Ilahn 97 - Uwumbɔr aagbaŋ

Uwumbɔr le ye ujojoorkpaan

¹ Uwumbɔr le ye ubɔr, kina pu na, kitiŋ, li mɔɔni. Nnyusakpem aadik, li mɔɔni man.

² Ntaalangbam, ni mbɔmbɔɔn le mann goln u; u joo mbimbinyaan ni ibamɔn le joo binib.

³ Mmii le lolni u pu nsan le ki wu waadim bi mann goln u na.

⁴ Waawiihn mu moor ke utaal na le wolni dulnyaa pu; kitiŋ kan kina le ki jii.

⁵ Ŋigongon donn ke nsiikpan na le Uwumbɔr aanimbiin ni, ŋi donn kitiŋ kee mɔmɔk Aadindaan aanimbiin ni la.

⁶ Paacham aawan mooni waah kpa mbimbinyaan pu na, le ŋitimbol waa waah kpa kinyuŋ pu na.

⁷ Unii umɔk dooni ŋiwaa na jin inimɔɔn a; ŋiwaa mɔmɔk gbaani Uwumbɔr aanimbiin ni la.

⁸ Sionn aanib kpa mpopiin, le Juda aatim mɔɔni. Uwumbɔr, saabɔjil pu le bi mɔɔni.

⁹ Uwumbɔr u kaa kpa ŋeen aatɔ na, sin le ye kitiŋ kee mɔmɔk aajojoor; saapɔɔn nyaŋ dindatiib mɔmɔk aapɔɔn.

¹⁰ Uwumbɔr gee binib bi kaa gee titunwanbir na; u kii waanib aamɔfal; u gaal bi bibiindam chee lir.

¹¹ Nwiihn woln binib bi aabimbin ŋan na pu, le mmɔɔn bi bininyaam chee.

¹² Nimi bi aabimbin ŋan na, li mɔɔni man, Uwumbɔr aah tun pu na pu. Teer Uwumbɔr u bi chain na aah ŋa pu na, ki tii u idoon.