Ilahn 96 - Uwumbɔr aagbaŋ

Uwumbɔr le ye ubɔrkpaan

¹ Gaa nlahnpɔɔn tii Uwumbɔr man. Dulnyaa wee mɔmɔk, gaa ilahn tii Uwumbɔr man.

² Gaa ilahn tii Uwumbɔr man, ki pak u. Iwiin mɔmɔk kan, ni li mooni waah gaa timi lii pu na aabɔnyaan.

³ Moon waah kpa kipak pu na ki tuk ŋitimbol, ki moon waah tun ŋitukpaan pu na tuk binib mɔmɔk.

⁴ Uwumbɔr aapɔɔn nyaŋ sakpen, le ni ŋan ke ti pak u sakpen; ti ga nyuŋ u ki jer dindatiib mɔmɔk.

⁵ Ŋitimbol ŋiken na mɔmɔk aawaa po ye tiwan ni bi naan ni na la, le Uwumbɔr naan paacham.

⁶ Kipak ni nnaan aapɔɔn le mann goln u; le mpɔɔn ni kinyaan gbii Waadichal ni.

⁷ Kitiŋ kee aanib mɔmɔk, li pak Uwumbɔr man; pak man waapɔɔn ni waah kpa kinyuŋ sakpen pu na.

⁸ Pak Uwumbɔr aayimbil li kpa kinyuŋ na man; li joo ni ipiin ki di dan man Waadichal ponn ni.

⁹ Uwumbɔr u bi chain na yaa choo kan, gbaan unimbiin ni man; kitiŋ kee mɔmɔk li jii unimbiin ni.

¹⁰ Bui ŋitimbol mɔmɔk ke, “Uwumbɔr le ye ubɔr. Kitiŋ si kaabuul ni chib, kaan ŋmaa foor daalbaadaal; u ga di ibamɔn ji binib tibɔr.”

¹¹ Kitiŋ ni kitaapaak, li mɔɔni man. Nnyusakpem, ni tiwanfuurkaan nimɔk bi aa ponn ni na, faa kifuuk man;

^12-13 ikpaakon, ni tiwan nimɔk bi i ponn ni na, li mɔɔni man. Uwumbɔr yaa nan dan ke u nan joo kitiŋ kan, isui i bi kichook ni na ga di mpopiin teen mpɔɔn pu. U ga di ibamɔn ni mbimbinyaan ji dulnyaa aanib tibɔr.