Ilahn 99 - Uwumbɔr aagbaŋ

Uwumbɔr le ye ubɔrkpaan

¹ Uwumbɔr le ye ubɔr, le binib aawon gbaa. U ka waabɔrjal pu, tiwan ni kpa ifeen na aapaacham, le kitiŋ jii.

² Uwumbɔr kpa mpɔɔn Sionn pu, uma le ye ŋitimbol mɔmɔk aayidaan.

³ Unii mɔmɔk ga pak waayimbikpaan li kpa ijawaan na. U bi chain la.

⁴ Ubɔrkpaan, aa gee ibamɔn aawan la; aa cha ibamɔn bi Israel aatiŋ pu; aa joo ni mbimbinyaan ni ibamɔn.

⁵ Pak Tidindaan Uwumbɔr man; li dooni u man waabɔrjal taab. U bi chain la.

⁶ Moses ni Aaronn le nan ye waatotoorb, le Samuel nan ye unii u mee u na; bi nan yin Uwumbɔr, le u kii baayim ngbaan.

⁷ U nan bi ntaalangbam ni le ki len bi chee tibɔr; bi nan kii waakaal, ni waah bui bi pu na.

⁸ Tidindaan Uwumbɔr, aa kii saanib aayim; aa mɔk bi ke aa ye Uwumbɔr u joo cha pinni taani na la, tɔ, aa nan tee daa bitafal, baatunwanbir pu.

⁹ Pak Tidindaan Uwumbɔr man, li dooni u waagongoln li bi chain na pu man. Tidindaan Uwumbɔr bi chain la.