Ilahn 98 - Uwumbɔr aagbaŋ

Uwumbɔr le ye dulnyaa aajojoor

¹ Gaa nlahnpɔɔn tii Uwumbɔr man; u tun ŋitukpaan; u di ubaa aapɔɔn mu bi chain na le kan linyaŋ.

² Uwumbɔr moon waah kan linyaŋ pu na; u cha ŋitimbol bee ke u kpa mpɔɔn ki joo gaal binib lir.

³ U joo waah puu tipuur ti tii waanib Israel yaab na. Waa nya bipuwɔb, le ki kpa ngeehm tii bi n‑yoonn mɔmɔk. Binib bimɔk bi ni kookoo na kan timi Aawumbɔr aanyaŋ.

⁴ Kitiŋ mɔmɔk, gaa mpopiin aalahn tii Uwumbɔr, di ilahn pak u ki li joo mpopiin tar.

⁵ Gaa ilahn pak Uwumbɔr man. Di tibar gaa ilahn man.

⁶ Pii kakaan ni ikpiin man, ki di mpopiin teen mpɔɔn pu tii Uwumbɔr u ye timi aabɔr na.

⁷ Nnyusakpem, ni tiwanfuurkaan ni mɔmɔk bi aa ponn ni na, faa kifuuk man; kitiŋ, ni binib bi mɔmɔk bi aa pu na, gaa ilahn man.

⁸ Nimi ŋimɔɔ, faa kifuuk man; nimi ŋigongon, kpaan man ki gaa mpopiin aalahn Uwumbɔr aanimbiin ni,

⁹ ba pu? u choo ke u nan joo dulnyaa la; u ga di mbimbinyaan ni ibamɔn le joo dulnyaa aanib.