Ilahn 92 - Uwumbɔr aagbaŋ

Likpaakool daal aalahn

¹ Uwumbɔr, ni ŋan sakpen ke ti doon si, Uwumbɔr u kaa kpa ŋeen aatɔ na, ni ŋan ke ti gaa ilahn ki nyuŋ si,

² ni ŋan ke ti li mooni saageehm mu bi n‑yoonn mɔmɔk na, kichakpiik mɔk ni, ki moon ke aa ŋani saah puu tipuur ti na, kinyeek,

³ ni ŋan ke ti di ibeeŋmin aawan ni tibar gaa ilahn ki pak si.

⁴ Uwumbɔr, saatukpaan na tii mi mpopiin; saah tun pu na, le m ga gaa mpopiin aalahn.

⁵ Uwumbɔr, saatun nyaŋ sakpen. Saalandak nyoo pam.

⁶ Nimina le ye tiwan ni ujɔr aan ŋmaa bee na; ulatiir mu aan ŋmaa bee naatataa.

⁷ Bibiindam ga ŋmaa muun ke timoor na, binib bi tun taani na ga ŋmaa kan tinyoor, tɔ, liwinbaal le bi ga nan kuln kookoo,

⁸ ba pu? sin Uwumbɔr le bi n‑yoonn mɔmɔk ki kpa mpɔɔn jer mpɔɔn mɔmɔk.

⁹ Ti nyi ke saadim ga kpoi, le bibiindam mɔmɔk ga lir.

¹⁰ Aa cha m pɔɔ ke upɔɔnaa na la; aa tii mi mpopiin.

¹¹ M kan maadim aah lir pu na, ki ŋun bibiindam aah wii pu na.

¹² Binib bi aabimbin ŋan na ga ŋa tinyoor ke libɔkpal aasui na la; bi ga muun ke Lebanonn aasantina aasui na la.

¹³ Bi naahn isui i bi ŋum i Uwumbɔr Aadichal chee na la, bi muuni timi Aawumbɔr Aadichal aachiln ni la,

¹⁴ le ki beenin lu ŋisubil buyoonn i por na, ki kpa tifasɔnn ki pɔɔ n‑yoonn mɔmɔk.

¹⁵ Nimina le mɔk ke Uwumbɔr si chob la, maakikiir aa kpa ngalm mubaa.