Ilahn 94 - Uwumbɔr aagbaŋ

Uwumbɔr le ye unibɔn mɔmɔk aabɔjir

¹ Ndindaan Uwumbɔr u dar binib aatafal na, kpiir saaŋuul mɔk binib.

² Sin le ye unibɔn mɔmɔk aabɔjir; fii sil ki tii bigaadam tiwan ni ŋeer bi na.

³ Taa cha bibiindam aapopiin ki yunn. Uwumbɔr, taa cha ni ki yunn.

⁴ Taa cha titunwanbirdam aagaak ki yunn, aan bi li beenin kpa kipupuk baatunwanbir aatuln pu.

⁵ Uwumbɔr, bi wɔi saanib; bi muk binib bi ye saanib na.

⁶ Bi ku bikpopiib ni nkpobim, ki ku biwɔwɔm bi bi timi aatiŋ pu na.

⁷ Bi len le ke, “Uwumbɔr aa waa timi; uma u ye Israel yaab Aawumbɔr na aa nyi.”

⁸ Maanib, ba ŋa ni ye bigbaam ni bijɔrb kina? Bayoonn aan ni ga bae?

⁹ Uwumbɔr le naan timi aatafal, kina pu na u ŋun. Uma le naan timi aanimbil, kina pu na, u waa.

¹⁰ Uma le sur ŋitimbol, u dar ŋitafal. Uma le ye unibɔn mɔmɔk aamɔmɔkr, kina pu na, u nyi tiwan mɔmɔk aabɔr.

¹¹ Uwumbɔr nyi baalandak; u nyi ke baalandak ye kijɔrk ŋmeen la.

¹² Uwumbɔr, saah bae unii u ki joo saakaal mɔk u na kpa mpopiin.

¹³ Aa tii u lifuur, tibɔr aawiin daal, ki ti saa n‑yoonn mu bi gbii libuul bilni bibiindam na.

¹⁴ Uwumbɔr aan siir cha waanib; waan suln binib bi ye waanib na aabɔr.

¹⁵ Bi ga ki kan ibamɔn libɔjil ni, le binib bimɔk aabimbin ŋan na ga sil ibamɔn ngbaan aachaŋ ni.

¹⁶ Ŋma nan sil nchaŋ ni bibiindam chee? Ŋma nan sil mpuwɔb titunwanbirdam chee?

¹⁷ Uwumbɔr yaa kaa ba nan ter mi kan, kina m ba nan san mala sunn bitekpiib chee.

¹⁸ Uwumbɔr, m bui ke, “M bi lir la;” le saageehm mu bi n‑yoonn mɔmɔk na chuu mi siin chob.

¹⁹ N‑yoonn mumɔk m dak ilandak aan ni muk mi na, le aa sɔŋ nsui ki tii mi mpopiin.

²⁰ Aa ni bibɔjirb bi gaal igaŋgaŋlik na aa kpaani tɔb chee. Bima le cha ibamɔn gangal tun lituln,

²¹ ki kpokl binib bi aabimbin ŋan na pu ki cha bi ku binib bi kaa tun taani na,

²² le Uwumbɔr tee si mpuwɔb; Maawumbɔr le kii mi.

²³ U ga daa bitafal baabiin pu, ki kuln bi baatunwanbir pu; Tidindaan Uwumbɔr ga kuln bi.