Inandalahn 2 - Uwumbɔr aagbaŋ

Uwumbɔr aah daa Jerusalem aatiŋ aatafal pu na

¹ Uwumbɔr aaŋuul ponn ni le u di mbɔmbɔɔn biin Sionn pu. U nan kpeln kaanyaan na ŋa tilangbenn. Waaŋuul ngbaan daal le u nan nyan cha Waadichal.

² Uwumbɔr nan kuln Juda aatiwaatiir na mɔmɔk, kaa san mu kinimbaak. U nan tur tijawan aadichal ŋi nan kii Juda aatiŋ na lir kitiŋ. U nan cha nnaan ngbaan ni binib bi joo mu na jin inimɔɔn.

³ Waaŋuul ponn ni, le u kuln Israel aajab aapɔɔn. Timi aadim aah nan fuu ni na, u nan yii, kaa ter timi. U nan fii sil ti pu ke mmii na, le ki kuln tiwan mɔmɔk.

⁴ U nan di waapɔɔn kaan ti pu ke waah ye timi aadin le na. U nan ku binib bi mɔmɔk nan tii timi mpopiin ni mmɔɔn na. Waaŋuul li ton ke mmii na nan pii ni timi bi bi Jerusalem aatiŋ ponn ni do na.

⁵ Uwumbɔr kuln Israel aatiŋ ke udin na la. U cha kaabɔrdichal, ni tijawan aadichal na kpaln tilangbenn. U tii Juda aanib mpombiin mu kaa kpa ndoon na.

⁶ Waadichal li ponn ni ti nan dooni u na, le u gbaa wii li yuk yuk. U kuln ŋikpaakoo, ni iwinyaan daal. Waaŋuul aapɔɔn fuu bibɔrb ni bitotoorb mu chee.

⁷ Uwumbɔr yii waatork aabimbiln, le ki siir cha Waadichal li bi chain na. U cha bidim kan nsan ki gbaa wii laagon. Nin chee ti nan joo mpopiin dooni u na, le bi kpa linyaŋ aafuuk.

⁸ Uwumbɔr puu ke Sionn aagon lir kitiŋ. U nan ŋaŋ ŋi ke u sil kan ŋaalirm. Bikikiib aadir na, ni ŋigon mɔmɔk ber le ki dɔ kitiŋ.

⁹ Ibisamɔi gur dɔ sub tibir ni, le yaakudɔ kool yuk yuk. Ubɔr ni bininyuum na gur bi tinaagbiir ni la. Ubaa aa ki mɔk binib Uwumbɔr Aakaal Aagbaŋ, le Uwumbɔr aa ki kpiir tibɔr tuk waabɔnabtiib.

¹⁰ Jerusalem aajaninkpiib gur ka kitiŋ le ki ŋmin chii, ki di titan puŋ biyil, ki pee tiwan ni saak kuub na. Bisapɔm ka tii biyil la.

¹¹ Iwiil pu le nnimbil ti foor koo; m bi ntoton ni la. Baah ku bii maanib pu na le mpombiin ban mu ku mi. Mbim ni mbipɔm fik le ki dɔ kitiŋ ponn ni.

¹² Nkon ni nnyunyuu pu le bi wii ki ban binatiib. Bi chuun kitiŋ ponn ni le ki lir ke titotonn le aah pii bi na. Le bi dɔ binatiib aaŋaal ni ki ti kpo.

¹³ Jerusalem aatiŋ ki m gee ki na, m ga len ke ba? M ga ŋa kinye ki sɔŋ aasui? Ubaa aa kee jin falaa umina aaboln. Saabɔbir aa kpa timɔk ke nnyusakpem na la; limakl aa ki bi nibaa chee.

¹⁴ Bibɔnabr nan tuk si inyamɔn ŋmeen la. Baah nan tuk si tibɔr ti na le ŋmann si, ba pu? baa nan kpiir saatunwanbir pu. Bi nan cha aa dak ke saa kpa tibɔbir tibaa aa kpiir.

¹⁵ Binib bi jer kitiŋ ngbaan chee na lik ki, le ki laa ki. Bi gbakr biyil le ki laa Jerusalem aatiŋ, le ki baa ke, “Kitinyaan na le na aa? Kitiŋ ki nan ye dulnyaa mɔmɔk aamakl na le na aa?”

¹⁶ Saadim mɔmɔk ŋani si yaansara, le ki gbee si kinanaŋ aaningbee. Bi mul bimɔi le ki bui ke, “Ti kuln ki a. Taah nan kii nwiin mu na le na.”

¹⁷ Uwumbɔr nan ŋa waah faan ke u ga ŋa pu na. U kuln timi kaa san timi kinimbaak, ke waah nan sak timi n‑yoonn mu jer na pu na. U tii timi aadim linyaŋ, u cha ti lir le ki tii bi mpopiin.

¹⁸ Jerusalem aatiŋ, cha aabaa aagon wii ki ban Uwumbɔr chee nterm. Cha saanyunyunn li puu kinyeek ni nwiin pu ke limɔɔl na. Cha saapombiin ni iwiil tii si tibakr.

¹⁹ Li fiir kinyeek ki wii ban nterm Uwumbɔr chee. Di aasui mɔmɔk wii ki gaŋ u aan u san saabim kinimbaak. Nkon ku mbim bilni kitiŋ ponn ni aalɔlɔnn mɔmɔk ni la.

²⁰ Uwumbɔr, lik binib bi aa bi jinni bi falaa na. Bipiib joo baah gee baabim mu na le ŋmɔ. Bi ku bitotoorb ni saabɔnabtiib Saadichal ni la.

²¹ Binib bi por na, ni bi kaa por na mɔmɔk kpoi kitiŋ ponn ni la. Bidim aajaak aajum le ku binachipɔm ni bisapɔm mɔmɔk. Saaŋuul aawiin daal le aa kɔr bi mɔmɔk, kaa san bi kinimbaak.

²² Aa yin ni maadim ke bi nan ji linikul aajim m chee. Le saaŋuul ngbaan daal ubaa aa ŋmaa ŋmar. Bi ku maabim mu m kpiin mu ki gee mu na.