

²⁶ Kina pu na, ni ŋan ke ti di limɔr kiir u, aan u nan gaa timi lii.

²⁷ Le ni ŋan ke ti bae limɔr buyoonn ti laa pɔɔn na.

²⁸ Buyoonn ti ji falaa na kan, ni ŋan ke ti li ka tibaa suuna, ki li kpa limɔr.

²⁹ Ni ŋan ke ti kii ke ti tun taani, nibaakan, limakl ga li bi.

³⁰ Bi gbaa timi, ki seei timi, tɔ, ni ŋan ke ti kii kina.

³¹ Uwumbɔr san kinimbaak, kaa yii timi kookoo.

³² Nibaakan, u ga joo ni timi falaa, tɔ, waageehm mu u kpa ti pu na bi ki pɔɔ.

³³ Ti yaa bi ji falaa kan, naa ye tiwan ni mɔ u na.

³⁴ Uwumbɔr nyi buyoonn tisui bii kiyondiik ni kookoo na.

³⁵ U nyi n‑yoonn mu bi gaal ti chee timi aabamɔn i u tii timi na.

³⁶ Buyoonn bibɔjirb ko biini ibamɔn pu libɔjil aadiik ni na, u nyi.

³⁷ Uwumbɔr aageehm baanja le tun lituln.

³⁸ Uma le ga len, le ni ŋan na, ni ni kaa ŋan na ga ŋa.

³⁹ Taah kpa limɔfal pu na, Uwumbɔr yaa daa titafal kan, naa ŋan ke ti ki len tibaa.

⁴⁰ Cha ti lik tibaa aabimbin suuna man ki gir ni Uwumbɔr chee.

⁴¹ Cha ti piir tisui tii Uwumbɔr u bi paacham na ki mee limeel ke,

⁴² “Uwumbɔr, ti tun titunwanbir ki yii saamɔb, le saa di cha pinn timi.

⁴³ Aa san dii timi ki ti ku timi; saaŋuul nan di saanimbaasaln na bɔr.

⁴⁴ Saaŋuul nan filk sakpen, le timi aameel aa ŋmaa jer ki ti pii si.

⁴⁵ Aa di timi le ŋa dulnyaa wee aatapuln.

⁴⁶ Timi aadim mɔmɔk laa timi le ki seei timi.

⁴⁷ Ti koo tibɔbir, ni libiil ni, le ki nyan; ti bi linimaln, ni ijawaan ni.

⁴⁸ Baah kuln maanib pu na, le cha maanyunyunn puu ke ŋimɔɔ na.

⁴⁹ Maanyunyunn ga li puu, kaan foor, ke nkpen na,

⁵⁰ le Uwumbɔr u bi paacham na ti nin lik kan timi.

⁵¹ M yaa lik tiwan ni ŋa kitiŋ kee aapiib na kan, le nsui bii.

⁵² Maa tun maadim taani ubaa le bi pen gaawɔb chuu mi ke unyoon na.

⁵³ Bi di mi mee lii mbuu ni le ki di litakpal leŋ mumɔb pu.

⁵⁴ Nnyun nan bi biini m pu, le m dak ke nkun peen ni a.

⁵⁵ Uwumbɔr, m nan bi mbuu ngbaan aataab taab, le ki wii yin si.

⁵⁶ Le maah gaŋ si ke aa pel maawiil na, aa ŋun.

⁵⁷ Aa nan ŋun le ki bui mi ke m taa san ijawaan.

⁵⁸ Uwumbɔr, aa dan ki nan gaa maamɔfal lii.

⁵⁹ Ji tibɔr ter mi, ba pu? aa nyi baah tun mi taani u na.

⁶⁰ Aa nyi maadim aah nan mi pu ki kpokl ki ban mi pu na.

⁶¹ Uwumbɔr, aa ŋun baah seei mi pu na; aa nyi baah kpokl pu na mɔmɔk.

⁶² Bi len maabɔr le ki kpokl m pu le nwiin ti lir.

⁶³ Ki nya kichakpiik ni ki ti saa kijook, bi yuul mi la.

⁶⁴ Uwumbɔr, daa bitafal, baah tun pu na pu.

⁶⁵ Puun lii bi pu ki cha biwon yɔl.

⁶⁶ Ban chuu bi, ki ŋar bi ŋŋaan kitiŋ kee pu.”