Ilahn 95 - Uwumbɔr aagbaŋ

Kipak aalahn

¹ Dan man, aan ti nan pak Uwumbɔr. Cha ti gaa mpopiin aalahn tii Uwumbɔr u kii timi na man.

² Cha ti di idoon dan unimbiin ni man, ki gaa mpopiin aapak aalahn man,

³ ba pu? Uwumbɔr ye Mpɔɔnsakpiindaan la, ubɔr mpɔɔnsakpiindaan u joo dindatiib mɔmɔk na.

⁴ Uma le joo kitiŋ kee mɔmɔk, ki nya kitakpaluŋ ki nyoo sakpen na ni ki ti saa ligongoln li paa sakpen na paab.

⁵ Uma le lik waah naan nnyusakpem mu na pu, ni kitiŋ ki u naan na mu pu.

⁶ Dan man, aan ti nan gbaan ki doon u; Cha ti gbaan man Uwumbɔr u naan timi na aanimbiin ni.

⁷ Uma le ye timi Aawumbɔr; timi le ye binib bi u lik ti pu na, ki ye binib bi u tii bi tiwan na. Li pel man waah len pu din wee na;

⁸ “Taa cha nitafal li pɔɔ ke niyaajatiib aah nan bi pu Meriba aatiŋ ni na, ke baah nan ŋa pu nteersakpiin ni, Masa aatiŋ ni na.

⁹ Nima chee bi nan tɔŋ mi ki lik, ki nyi maah tun pu tii bi na.

¹⁰ Nlaasaab nan nyan binib ngbaan ni, ŋibin imonko ilee ponn ni. Le m bui ke, ‘Baa si mpuwɔb kpala. Bi yii, kaa joo maakaal.’

¹¹ Maaŋuul nan fii, le m puu tipuukpaan ke, ‘Naan koo kitiŋ ki ponn ni m ba ga tii nimi lifuur na.’”